სასჯელი სექსუალური შევიწროების მსხვერპლი გოგონების აღიარების საპასუხოდ - საუდის არაბეთში სოცქსელში "ჭორების" გავრცელებისთვის 5 - წლიანი პატიმრობა შემოიღეს

საუდის არაბეთის ხელისუფლება გაფრთხილებას იძლევა, რომ ნებისმიერი ადამიანი, ვინც სოციალურ მედიაში უსაფუძვლო ჭორებს გაავრცელებს, 5 წლამდე თავისუფლების აღკვეთით დაისჯება.

ეს ახლახანს მომხდარი ამბის შედეგადაა გამოწვეული: ერ-რიადში კონცერტის გაუქმების შემდეგ, სოციალურ ქსელში ახალგაზრდა გოგონების სექსუალური შევიწროვების ამბები გავრცელდა, რაც სამართალდამცველებმა ყალბ ამბებად მიიჩნიეს.

ზოგიერთი მსხვერპლი ამბობდა, რომ ეშინოდა სოციალურ ქსელებში ამ თემაზე ღიად საუბრის.

ცნობილი პოპ ჯგუფის - Stray Kids-ის კონცერტი 14 იანვარს, საუდის არაბეთის დედაქალაქის გარეუბანში უნდა გამართულიყო, თუმცა ბოლო მომენტში, ის ძლიერი ქარის გამო გადაიდო.

იმედგაცრუებული ფანები სახლებში დაბრუნდნენ. სოციალურ ქსელში კი გავრცელდა პოსტები, სადაც წერდნენ, რომ კონცერტზე წასული გოგონები დაიკარგნენ, ასევე ფანები ერთმანეთს სიფრთხილისკენ მოუწოდებდნენ, რადგან სექსუალური შევიწროვების ფაქტები მრავლად იყო.

ამავე დღეს "თვითერზე" ვრცელდებოდა მამაკაცების ფოტოები, რომლებსაც გოგონები ბრალს სდებდნენ ძალადობის მცდელობაში, მაგრამ იმის გამო, რომ ამ ბრალდების დამადასტურებელი ვიდეო, ან ფოტომტკიცებულება არ არსებობს, არავინ დასჯილა.

სამართალდამცველებმა ამგვარ პოსტებს "გამოგონილი" უწოდეს.

წყარო: BBC

მოამზადა ანა სიბოშვილმა