"ივანიშვილმა იმიტომაც გამოაქვეყნა ეს წერილი ალბათ, შიგნით შეაწუხეს ძალიან" - რას აჩვენებს ივანიშვილის მიერ გახარიას კრიტიკა?

დღეს დილით გავრცელდა ბიძინა ივანიშვილის წერილი, რომლითაც ის გახარიასთან პოლიტიკურ კავშირს გამორიცხავს და მის გადადგომას აფასებს. მისი თქმით, გახარიამ გუნდს უღალატა. "როდესაც უმაღლესი რანგის თანამდებობის პირი კანონის უზენაესობის წინააღმდეგ გამოდის და ამ საბაბით თანამდებობას ტოვებს, ამაზე დიდი პოლიტიკური დანაშაული ძნელი წარმოსადგენია. მინდა მწუხარებით აღვნიშნო, რომ ამ ყველაფერმა ჩემი მძიმე იმედგაცრუება გამოიწვია. ამ ყველაფრის ლოგიკური გაგრძელება იყო გიორგი გახარიას მიერ პოლიტიკური პარტიის დაფუძნება. მის პარტიას არა აქვს არავითარი იდეოლოგიური თუ კონცეპტუალური საფუძველი და იგი, აშკარად, მოაზრებულია როგორც სიტუაციური ინსტრუმენტი მმართველი გუნდისთვის საარჩევნო ხმების თუნდაც მცირე რაოდენობის წასართმევად", - ვკითხულობთ ივანიშვილის განცხადებაში.

დღესვე გიორგი გახარიამ საპასუხო პოსტი გამოაქვეყნა "ფეისბუკის“ ოფიციალურ გვერდზე, სადაც ის წერს, რომ "სიმართლეს ვერავინ და ვერაფერი შეაჩერებს. საბოლოო ჯამში, ამას ყველა გაიგებს. ისევ ჭორაობის გარეშე, ვერთიანდებით საქართველოსთვის, არავის წინააღმდეგ!" - წერს გახარია.

"ეს არის ჩვეულებრივი ტყუილ-მართლით გაზავებული ყალბი პათეტიკა და მეტი არაფერი." - ასევ აფასებს პოლიტოლოგი გია ხუხაშვილი ივანიშვილის განცხადებას."

აქ სამი ძირითადი მომენტი შემიძლია შევაფასო: გახარია მისი, ბიძინა ივანიშვილის პროექტი რომ არ არის, ამის დეკლარირებას დავეთანხმებოდი - მას კარგად ვიცნობ და სიმართლე თქვა, ივანიშვილი ამ თამაშებით ნამდვილად არ დაკავდებოდა, არაა მისი სტილი. რაც შეეხება იმას, რომ ის წავიდა პოლიტიკიდან, ესაა ტყუილი და მესამე - თქვა, რომ მელიას იმ დღეს აყვანა ეს იყო კანონის უზენაესობის ინტერესებიდან გამომდინარე ქმედებაო, რაც არის ცინიზმი ადამიანისგან, რომელმაც ყველაფერი გააკეთა იმისთვის, რომ პოლიტიკურ მართლმსაჯულებაში შემჩნეული მოსამართლეები ჩაებეტონებინა სასამართლოში და ამ ადამიანს კანონის უზენაესობაზე საუბრის მორალური უფლება არ აქვს.

"ქართული ოცნების“ მიერ აგორებულ კამპანიას რაც ეხება, თითქოს გახარია იმიტომ გადადგა, "ნაციონალები" გადატრიალებას აწყობდნენ და ამას შეუწყო ხელიო, ეს არის დიდი სისულელე, რაზეც კომენტარს ვერ გავაკეთებ“.

რაც შეეხება გახარიას გამოხმაურებას ბიძინა ივანიშვილის წერილზე, პოლიტოლოგი ასე აფასებს:

"გახარია ძალიან სწორად გამოეხმაურა ბიძინა ივანიშვილს, არ უნდა აჰყვეს მას თამაშში, ჭკვიანურად იქცევა. ივანიშვილმაც იმიტომ გამოაქვეყნა ეს წერილი, ალბათ შიგნით შეაწუხეს ძალიან - ბატონო ბიძინა, ჰაი და ჰუი, შეუჩიჩხინეს და ამიტომ გააკეთა ეს განცხადება“.

ექსპერტ ვახტანგ ძაბირაძის თქმით, ივანიშვილის განცხადებამ აჩვენა, რომ ის არ წასულა პოლიტიკიდან.

"ივანიშვილის მტკიცება, რომ საბოლოოდ წავიდა პოლიტიკიდან, არ აღმოჩნდა მთლად ზუსტი იმიტომ, რომ როგორც კი კრიტიკული და კრიზისული სიტუაცია შეიქნა პარტიის შიგნით, ის იმავე წუთში გამოვიდა ასპარეზზე. როგორც ჩანს, "ქართულ ოცნებაში“ ზუსტად იციან გახარიას წონისა და რეიტინგის შესახებ. მათ აქვთ თავიანთი გამოკითხვები და შიდა აუდიტიც ეყოლებათ, რომელიც ამ გავლენებს სწავლობს, გარდა იმისა, რომ რეგიონებში აქა-იქ ტოვებენ "ქართული ოცნების“ რიგებს და გახარიასთან გადადიან.

ეს ქმნის იმის წინაპირობას, რომ შემდგომში საკმაოდ ძლიერი და ორგანიზაციულად შეკრული გუნდი ჩამოუყალიბდეს გახარიას. ამას თუ იმასაც დავუმატებთ, რომ საკრებულოში "ქართული ოცნებიდან“ ბევრი ვერ მოხვდება, ახალი ხალხი იქნება, ამიტომ "ოცნებაზე“ განაწყენებულები საკმაოდ იქნებიან და ისინი გახარიასკენ გადაინაცვლებენ. როგორც ჩანს, "ოცნებას“ ამ პროცესის შეეშინდა - 43%, თავისთავად, ძალიან მნიშვნელოვანია და ყოველივე ამან აიძულა ივანიშვილი ჩართულიყო პროცესებში და საზოგადოებრივ ასპარეზზე დაბრუნებულიყო. მის განცხადებაში არის ორი მნიშვნელოვანი მომენტი: 1. ივანიშვილმა გახარია აკურთხა როგორც ოპოზიციონერი, ამიტომ მისადმი კითხვები უკვე ძნელად გაჩნდება. ივანიშვილმა გახარია, გარდა პარტიის ღალატისა, ლამის სამშობლოს ღალატში დაადანაშაულა, კაცს მეტი რა უნდა დააბრალო? ანუ მან მოხსნა კითხვა, ოპოზიციონერია თუ არა გახარია და 2.

გახარიას ელექტორატი ორი ძირითადი ნაწილისგან შედგება - ის, ვინც "ქართულ ოცნებასთან“ მერყეობს, ვერ გადაუწყვეტია, დარჩეს თუ არა მომხრე, რადგან ვერ უპოვია შესაფერისი ძალა. ამიტომაა ამ ამომრჩევლის დამაგრება ისევ "ქართულ ოცნებაზე“, რომლებიც ფიქრობენ, რომ გახარია შესაძლოა, იყოს ივანიშვილის პროექტი. ამ განცხადებით ივანიშვილი შეეცადა ეს ამომრჩეველი "ქართული ოცნების“ ორბიტაზე დაეტოვებინა. მეორე ნაკადი - 0-დან 5%-მდე პარტიის ამომრჩეველია (ის "ოცნების“ ამომრჩეველი იყო თავის დროზე) 2016-ში, მაგრამ ახლა გულაცრუებულია როგორც "ოცნებაზე“, ისე ივანიშვილზე. ამ ამომრჩევლიდან ნაწილი ალბათ გახარიას დაუბრუნდება, რადგან ჩათვლის, რომ გახარია არის ის ფიგურა, რომელიც შეძლებს ივანიშვილის დამარცხებას. ეს ამომრჩეველი ცოტა გულაცრუებულია სწორედ ამ წვრილ პარტიებზე, განსაკუთრებით მას შემდეგ, რაც ექვსთვიან პერიოდში ეს პარტიები ნებსით, თუ უნებლიედ, "ნაციონალებთან“ ერთად ერთ ქვაბში აღმოჩნდნენ. ნაწილი მათი ამომრჩევლისა, უეჭველი წავა გახარიასკენ.

ივანიშვილის განცხადებამ, რა თქმა უნდა, ელექტორალურად დააზარალა გახარია, მაგრამ დააზარალა "ქართული ოცნების“ ამომრჩევლიდან და არა იმ ამომრჩევლიდან, რომლებმაც სხვა პარტიებს მისცა ხმა. გულწრფელად გითხრათ, ეს სცენარი ძალიან ჰგავს იმ სცენარს, რაც 2001-03 წლებში განხორციელდა - მაშინაც ეს სცენარი იყო, შევარდნაძე უნდა ჩაენაცვლებინა მასთან რადიკალურად დაპირისპირებულ გუნდს და ეს აღმოჩნდა სააკაშვილის გუნდი. ველოდები, რომ ეს სცენარი განვითარდება, ოღონდ, დგილობრივი არჩევნების შემდეგ, მიუხედავად იმისა, მიიღებს თუ არა "ოცნება“ 43%-ს. გახარია მანამდე იქნება ზომიერი, ისეთივე, როგორი განცხადებაც დღეს გააკეთა, ჭორაობას არ დავიწყებო. ის ამ ნიშას დაიჭერს ადგილობრივ არჩევნებზე და ამის მერე გახდება უფრო რადიკალური, მიუხედავად იმისა, 43%-ს აიღებს თუ არა "ოცნება“ - თუ ვერ აიღებს, გახარია მკვეთრად რადიკალური გახდება მის მიმართ, თუ აიღებს - ზომიერად რადიკალური“.