"ნესტიანი კედლები, უჰაერო სივრცე და ფანჯარა, საიდანაც სხივი არადროს შემოდის" - როგორი იყო საბჭოთა პერიოდის საპატიმრო თბილისის ცენტრში - დავით თაბაგარის ფოტოები

ფოტოგრაფი დავით თაბაგარი "ფეისბუქში" საბჭოთა პერიოდის საპატიმროს ფოტოებს აქვეყნებს:

"90 წლის წინანდელი, უძველესი საბჭოთა საპატიმრო თბილისის ცენტრში. თბილისის შუაგულში ერთ-ერთი ისტორიული სასტუმროს ქვეშ შემონახულია წინასწარი დაკავების იზოლატორი. 1800-იან წლებში ამ სასტუმროს დიდი რესტორანი ჰქონია და იმ რესტორნის ღვინის საცავები იყო განთავსებული. კომუნისტების მოსვლის შემდეგ მილიციის სამმართველოდ გადაუკეთებიათ, საცავებში საკნები მოაწყვეს.

ფოტოებს თუ დააკვირდებით, ნახავთ სახელებს და წლებს, რომლებიც პატიმრებს ეკუთვნით. დიდია ალბათობა ეს პატიმრები დახვრეტილებიც იყვნენ ცნობილი დიდი ტერორის პერიოდში 1937-1938 წლებში. არსებული ინფორმაციით, აქ საპატიმრო 30-იან წლებში გაჩნდა, არის წარწერები რომლებიც 1950 წელს არის დაწერილი.

ეს ადგილი ზუსტად გადმოცემს საბჭოთა კავშირის სიბოროტეს და დამოკიდებულებას ხალხის მიმართ. ნესტიანი კედლები უჰაერო სივრცე, ფანჯარა, რომელშიც სხივი არასოდეს შემოდის, ზუსტად მსგავს პირობებში იყვნენ სრულიად უდანაშაულო ადამიანები, ვინც წითელ ტერორს ემსხვერპლა ამ პერიოდში.

ასეთივე სისტემის იყო ორთაჭალის ციხე, რომელშიც ხდებოდა ხალხის დახვრეტა", - წერს დავით თაბაგარი.