"გთხოვ, შეწყვიტე შიმშილობა... მოიკრიბე ძალა და ენერგია შემდგომი ბრძოლისათვის" - მიხელ სააკაშვილს მამა "ფეისბუქით" მიმართავს
პატიმრობაში მყოფი ექსპრეზიდენტის, მიხეილ სააკაშვილის მამა ნიკოლოზ სააკაშვილი შვილს მიმართავს, შიმშილობა შეწყვიტოს.
აღნიშნულთან დაკავშირებით ის პოსტს "ფეისბუქზე" ავრცელებს.
"სხვა საშუალება ჩემ შვილთან, მიშასთან კომუნიკაციისა მე ამ ეტაპზე არ გამაჩნია, იმედია სოციალური ქსელით მაინც გავაგონებ. მიშა!!!! მოგმართავ, როგორც ექიმი და მამა. საქმე ეხება შიმშილობას, რომელიც არაფერ კარგს არ მოუტანს შენს ჯანმრთელობას, მხოლოდ ავნებს. შენ დაუდექი ქვეყანას გვერდში და საჭიროა ხალხთან შენი ბოლომდე დგომა.
შემდგომი ენერგიული, შენებური, დაუღალავი მოქმედება. შიმშილობამ გარკვეულ ეტაპზე თავისი საქმე პროტესტისა გააკეთა. ეხლა კი საჭიროა ხალხთან ერთად შენი ენერგიის მობილიზება. იცოდე, შიმშილობა უკვე მტრის წისქვილზე ასხამს წყალს. გთხოვ შეწყვიტე ეს აქცია, მოიკრიბე ძალა და ენერგია შემდგომი ბრძოლისათვის. მიიღე გადაწყვეტილება. მალე შეხვედრამდე" - წერს ნიკოლოზ სააკაშვილი.
ცნობისთვის, ექსპრეზიდენტი მიხეილ სააკაშვილი სამართალდამცველებმა საქართველოში ჩამოსვლის შემდეგ, პირველ ოქტომბერს დააკავეს. საქართველოს მესამე პრეზიდენტი რუსთავის ციხეში იმყოფება და ის უკვე მეშვიდე დღეა შიმშილობს.