"რაღაც მომენტში მივხვდი, რომ დედამთილის მეშინოდა..." - რა განუცხადა ნიკოლოზ ბასილაშვილის ექსმეუღლემ ფსიქოლოგს?
ლევან სამხარაულის სახელობის ექსპერტიზის ეროვნული ბიუროს ფსიქოლოგის, მარინა მათიაშვილის განცხადებით, ბრალდებული ჩოგბურთელის, ნიკოლოზ ბასილაშვილის ყოფილი მეუღლის, ნელი (ნეკა) დოროყაშვილის ფსიქო-ემოციური მდგომარეობის კვლევისას მისი მდგომარეობა ფსიქოლოგიურ ტანჯვად შეფასდა. აღნიშნულის შესახებ მათიაშვილმა სასამართლო პროცესზე განაცხადა, სადაც მოწმის სახით ჩვენებას აძლევდა.
ფსიქოლოგმა სასამართლოში ნელი დოროყაშვილის მიერ გაცხადებული ინფორმაცია გაახმაურა, რომელიც დაზარალებულმა მას ექსპერიმენტულ-ფსიქოლოგიური კვლევის დროს მიაწოდა. აღნიშნულის მიხედვით, ნელი დოროყაშვილი ფსიქოლოგს უყვება, რომ მისი და ნიკოლოზ ბასილაშვილის ცხოვრებაში დედამთილი აქტუალური იყო.
ფსიქოლოგის თქმით, ნელი დოროყაშვილი მას შემდეგს მოუყვა:
"პირველივე თვეებიდან მივხვდი, რომ რაღაც გაუგებრობაში ვიყავი. დედამთილთან თავიდან კარგი ურთიერთობა მქონდა, თითქმის მეგობრული... მივხვდი, რომ ჩემი პიროვნული მიუღებლობა ჰქონდა, ჩემი ყველაფრისგან განრიდება ხდებოდა და ნიკას განრიდება ჩემგან. ფეხმძიმობის პერიოდში ხშირი იყო მეგობრული შეგონებები - მშობიარობის შემდეგ ქალის ფსიქიკა ლაბირულია და ხშირად გიჟდებიანო. ეს გამონათქვამები კონკრეტულად მე მეხებოდა - მშობიარობის შემდეგ, ქალის ფსიქიკა ლაბირულია და დიდი ალბათობაა გაგიჟდე. ბოლოს, სრულიად კატეგორიული ფორმა მიიღო - გიჟი ხარ. რაღაც მომენტში მივხვდი, რომ დედამთილის მეშინოდა, მაგრამ თავაზიანად ვიქცეოდი. ბავშვი მცირეწონიანი დაიბადა, მაგრამ ჯანმრთელი. ამაზე მსაყვედურობდა - შენ ისიც გეყოფა, უდღეური ბავშვი რომ გააჩინე, ვერსად ვერ ვამბობ ამასო. რომ შევეპასუხე, უზრდელი ხარო. ეს ყველაფერი ჩემი და ნიკას ურთიერთობაზე აისახა. 2016 წლიდან ძალადობის ფორმები დამძიმდა, 2017 წლიდან ძალიან აგრესიული სახე მიიღო".
ნელი დოროყაშვილის ადვოკატის, ანა თავხელიძის განცხადებით, ბავშვის ფსიქოლოგის მიერ მიცემული ჩვენებით კიდევ ერთხელ დადასტურდა ნიკოლოზ ბასილაშვილის მხრიდან ძალადობის ბრალდების საფუძვლიანობა.
მისივე თქმით, ნელი დოროყაშვილმა გამოძიებას დეტალური ინფორმაცია მიაწოდა.
"ჩვენთვის დაზარალებულების ადვოკატისთვის გაუგებარია, რატომ იყო ეს გასაოცარი დაცვის მხარისთვის, რადგან ფსიქოლოგებმა ისაუბრეს ზუსტად იმ ინფორმაციაზე, რაც მათ გამოძიების ეტაპზე ექსპერტიზის და ცნობის სახით გასცეს. ბავშვის ფსიქოლოგის ნაწილში შეგნებულად ვერ ვისაუბრებ იცით, რომ სხდომა დახურული იყო და რა თქმა უნდა, ბავშვის საუკეთესო ინტერესია, რომ მასთან დაკავშირებული დეტალური ინფორმაცია საჯარო არ გახდეს.
ერთადერთი შემიძლია ვთქვა,რომ ბავშვის ფსიქოლოგის მიერ მიცემული ჩვენებით კიდევ ერთხელ დადასტურდა ის, რაც მან გამოძიებაში რეკომენდაციის, ცნობის სახით გასცა და ამავდროულად ბრალდების საფუძვლიანობა, რაც წარდგენილი აქვს ნიკოლოზ ბასილაშვილს კიდევ უფრო გაამყარა. რაც შეეხება, მეორე ფსიქოლოგს, რომელმაც შეაფასა ნელი დოროყაშვილის ფსიქო-ემოციური მდგომარეობა, მან დაადასტურა ის, რაც ექსპერტიზის დასკვნაში უწერია - ნელი დოროყაშვილი სისტემატიური ფსიქოლოგიური ძალადობის შედეგად, რომელიც ნიკოლოზ ბასილაშვილის მხიდან იყო განხორციელებული განიცდიდა ფსიქოლოგიურ ტანჯვას, რაც არის მთავარი მტკიცებულება", - განაცხადა თავხელიძემ.