"დონბასიდან ქალების, ბავშვების და მოხუცების ევაკუაცია ხორციელდება" - რა ინფორმაციას ავრცელებს რუსული მედია?

დონეცკისა და ლუგანსკის თვითგამოცხადებული რესპუბლიკებიდან რუსეთის საზღვარი 10 000-ზე მეტმა დევნილმა გადმოკვეთა, - ინფორმაციას სააგენტო "ინტერფაქსი“ საკუთარ წყაროზე დაყრდნობით ავრცელებს. მათივე ინფორმაციით, ჯერჯერობით ქალების, ბავშვების და მოხუცების ევაკუაცია ხორციელდება.

შეგახსენებთ, გუშინ თვითგამოცხადებული ე.წ. დონეცკისა და ლუგანსკის სახალხო რესპუბლიკების ე.წ. ლიდერებმა, დენის პუშილინმა და ლეონიდ პასეჩნიკმა მოსახლეობის ევაკუაცია გამოაცხადეს.

გუშინვე ცნობილი გახდა, რომ რუსეთის პრეზიდენტის, ვლადიმერ პუტინის დავალებით, რუსეთის მთავრობა თითოეულ დევნილს, ვინც დონეცკიდან როსტოვში გადავა, დახმარების სახით, 10 ათას რუბლს გადაუხდის.

გავრცელებული ინფორმაციით, ე.წ. დონეცკის სახალხო რესპუბლიკიდან რუსეთში 700 000-მდე ადამიანის ევაკუირება იგეგმება.