ფიზიკური დაპირისპირება ბათუმის საკრებულოსთან - რა ხდება ამ წუთებში ადგილზე, სადაც აქციის მიმდინარეობისას ორი პირი დააკავეს
ბათუმის საკრებულოსთან მიმდინარე საპროტესტო აქციის მონაწილეები შენობაში შესვლას ცდილობენ, რის გამოც ადგილზე აქციის მონაწილეებსა და სამართალდამცავებს შორის ფიზიკური დაპირისპირებაა. არსებული ინფორმაციით, აქციის მიმდინარეობისას ორი პირი დააკავეს.
ადგილზე იმყოფებიან საკრებულოს ის დეპუტატები, რომლებსაც სხდომათა დარბაზი დაატოვებინეს. აქტივისტების განმარტებით, ადმინისტრაციულ უწყებაში სხდომები საჯაროა და უფლება აქვთ, რომ სხდომას დაესწრონ. მათივე თქმით, დღეს არ დაიშლებიან და აღნიშნული სხდომა ჩაიშლება.
"ვითხოვდით, რომ სხდომიდან გამოსულიყვნენ ძველი საკრებულოს წევრები, ბიუჯეტი უნდა მიიღოს ახალმა საკრებულომ და არა ძველმა. პოლიციელები ვერ გვიხსნიან რატომ გვიზღუდავენ შესვლის უფლებას ადმინისტრაციულ უწყებაში, სადაც სხდომები არის საჯარო და უნდა დავესწროთ. მოვინდომეთ შესვლა, მეტი უფლება აღარ დაგვრჩა. ვხედავთ როგორ იცავენ ისინი ბოროტებას, ჩვენ არ დავიშლებით და ეს სხდომა ჩაიშლება. ამ უკანონობას ახალისებს ბათუმის მერი არჩილ ჩიქოვანი, რომელმაც დაუყონებლივ უნდა დატოვოს თანამდებობა“, - აღნიშნა აქციის ერთ-ერთმა მონაწილემ.