შენობაში გაჩენილი ბზარების გამო, 161-ე სკოლის მოსწავლეების ნაწილი დისტანციურ რეჟიმზე გადადის - რა განცხადებას ავრცელებს სკოლის დირექცია?

"მშობლების მაღალი ინტერესიდან გამომდინარე გაცნობებთ, რომ სსიპ ქალაქ თბილისის N161 საჯარო სკოლის უფროსკლასელთა კორპუსის მე-3 სართულის ფლიგელის კედელზე დაფიქსირებული ბზარები შენობის მდგრადობისთვის საფრთხეს არ წარმოადგენს, თუმცა უსაფრთხოებიდან გამომდინარე მოსწავლეები დისტანციური სწავლების რეჟიმზე გადავლენ."- ამის შესახებ წერია 161-ესაჯარო სკოლის "ფეისბუქის" ოფიციალურ გვერდზე დირექციის მიერ გამოქვეყნებულ განცხადებაში.

სკოლის დირექციის ინფორმაციით, მოსწავლეების უსაფრთხოებიდან გამომდინარე, 161-ე საჯარო სკოლის უფროსკლასელთა კორპუსის მე-3 სართულის ფლიგელის კედელზე გამოვლენილი ხარვეზების გამოსასწორებელი სამუშაოების დასრულებამდე და სამხარაულის ექსპერტიზის დასკვნამდე იმ ფლიგელში განთავსებული კლასების მოსწავლეები, დისტანციური სწავლების რეჟიმზე გადავლენ.

"სსიპ ქალაქ თბილსისი N161 საჯარო სკოლის უფროსკლასელთა კორპუსის მე-3 სართულის ერთ-ერთ ფლიგელში გამოვლენილი ბზარების შესწავლის მიზნით, საქართველოს განათლებისა და მეცნიერების სამინისტროს სსიპ საგანმანათლებლო და სამეცნიერო ინფრასტრუქტურის განვითარების სააგენტომ კონსტრუქტორთა ჯგუფი მყისიერად მიავლინა ადგილზე. ექსპერტებმა შეისწავლეს კედელზე გაჩენილი ბზარები და დაადგინეს, რომ გაჩენილი ბზარები შენობის მდგრადობისთვის საფრთხეს არ წარმოადგენს. აღნიშნულ ვითარებასთან დაკავშირებით საგანმანათლებლო და სამეცნიერო ინფრასტრუქტურის განვითარების სააგენტო შესაბამის დასკვნას ამზადებს.თუმცა, მიუხედავად ამისა, საქართველოს განათლებისა და მეცნიერების სამინისტროს გადაწყვეტილებით, საკითხის შესწავლაში ასევე ჩაერთვებიან ლევან სამხარაულის ბიუროს ექსპერტები, რომლებიც დეტალურად შეისწავლიან არა მხოლოდ აღმოჩენილ ბზარებს, არამედ მთლიანად შენობის მდგრადობას და დადებენ შესაბამის დასკვნას." - ვკითხულობთ განცხადებაში.

ცნობისთვის, 30 ოქტომბერს, "ფეისბუქის" ერთ-ერთმა მომხმარებელმა, დაკო სუდაძემ გამოაქვეყნა ვიდეო, სადაც პოსტის ავტორის ცნობით, თბილისის 161-ე საჯარო სკოლის შენობაში არსებული ბზარებია ასახული.

"ეს ბზარები თბილისის ცენტრში, იოსებიძის ქუჩაზე, 161-ე საჯარო სკოლას აქვს, კომენტარი თქვენთვის მომინდვია, სანამ რამე უბადურება მოხდება, გამოჩნდეს მშველელი" - დაწერა სუდაძემ. (ნახეთ ვიდეო)