"რუსეთმა წინათ გამოიყენა სამხედრო ძალა მეზობლების წინააღმდეგ, ამიტომ საფრთხე რეალურია" - რას აცხადებს ნატო-ს გენერალური მდივანი საქართველოსა და უკრაინის შესახებ
რუსეთმა წინათ გამოიყენა სამხედრო ძალა მეზობლების, საქართველოს, უკრაინისა და სხვების წინააღმდეგ, ამიტომ საფრთხე რეალურია და დიალოგში ჩართვა მნიშვნელოვანია, იმისთვის, რომ პოლიტიკური გამოსავალი გამოიძებნოს, - ამის შესახებ ნატო-ს გენერალურმა მდივანმა იენს სტოლტენბერგმა CBS-თან ინტერვიუში განაცხადა.
- მისი თქმით, ალიანსი მზად უნდა იყოს, რომ რუსეთმა, შესაძლოა, კვლავ გამოიყენოს ძალა.
"ამასთან, მზად უნდა ვიყოთ, რომ რუსეთმა, შესაძლოა, კვლავ გამოიყენოს ძალა. ჩვენ უნდა გავაგზავნოთ ნათელი შეტყობინება, რომ თუკი რუსეთი ასე მოიქცევა, ამას მკაცრი ეკონომიკური და პოლიტიკური შედეგები მოჰყვება.
უნდა გვესმოდეს, რომ აგრესორი რუსეთია, სწორედ რუსეთს აქვს ოკუპირებული ყირიმი, ისინი მხარს უჭერენ სეპარატისტებს დონბასში, აღმოსავლეთ უკრაინაში და ახორციელებენ კიბერთავდასხმებს უკრაინის წინააღმდეგ,“- აღნიშნა სტოლტენბერგმა.
მან კიდევ ერთხელ გაუსვა ხაზი, რომ ალიანსი არ წავა დათმობაზე ევროპული უსაფრთხოების ძირითად პრინციპებთან დაკავშირებით.
"ნატო-ს მოკავშირეები ვერ წავლენ დათმობაზე ევროპული უსაფრთხოების ძირითად პრინციპებთან დაკავშირებით, საერთაშორისო უსაფრთხოების პრინციპებთან დაკავშირებით, რომ ყველა ქვეყანას აქვს უფლება აირჩიოს საკუთარი გზა, თავად გადაწყვიტოს, სურს თუ არა მას ნატო-ს წევრი გახდეს,“- აღნიშნა ნატო-ს გენერალურმა მდივანმა.