ლიეტუვის მთავრობა მოსახლეობას ჩინურ ტელეფონებზე უარის თქმისკენ მოუწოდებს - "მოიშორეთ იმდენად სწრაფად, რამდენადაც შესაძლებელია"

ლიეტუვის თავდაცვის სამინისტრო აფრთხილებს მოქალაქეებს, რომ უარი თქვან ჩინური წარმოების მობილურ ტელეფონებზე და თავი აარიდონ მათ ყიდვას. აღნიშნულის შესახებ შესაბამისი განცხადება თავდაცვის სამინისტრომ გაავრცელა.

როგორც BBC-ი წერს, გამოქვეყნდა ლიეტუვის კიბერუსაფრთხოების ეროვნული ცენტრის ანგარიში, რომლის მიხედვითაც, ჩატარდა კვლევა ჩინური მწარმოებლების 5G მხარდაჭერის მობილურ ტელეფონებზე და აღმოჩნდა, რომ Xiaomi-ს ტელეფონებს აქვთ ცენზურა კონკრეტულ ტერმინებზე და შესაბამისად, აქვთ სიტყვებისა, თუ ფრაზების კონტროლის ინსტრუმენტი, ხოლო Huawei-ს აქვს უსაფრთხოების ხარვეზები.

ჩვენი რეკომენდაციაა, რომ არ შეიძინოთ ახალი ჩინური ტელეფონები და მოიშოროთ ის ჩინური ტელეფონები, რომლებიც უკვე გაქვთ იმდენად სწრაფად, რამდენადაც შესაძლებელია, - აცხადებს ლიეტუვის თავდაცვის მინისტრის მოადგილე მარგარის აბუკევიციუსი.

• კონტროლი

"როგორც აღმოჩნდა, Xiaomi-ის 5G მხარდაჭერის ტელეფონს, Mi 10T-ს აქვს პროგრამული უზრუნველყოფა, რომელსაც შეუძლია აღმოაჩინოს და ცენზურა დააწესოს ისეთ ტერმინებზე, როგორებიცაა მაგალითად - "თავისუფალი ტიბეტი,“ "გაუმარჯოს ტაივანის დამოუკიდებლობას", ან "დემოკრატიულ მოძრაობას" - ნათქვამია კიბერუსაფრთხოების ეროვნული ცენტრის მოხსენებაში და ხაზგასმულია, რომ შესაძლოა, 449-ზე მეტი ტერმინი კონტროლდებოდეს ტელეფონის სისტემური პროგრამის მიერ.

როგორც BBC-ი წერს, ევროპაში ტელეფონის ეს შესაძლებლობები აღნიშნულ მოდელებზე გათიშული იყო, მაგრამ ანგარიშის მიხედვით, ცნობილი გახდა, რომ მისი აქტივაცია დისტანციურად ნებისმიერ დროს არის შესაძლებელი.

"Xiaomi-ის მოწყობოლობები არ აწესებენ ცენზურას კომუნიკაციაზე. კომპანიას არასოდეს შეუზღუდავს და დაუბლოკია ჩვენი სმარტფონის მომხმარებლის პირადი ქცევები, როგორებიცაა დარეკვა, რაიმის მოძებნა, დაწერა და ა.შ“, - ამბობს კომპანიის სპიკერი.

ამასთან, კვლევამ ასევე აჩვენა, რომ Xiaomi გადასცემდა ტელეფონიდან დაშიფრულ მონაცემებს სინგაპურის სერვერზე.

"ეს არა მხოლოდ ლიეტუვისთვისაა მნიშვნელოვანი, არამედ ყველა იმ ქვეყნისთვის, სადაც Xiaomi-ს მოწყობილობას იყნებენ“, - აცხადებენ კიბერუსაფრთხოების ეროვნულ ცენტრში.

• Huawei P40

ანგარიშში ასევე ხაგასმულია, რომ კიბერუსაფრთხოების ხარვეზი აქვს "ჰუავეის“ 5G მხარდაჭერის ტელეფონს, Huawei P40-ს. "ჰუავეის ოფიციალური აპლიკაციების მაღაზია, AppGallery მომხმარებელს ამისამართებს ელექტრონულ მაღაზიებში, სადაც ზოგიერთი "აპი" არის ვირუსების წყარო, შედეგად კი ტელეფონში არსებული მონაცემები გადაიცემა“, - ნათქვამია ლიეტუვის თავდაცვის სამინისტროსა და ეროვნული კიბერუსაფრთხოების ცენტრის განცხადებაში.

Huawei-ის სპიკერი BBC-სთან აცხადებს, რომ კომპანია იცავს იმ ქვეყნების კანონებსა და რეგულაციებს, სადაც ოპერირებს და კომპანიის პრიორიტეტი კიბერუსაფრთხოება და კონფიდენციალურობაა.

• რა უძღოდა წინ მოხსენების გამოქვეყნებას?

აღსანიშნავია, რომ ჩინეთსა და ლიეტუვას შორის ბოლო კვირებია დაძაბული ურთიერთობაა. აღნიშნული მოხსენება გამოქვეყნდა მას შემდეგ, რაც გასულ თვეში ჩინეთმა ლიეტუვას მოსთხოვა გაეწვია ქვეყნიდან თავისი ელჩი და განაცხადა, რომ გაიყვანდა ვილნიუსიდან თავის დესპანს.

დაძაბულობა კი მას შემდეგ დაიწყო, რაც ტაივანმა განაცხადა, რომ ლიეტუვაში ტაივანის წარმომადგენლობითი ოფისი გაიხსნებოდა. ევროპის სხვა ქვეყნებში და ასევე აშშ-ში ტაივანის საელჩოს დასასახელებლად იყენებენ არა სიტყვა ტაივანს, არამედ ქვეყნის დედაქალაქის სახელს, ტაიბეის.

ასე თავს არიდებენ ქვეყნის დასახელებას - მიზეზი კი ისაა, რომ ჩინეთი ტაივანს საკუთარ ტერიტორიას უწოდებს.