"ეკონომიკის 6,5 მილიარდი ლარით გაზრდა შევძელით, რაც საკმაოდ შთამბეჭდავი მიღწევაა წელს, მით უმეტეს პანდემიის ფონზე" - პრემიერი
საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე სამინისტროების ბიუჯეტზე ისაუბრა. ღარიბაშვილის თქმით, ყველაზე მაღალი ბიუჯეტი ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს (6 მილიარდ ლარზე მეტი) აქვს, ხოლო ყველაზე მცირე ბიუჯეტი შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატს (3 მილიონ ლარი) დაუფიქსირდა.
ამასთან, პრემიერის განცხადებით, საქართველოს მთავრობამ ეკონომიკის 6.5 მილიარდი ლარით გაზრდა შეძლო, რაც კრიზისების ფონზე "შთამბეჭდავი“ მიღწევაა.
"სამინისტროების დაფინანსებას რაც შეეხება, ფინანსთა სამინისტროს დაფინანსება შეადგენს 105 მილიონ ლარს, გაზრდილია დაახლოებით 16 მილიონი ლარით. საქართველოს ეკონომიკის სამინისტროს ბიუჯეტი შეადგენს 932 მილიონ ლარს და გაზრდილია დაახლოებით 290 მილიონი ლარით. აქედან, დაახლოებით 300 მილიონი ლარი მიემართება "აწარმოე საქართველოს“ პროექტებისთვის და პროგრამებისთვის. საქართველოს რეგიონული განვითარებისა და ინფრასტრუქტურის სამინისტროს დაფინანსება შეადგენს 2.8 მილიარდ ლარს, დაახლოებით 430 მილიონ ლარზე მეტით არის გაზრდილი ბიუჯეტი. იუსტიციის სამინისტროს ბიუჯეტი შეადგენს 310 მილიონ ლარს და გაზრდილი არის 14 მილიონი ლარით. საგარეო საქმეთა სამინისტროს ბიუჯეტი არის 176 მილიონი ლარი, თითქმის 6 მილიონ ლარამდე გავზარდეთ. თავდაცვის სამინისტროს ბიუჯეტი შეადგენს მილიარდ ლარს და გავზარდეთ დაახლოებთ 72 მილიონი ლარით ბიუჯეტი. შინაგან საქმეთა სამინისტროს დაფინანსება შეადგენს 865 მილიონ ლარს და გაზრდილი გვაქვს 85 მილიონი ლარით. ოკუპირებული ტერიტორიების, დევნილთა, შრომის და ჯანმრთელობის დაცვის სამინისტროს დაფინანსება შეადგენს 6 მილიარდ ლარზე მეტს. შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის 3 მილიონ ლარს, გაზრდილია დაახლოებით ნახევარი მილიონი ლარით. გარემოს დაცვისა და სოფლის მეურნეობის სამინისტროს დაფინანსება 593 მილიონ ლარს. განათლების და მეცნიერების სამინისტრო - მილიარდ 684 მილიონ ლარს, ხოლო კულტურის სპორტისა და ახალგაზრდობის სამინისტროს დაფინანსება 357 მილიონ ლარს შეადგენს. ასევე გეტყვით, რომ შედარებისთვის 2022 წლის მთლიანი ვალი შეადგენს 60% მშპ-სთნ მიმართებით, ხოლო მთლიანი ეკონომიკა შეადგენდა 58.5 მილიარდ ლარს, გამოდის რომ 6,5 მილიარდი ლარით გაზრდა შევძელით მშპ-ს - ეკონომიკის გაზრდა, რაც საკმაოდ შთამბეჭდავი მიღწევაა წელს, მით უმეტეს პანდემიის და ამდენი კრიზისის ფონზე“, - განაცხადა ღარიბაშვილმა.