"ერთადერთი, რის გამოც მინდოდა სასამართლო პროცესზე მოსვლა, იყო იმ ადამიანების გამხნევება, რომლებიც რამდენიმე თვეა ჩემ გამო იჩაგრებიან" - მიხეილ სააკაშვილი
საქართველოს ყოფილი პრეზიდენტის, მიხეილ სააკაშვილის განცხადებით, ერთადერთი, რის გამოც მას ხვალინდელ სასამართლო სხდომაზე დასწრება სურდა, იმ ადამიანების და მხარდაჭერების გამხნევებაა, რომლებიც, ექსპრეზიდენტის თქმით, რამდენიმე თვეა მის გამო იჩაგრებიან.
"ჯანმრთელობის მდგომარეობის გამო ხვალ ვერ დავესწრები სასამართლო პროცესს.
ერთადერთი, რის გამოც აუცილებლად მინდოდა მოსვლა, იყო იმ ადამიანების გამხნევება და მხარდაჭერა, რომლებიც რამდენიმე თვეა იჩაგრებიან ჩემ გამო.
ეს ადამიანები დაუყოვნებლივ უნდა გათავისუფლდნენ და დაუბრუნდნენ თავიანთ ოჯახებს!“ - აღნიშნულია მიხეილ სააკაშვილის "ფეისბუქ“ გვერდზე გამოქვეყნებულ მიმართვაში.
შეგახსენებთ, 9 დეკემბერს საქართველოს სახელმწიფო საზღვრის უკანონო კვეთის საქმეზე თბილისის საქალაქო სასამართლოში მიხეილ სააკაშვილის სასამართლო პროცესი გაიმართება.
შინაგან საქმეთა სამინისტრომ მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს აქვს წაყენებული და ის ცალკე წარმოებად მიმდინარეობს.