"პაკას" პირდაპირ აქვს ნათქვამი ბარცბასთვის, რომ ქართველებს შენი გაგორება არ გაუჭირდებათო" - აფხაზეთში "კრიმინალური ავტორიტეტების" დაკავებების სერია დაიწყო

ოკუპირებული აფხაზეთის ე.წ. ხელმძღვანელობამ, საკურორტო სეზონთან დაკავშირებით ე.წ. კრიმინალური ავტორიტეტების დაკავებების სერია დაიწყო. "პრეზიდენტ" ასლან ბჟანიას ცნობით, გაგრა და ბიჭვინთა მან პირად კონტროლზე აიყვანა. ადგილობრივების თქმით, არც სოხუმშია უკეთესი ვითარება, თუმცა ზღვის სეზონზე ის კრიმინალები აქტიურობენ, ვისაც საკურორტო ქალაქებში გავლენები და წილები აქვთ.

"ხელმძღვანელობა ცდილობს, ბიზნესი კანონმდებლობასთან შესაბამისობაში მოიყვანოს, რასაც ვერ ეგუებიან კრიმინალები, რადგან ტურიზმის შემოსავლის ჩარჩოში მოქცევა ნიშნავს, მის ადგილობრივი სომხებისთვის გადაცემას, რადგან ამ ორ ქალაქში ბიზნესი, ფაქტობრივად, მათ ხელშია..." - წერენ ადგილობრივები.

რამდენიმე დღის წინ, "პროფილაქტიკის მიზნით" აფხაზეთის ე.წ. შ.ს. სამინისტროს თანამშრომლებმა გაგრაში, ორი ე.წ. კანონიერი ქურდი სტანისლავ წიშბა, იგივე პაკა და გაგრის რაიონის სოფელ ლიძავას მცხოვრები ე.წ. კრიმინალური სამყაროს წევრი რენად ხიშბა დააკავეს...

ადგილობრივების თქმით, ერთ-ერთი ვერსიით, ეს დაკავებები, ხელმძღვანელობის მხრიდან ერთგვარ ანგარიშსწორებას წააგავს, რადგან ანქვაბი-ბჟანიას გუნდმა ისინი ვერანაირ შეთანხმებაზე ვერ დაიყოლიეს. ისინი რეგიონიდან მშვიდობიანად გასვლის სანაცვლოდ, არცერთ შეთავაზებას არ დასთანხმდნენ.

სხვების მოსაზრებით, აფხაზეთის ე.წ. ხელმძღვანელობა, ყველა გზით ცდილობს, ე.წ. კრიმინალური სამყაროს წევრების გავლენები როგორმე შეამციროს, თუმცა მათ ინიციატივას უამრავი მოწინააღმდეგე ჰყავს.

"ადგილობრივების ნაწილს ურჩევნია, რეგიონში ტურიზმსა და სხვა ბიზნეს-შემოსავლებს ისევ კრიმინალები და მათ დაქვემდებარებაში მყოფი პირები მართავდნენ, ვიდრე "ხელისუფლებამ იქაურობა რუსეთიდან შემოტანილ, გაურკვეველი წარსულის მქონე რუს და სომეხ ბიზნესმენებს ჩააბაროს, გარკვეული ფინანსური ინტერესების სანაცვლოდ, რომლის უდიდეს ნაწილს ჯიბეში ჩაიდებენ..." - წერს ბოატ არისთავა.

"ორივე მართგანს სამკვდრო-სასიცოცხლო ომი აქვს რაულ ბარცბასთან, იგივე "პიზასთან". "პაკას" პირდაპირ აქვს ნათქვამი მისთვის, რომ ქართველებს, მთელ ყოფილ საბჭოთა კავშირში წამყვანი პოზიციები აქვთ და შენი გაგორებაც არ გაუჭირდებათო. ეტყობა, ჯერ შესაფერისი დრო არ დამდგარა... მათი დაკავება გაფრთხილებაა "პიზასთვის", იფიქროს აფხაზეთიდან წასვლაზე... შესაძლოა, სხვა ვერსიაც იყოს, პოლიტიკა და კრიმინალი საბოლოოდ ერთ ტალღაზე არიან და ქართული "კლანის" ამოძირკვას ცდილობენ" - მიაჩნია ადგილობრივ ინტერნეტმომხმარებელ "ლუკა გუჩის".

ekhokavkaza.com-ის ბლოგერის, იზიდა ჭანიას ცნობით, აფხაზეთში ყველამ იცის, რომ კრიმინალი და "ხელმძღვანელობა" გვერდიგვერდ მიაბიჯებენ. მისივე თქმით, ისინი ვინც ახლა "მთავრობაშია", კანონიერ ქურდებსა და კრიმინალური სამყაროს გავლენიან პირებთან ერთად იზრდებოდნენ და ბავშვობიდან ერთად მოდიან.

"აქ ყველა ერთამენთს იცნობს, ამიტომ "კანონიერი ქურდებისთვის" ძალიან მნიშვნელოვანია, არ უღალატონ ალღოს და სწორად გადაწყვიტონ, ვის უნდა გაამარჯვებინონ ამა თუ იმ არჩევნებში... თუმცა, ზოგჯერ არის, რომ ერთმანეთს იმედებს უცრუებენ და ამ დროს იწყება დაპირისპირება, რაც სხვადასხვანაირად არის გამოხატული - დაუმორჩილებელ კრიმინალებს ხან გადაჭარბებული სიჩქარის, საჭესთან ალკოჰოლის ან ნარკოტიკული ნივთიერების ქვეშ მართვის გამო აკავებენ და იწყება შურისძიება..." - წერს ჟურნალისტი.