"მის მსოფლიო 2021“-ის ფინალი კონკურსანტების კორონავირუსით დაინფიცირების გამო გადაიდო

"მის მსოფლიო 2021“-ის ფინალი, რომელიც პუერტო-რიკოში უნდა გამართულიყო, გადაიდო, რადგან ღონისძიებასთან დაკავშირებულ რამდენიმე პირს კორონავირუსი დაუდასტურდა, - ინფორმაციას CNN-ი ავრცელებს.

ტელეკომპანიის ცნობით, კონკურსის დაწყებამდე რამდენიმე საათით ადრე გამოქვეყნებულ განცხადებაში ორგანიზატორებმა განაცხადეს, რომ "კონკურენტების, პერსონალის, ტელევიზიის თანამშრომლებისა და ფართო საზოგადოების ჯანმრთელობისა და უსაფრთხოების ინტერესებიდან“ გამომდინარე, სატელევიზიო ფინალის გადადების გადაწყვეტილება მიიღეს.

პუერტო-რიკოს ჯანდაცვის სამსახურში აცხადებენ, რომ კორონავირუსი "მის სამყაროსთან“ დაკავშირებულ 38 პირს დაუდასტურდა, მათგან 23 კონკურსანტია. მათი განმარტებით, კონკურსის გადადების გადაწყვეტილება ორგანიზატორებმა მიიღეს და არა პუერტო-რიკოს ხელისუფლებამ.

"მის მსოფლიოს“ ორგანიზატორები აცხადებენ, რომ ფინალი მომდევნო 90 დღის განმავლობაში ჩატარდება.