რონალდუ მაგიდასთან კოკა-კოლას დანახვამ გაანაწყენა და ის წყლით ჩაანაცვლა - პორტუგალიელი ფეხბურთელის ქმედება ინტერნეტჰიტად იქცა

პორტუგალიელმა ფეხბურთელმა კრიშტიანუ რონალდუმ ევროპის ჩემპიონატის ფარგლებში წინასამატჩო პრესკონფერენცია გამართა, რა დროსაც მას მაგიდაზე ჩემპიონატის ერთ-ერთი სპონსორის, კოკა-კოლას ბოთლები დახვდა.

რონალდუ აღნიშნული ფაქტით დიდად მოხიბლული არ დარჩა და კოკა-კოლას ბოთლები მისგან და კამერებისგან შორს მოათავსა. კოკა-კოლას ნაცვლად კი მაგიდაზე წყლის ბოთლი დადგა და შეკრებილ ჟურნალისტებსაც მოუწოდა, რომ წყალი დალიონ.

ყველასთვის ცნობილია, რომ პორტუგალიელი ფეხბურთელი გამოირჩევა თავისი ექსტრაპროფესიონალიზმით, მუდამ პროპაგანდას უწევს ცხოვრების ჯანსაღ წესს, ჯანსაღ კვებას და არაერთხელ აღუნიშნავს, რომ კოკა-კოლა და მსგავსი სასმელები, ასევე ჩიფსები მავნებელია ჯანმრთელობისთვის.

გარდა ამისა, ცნობილია, რომ ის შვილებსაც არ აჭმევს ასეთ საკვებს და ხანდახან, როცა ბავშვები მაინც მიირთმევენ, ეს რონალდუს ძალიან აბრაზებს.