მამუკა ხაზარაძე გიორგი გახარიას პარტიაზე - ეს არის "ქართული ოცნება 2"

ცოტა ცინიკურია, როცა პარტიის პირველი ნომერი იყავი და დღეს აკრიტიკებ, რომ თურმე ქვეყანაში კორუფცია და ნეპოტიზმი არის - ეს არის "ქართული ოცნება 2“ , - ამის შესახებ "ლელოს" ლიდერმა მამუკა ხაზარაძემ განაცხადა, რითაც ყოფილი პრემიერის გიორგი გახარიას პოლიტიკაში დაბრუნება და მისი პარტიის პრეზენტაცია შეაფასა.

ხაზარაძემ აღნიშნა, რომ ნებისმიერი პოლიტიკოსის პოლიტიკურ მომავალს ამომრჩეველი განსაზღვრას.

"რაც შეეხება ჩემ შეფასებას, ეს არის "ქართული ოცნება 2“ . ცოტა ცინიკურია, როცა პარტიის, რომლის პრემიერიც, ეკონომიკის მინისტრიც, ომბუდსმენიც, შინაგან საქმეთა მინისტრი ხარ და ასევე ორი-სამი თვის წინათაც, პირველი ნომერი იყავი და დღეს აკრიტიკებ, რომ თურმე ქვეყანაში კორუფცია და ნეპოტიზმია. ვფიქრობ, რომ იგი არის ამ სისტემის ნაწილი და ასევე პასუხისმგებელი იმ დანაშაულებრივ კორუფციულ გარიგებებზე და ბევრი პრობლემის შექმნაზე, რომელიც ამ ქვეყანას შეექმნა. ამიტომ ნამდვილად არ მინდა, რომ ჩვენი საზოგადოება კიდევ ერთხელ შეცდომაში შევიდეს. თუ ეს სისტემა არ გავისტუმრეთ, რომელმაც ეს ქვეყანა გააჩერა და პრაქტიკულად მიიყვანა უკიდურეს მდგომარეობამდე, ამ ქვეყანას სერიოზული მომავალი არ ექნება", - განაცხადა ხაზარაძემ.

პარტიის მეორე ლიდერის, ბადრი ჯაფარიძის განცხადებით კი, "გახარიას პოლიტიკურ ველზე შემოყვანა ერთ მიზანს ემსახურება, შექმნას ალტერნატივა „ქართული ოცნებისთვის“ და როგორმე არ დაკარგოს „ქართული ოცნების“ ამომრჩეველი".

მისივე თქმით, ამ ეტაპზე თანმიმდევრული ოპოზიციური პარტიების ამოცანაა, რომ ქვეყანაში დამკვიდრებული არსებული ვითარება საკუთარი შედეგით „გადატეხონ“.

„ჩვენ ახლა კონცენტრირებული ვართ არა გახარიას პოლიტიკაში შემოსვლაზე, რომელიც, ჩვენი აზრით, მორიგი მცდელობაა ბიძინა ივანიშვილის მხრიდან, რომ როგორმე იმ ელექტორატის შენარჩუნება მოახერხოს, რომელიც „ქართულმა ოცნებამ“ დაკარგა. ჩვენი ამოცანაა, უკვე პარლამენტიდან მოვახერხოთ ბრძოლა უმძიმეს გამოწვევებთან, რომელსაც ქვეყანა ეჯახება. ამ გამოწვევების ერთ-ერთი შემოქმედი გახარიაა, ამიტომ ჩვენი ამოცანა ახლა კონცენტრირებაა იმ უმწვავესი პრობლემის გადაჭრაზე, რომელსაც ჩვენი თანამოქალაქეები ყოველდღიურად ეჯახებიან, ესაა: პანდემია, ეკონომიკურ-სოციალური პრობლემები, გარე გამოწვევები, ქვეყანას უამრავი გამოწვევა აქვს.

გახარიას პოლიტიკურ ველზე შემოყვანა ერთ მიზანს ემსახურება, შექმნას ალტერნატივა „ქართული ოცნებისთვის“ და როგორმე არ დაკარგოს „ქართული ოცნების“ ამომრჩეველი. ჩვენი ამოცანაა თანმიმდევრული ოპოზიციური პარტიების, რომ გადავტეხოთ ჩვენი შედეგით არსებული ვითარება, რომელიც ქვეყანაშია დამკვიდრებული“, - განაცხადა ჯაფარიძემ.