რუსეთში, ქვანახშირის მაღაროში დაღუპულთა რაოდენობა 52-მდე გაიზარდა, კემეროვოს ოლქში სამდღიანი გლოვა გამოცხადდა
რუსეთის კემეროვოს ოლქში, "ლისტვიაჟნაიას“ მაღაროში დაღუპულთა რაოდენობა 52-მდე გაიზარდა, - ინფორმაციას რუსული მედია ავრცელებს. მათივე ინფორმაციით, დაღუპულებს შორის 6 მაშველია.
მაღაროში ჩარჩენილი მეშახტეები და მათ გადასარჩენად შესული მაშველები ჟანგბადის ნაკლებობისა და მომწამვლელი აირების მაღალი კონცენტრაციის გამო დაიღუპნენ. კემეროვოს ოლქში 26 ნოემბერს სამდღიანი გლოვა გამოცხადდა.
"ლისტვიაჟნაიას“ ქვანახშირის მაღაროში ძლიერი დაკვამლიანების გამო მაშველები გუშინ დილით გამოიძახეს. საგანგებო სიტუაციების სამინისტროს ინფორმაციით, ინციდენტის დროს შახტაში 287 მაღაროელი იმყოფებოდა და მათგან 239-ის ევაკუაცია განხორციელდა. გავრცელებული ინფორმაციით, მომხდართან დაკავშირებით სამართალდამცავებმა მაღაროს დირექტორი და მისი მოადგილე დააკავეს.