მსახიობი, სამხედრო და პრეზიდენტის მრჩეველი - ალექსეი არესტოვიჩი, რომელმაც რუსეთ-უკრაინის ომი 2019 წელს იწინასწარმეტყველა, კახეთშია დაბადებული
ალექსეი არესტოვიჩი უკრაინაში ომის დაწყების დღიდან საზოგადოების ყურადღების ცენტრში უკრაინის ფარგლებს გარეთაც მოექცა, განსაკუთრებულად პოპულარულია საქართველოშიც. ზელენსკის მრჩეველი ხშირად ჩანს მედიაში და მიმდინარე მოვლენებზე განცხადებებს აკეთებს. ქართველებისთვის მისი ფიგურა კიდევ ერთმა ფაქტმა გახადა საინტერესო - როგორც ირკვევა, არესტოვიჩი 1975 წლის 3 აგვისტოს კახეთში, დედოფლისწყაროში, სამხედრო გარნიზონში დაიბადა. უკრაინული თეატრისა და კინოს მსახიობი, ბლოგერი, სამხედრო, ამჟამად პრეზიდენტის აპარატის ხელმძღვანელი და თავისუფალი მრჩეველია.
მას აქვს ბელორუსული და პოლონური ფესვები. მამა უკრაინის ეროვნული თავდაცვის აკადემიის შესარჩევი კომიტეტის ხელმძღვანელი იყო. ალექსეის დაბადებიდან მალე ოჯახი საცხოვრებლად უკრაინაში გადავიდა.1992 წელს დაამთავრა კიევის 178-ე სკოლა, შემდეგ კი უნივერსიტეტის ბიოლოგიის ფაკულტეტზე ჩაირიცხა.
ალექსეი არესტოვიჩმა სამსახიობო კარიერა 1993 წელს დაიწყო. თამაშობდა კიევის თეატრ-სტუდიაში "შავი მოედანი". ამის შემდეგ, უნივერსიტეტში სწავლა მიატოვა და რეგულარულად ესწრებოდა სამსახიობო გაკვეთილებს. 2007 წელს გახდა კინოსაპროდუსერო კომპანია Aegis Artist Group-ის თანადამფუძნებელი. 2013 წელს ის მონაწილეობდა ICTV არხზე გადაცემის "ასწავლე ცხოვრება" გადაღებებში, როგორც ოჯახის ფსიქოლოგი და წამყვანი.
თამაშობდა სარეკლამო რგოლებსა და სერიალებში - "მუხტარის დაბრუნება", "მოლოდინი", "ძმა-ძმისთვის" და ა.შ. 2012 წელს მთავარი როლი შეასრულა კომედიაში "ნუ გეშინია, ახლოს ვარ". მისი პერსონაჟი იგორ სმირნოვი ბანკის თანამშრომელია, რომელიც სამუშაოსა და პირად ცხოვრებას ვერ აბალანსებს.
არესტოვიჩი 2000 წლიდან ატარებს ფსიქოლოგიურ სემინარებსა და ტრენინგებს. დრამატული იმპროვიზაციის ხელოვნების სწავლების კურსის დასრულების შემდეგ, საავტორო წიგნიც დაწერა.
2003 წელს ჩაირიცხა აბესალომ პოდვოდნის საავტორო სკოლაში, რომელიც 2010 წელს დაამთავრა. სწავლობდა თეოლოგიას რელიგიის მეცნიერებათა უმაღლეს ინსტიტუტში. არის აქტიური ბლოგერი, ჰყავს ასობით ათასი მიმდევარი Facebook-სა და YouTube-ზე. არესტოვიჩმა დაამთავრა ოდესის სახმელეთო ჯარების ინსტიტუტი, აქვს სამხედრო თარჯიმანის დიპლომი. 1994-2005 წლებში მუშაობდა დაზვერვის მთავარ სამმართველოში, არის რეზერვის მაიორი.
2005 წელს იგი შეუერთდა "საძმოს პარტიას“, სადაც იყო პარტიის თავმჯდომარის დიმიტრი კორჩინსკის მოადგილე.
2009 წლის ივნისში დაინიშნა ოდესის საქალაქო საბჭოს პრიმორსკის რაიონული ადმინისტრაციის თავმჯდომარის მოადგილედ, საიდანაც სამი თვის შემდეგ საკუთარი ნებით გადადგა. 2014 წლის ევრომაიდანის შემდეგ მან დაიწყო სამხედრო ექსპერტად პოზიციონირება, რომელიც ხშირად ჩნდებოდა მედიასა და სოციალურ ქსელებში. 2014 წლიდან სახალხო რეზერვისტების პროგრამის ფარგლებში ასევე ამზადებდა სამხედრო ფორმირებებს, იყო საქველმოქმედო ფონდის ორგანიზატორი, რომელიც მიზნად ისახავდა სამხედროების ფსიქოლოგიურ მხარდაჭერას NATO-ს ზონაში.
"იუთუბზე" იძებნება 2019 წელს ჩაწერილი მისი ინტერვიუ, რომელშიც არესტოვიჩი ამბობს, რომ რუსეთ-უკრაინის ომი გარდაუვალია.
"მოსალოდნელია სრულმასშტაბიანი ომი რუსეთთან. ამაში იგულისხმება რუსული ჯარების შემოჭრა, საჰაერო თავდასხმები, კიევის ალყა, შემოჭრა ყირიმიდან და ბელარუსის ტერიტორიიდან, საჰაერო დესანტის გადმოსხმა და ა.შ." - ეს ყველაფერი არესტოვიჩმა 2019 წელს იწინასწარმეტყველა და განაცხადა, რომ ომი 99%-ით გარდაუვალი იყო.
ალექსეი არესტოვიჩი ორჯერ იყო დაქორწინებული. პირველი ქორწინებიდან მას ქალიშვილი, ვერონიკა ჰყავს. მეორე ცოლი ანასტასია არესტოვიჩი, ერთ-ერთ გამომცემლობაში განვითარების დირექტორად მუშაობს. წყვილმა 2015 წელს იქორწინა და საერთო ვაჟი, ალექსანდრე ჰყავთ.