რესპუბლიკის მოედანზე, სადაც "რიონის ხეობის მცველები“ იმყოფებიან, აქციის მონაწილეებს შორის სიტყვიერი დაპირისპირება მოხდა - ვინ ვის დაუპირისპირდა?

რესპუბლიკის მოედანზე, სადაც "რიონის ხეობის მცველები“ იმყოფებიან, "ქართული მარშის" წარმომადგენელ ალექსანდრე ფალავანდიშვილსა და "სირცხვილიას" აქტივისტ ზურა ბერძენიშვილს შორის სიტყვიერი დაპირისპირება მოხდა.

ფალავანდიშვილი მოითხოვდა, რომ ზურა ბერძენიშვილს ტერიტორია დაეტოვებინა იმ მიზეზით, რომ "ის ადგილზე ლგბტ თემის სიმბოლიკებით მივიდა“. თავად ზურა ბერძენიშვილის განმარტებით, მას არანაირი სიმბოლიკა არ ჰქონია და ფალავანდიშვილის გაღიზიანება სავარაუდოდ, გამოიწვია იმან, რომ მასთან მყოფ გოგონას მკლავზე ფერადი სამკლაური ეკეთა. ზურა ბერძენიშვილის განმარტებით, იმ მიზეზით, რომ ადგილზე ვითარება არ დაიძაბოს, ტერიტორიას გაერიდება.

"აქციაზე მოვედი და დავდექი, რაღაც სისულელეებს მაბრალებენ. დეესკალაციის მიზნით, რა თქმა უნდა, გავერიდები ტერიტორიას", - აცხადებს ბერძენიშვილი.

დაპირისპირებულ მხარეებთან ადგილზე პოლიცია მივიდა, რომელმაც ბერძენიშვილი და მისი თანმხლები პირები ადგილიდან გაიყვანა.