"უნდა ვაჩვენოთ, რომ ამას არ ვეგუებით! დაინახოს მთელმა მსოფლიოს, რომ საქართველოში ხელისუფლება ხოცავს ჟურნალისტებს!" - რას წერს ვახო სანაია

"ტვ პირველის" ჟურნალისტი ვახო სანაია დღეს საღამოს 6 საათზე მედიის წარმომადგენლებს რუსთაველზე გასვლისკენ მოუწოდებს.

"ყველა ჟურნალისტსა და ოპერატორს! მოიტანეთ თქვენი კამერები და მიკროფონები დღეს 6 საათზე რუსთაველზე და დავაწყოთ მიწაზე. დაინახოს მთელმა მსოფლიოს, რომ საქართველოში ხელისუფლება ხოცავს ჟურნალისტებს! ლექსოსთვის!"

"18:00 ყველანი პარლამენტთან! დაპლუსდით, ვინც მოდიხართ! მნიშვნელოვანია, რომ ბევრნი ვიყოთ, უნდა ვაჩვენოთ, რომ ამას არ ვეგუებით"

ცნობისთვის, საქართველოს პარლამენტთან "ტვ პირველის" ოპერატორის ლექსო ლაშქარავას გარდაცვალების ფაქტთან დაკავშირებით აქცია - "გადადგეს მკვლელი მთავრობა" დაანონსდა. აქცია 18:00 საათზე დაიწყება.

აქციის ორგანიზატორების ინფორმაციით, მათ მოთხოვნებია: ირაკლი ღარიბაშვილის მთავრობის დაუყოვნებლივ გადადგომა; მომხდარის დამოუკიდებელი ექსპერტებით გამოძიება; ყველა იმ მოძალადის დაკავება და კანონის სრული სიმკაცრით დასჯა, რომლებიც ლექსო ლაშქარავას დაესხნენ თავს, ასევე, ძალადობრივი აქციის ორგანიზატორების პასუხისმგებლობაში მიცემას.

„ტვ პირველის“ ოპერატორი ლექსო ლაშქარავა საკუთარ სახლში გარდაცვლილი იპოვეს. ლექსო ლაშქარავას გარდაცვალების ფაქტზე გამოძიება საქართველოს სისხლის სამართლის კოდექსის 115 მუხლით დაიწყო. შსს-ს ინფორმაციით, მიმდინარე წლის 5 ივლისს, თბილისი პრაიდის წინააღმდეგ გამართული აქციის გაშუქების დროს, ინგოროყვას ქუჩაზე მდებარე ორგანიზაცია „სირცხვილიას“ ოფისში, ტელეკომპანია „ტვ 1“-ის ჟურნალისტსა და ოპერატორს, ალექსანდრე ლაშქარავას სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენეს. ჟურნალისტის პროფესიულ საქმიანობაში ძალადობის მუქარით უკანონოდ ხელის შეშლის, ძალადობითა და ძალადობის მუქარით დევნის, ჯგუფური ძალადობის ფაქტებზე გამოძიება მიმდინარეობს და დაკავებულია 4 პირი.