"რას ნიშნავს ქალაქის პარალიზება?.. საზოგადოება რადიკალიზმით დაიღალა! ხალხს ყველაზე მეტად არეულობა აფრთხობს" - რას ამბობენ ექსპერტები "რიონის ხეობის მცველების" რადიკალურ განცხადებებზე?

23 მაისს "ნამოხვანჰესის" მშენებლობის მოწინააღმდეგეებმა მორიგი საპროტესტო აქცია თბილისში ჩაატარეს. ხალხმრავალ შეკრებაზე რამდენიმე მოთხოვნა გაისმა. მათ შორის - კომპანია "ენკამ" დატოვოს რიონის ხეობა და ამ კომპანიასთან ხელშეკრულება გაუქმდეს. როგორც აქციის ორგანიზატორმა ვარლამ გოლეთიანმა განაცხადა, მათი ერთ-ერთი მოთხოვნით, ენერგოსექტორში მორატორიუმი უნდა გამოცხადდეს. "ნამოხვანჰესთან" დაკავშირებით ხელისუფლებასთან დიალოგის რესურსი ამოწურულია. უკვე დასრულდა იმის შესაძლებლობა, რომ ჩვენ მათთან დავმსხდარიყავით და ეს მოჩვენებითი დიალოგები გაგვემართა. ამიტომ ჩვენი მოთხოვნები არის მკაფიო", - განაცხადა გოლეთიანმა. ამ მოთხოვნების დასაკმაყოფილებლად მათ ხელისუფლებას 24 მაისის 12 საათამდე მისცეს დრო. აღსანიშნავია, რომ "რიონის მცველები" ამ აქციაზე იმაზე მეტად რადიკალური განცხადებები გააკეთეს, ვიდრე ეს მოსალოდნელი იყო. მათ რესპუბლიკის მოედანზე კარვები გაშალეს და ღამეც იქ გაათენეს. "ჩვენ ჩავალთ ყველგან და სისტემურ მუშაობას დავიწყებთ. ეს შეარყევს სისტემას და ძვირად დაუჯდება ხელისუფლებას. გადაწყვეტილება მათზეა. ჩვენ სახალხო პრობლემებზე და წუხილების სადარაჯოზე ვიქნებით სულ. ჩვენ უნდა დავინახოთ ამ ლოკალურ პრობლემაში სისტემის სისტემური სახე. 24 მაისის 12:00 საათამდე ეძლევა ხელისუფლებას დრო ჩვენი მოთხოვნების დასაკმაყოფილებლად, წამმზომი ჩაირთო. ჩვენ აქ დავრჩებით ყველა იქამდე ვიდრე არ შესრულდება ჩვენი მოთხოვნები. თუ ხვალ, 12:00 საათამდე არ იქნება პასუხი, ჩვენ მოვახდენთ დედაქალაქის პარალიზებას მთლიანად, ვერავინ ვერ შეძლებს გადაადგილებას“, - განაცხადა გოლეთიანმა. ექსპერტთა ნაწილი პროტესტანტთა რიტორიკის ასეთ რადიკალიზაციას არასწორად მიიჩნევს. გაზეთ "კვირის პალიტრასთან" ექსპერტმა ვახტანგ ძაბირაძემ განაცხადა:

"თბილისში ჩატარებულ აქციაზე გახმაურებულ მოთხოვნებში ახალი ბევრი არაფერი ყოფილა, ამაზე აქამდეც ლაპარაკობდნენ, მაგრამ ძალიან გამაკვირვა იმ რადიკალიზმმა, რაც დავინახეთ. აქამდე "რიონის მცველები" გაცილებით გაწონასწორებული და თანამიმდევრული მოქმედებებით გამოირჩეოდნენ. ასე ულტიმატუმების წამოყენება, მოთხოვნების შესრულებისთვის ვადების დათქმა, სიმართლე გითხრათ, მათი მოქმედების სტილს არ ჰგავს. 12 საათამდე ვაძლევთ ხელისუფლებას დროსო. პირველის 10 წუთზე რომ დათანხმდნენ მათ მოთხოვნებს, არ მიიღებენ? მოკლედ, ძალიან ბავშვურად მეჩვენება ეს განცხადებები.

რამ გამოიწვია მათი რიტორიკის ცვლილება, არ ვიცი. მინდა ეს მათ გამოუცდელობას მივაწერო და არა რაიმე სხვა მიზეზებს. რას ნიშნავს ქალაქის პარალიზება? ძალიან არასწორია, საზოგადოებრივი მოძრაობა ამგვარ განცხადებებს, ფაქტობრივად, გზის დასაწყისში აკეთებდეს. მე ვიყავი აქციაზე, მაინტერესებდა პროტესტის მასშტაბი. კი ბატონო, საზოგადოებრივი პროტესტის თვალსაზრისით ეს ნამდვილად ხალხმრავალი აქცია იყო, მაგრამ არა ისეთი მასშტაბური, ქალაქის პარალიზების რესურსი გამოჩენილიყო.

აქვე ვიტყვი - აღარ არის საზოგადოება იმ მდგომარეობაში, როდესაც შეიძლება ვინმემ რადიკალიზმი პროტესტის გამძაფრების ხერხად გამოიყენოს. საზოგადოება რადიკალიზმით დაიღალა! დღეს ხალხს ყველაზე მეტად დესტაბილიზაცია და არეულობა აფრთხობს. ისედაც უამრავი გამოწვევის წინაშე მდგარ ჩვენს სახელმწიფოს ყველაზე მეტად დესტაბილიზაცია დააზიანებს. იმედია ამ ახალგაზრდებს ეს ესმით და მალევე შეცვლიან ამ რიტორიკას. ასე აჯობებს მათთვისაც და ქვეყნისთვისაც". იხილეთ სრულად

პოლიტოლოგ რამაზ საყვარელიძის თქმით კი, ადამიანი, რომელიც ქვეყანაზე ზრუნავს და თან ხელისუფლებას ულტიმატუმს უყენებს, პარადოქსულად გამოიყურება.

"აქციის ავტორების აზრით, ისინი იბრძვიან იმისთვის, რომ ქვეყანამ შეინარჩუნოს კარგი მდგომარეობა ან ჰქონდეს უკეთესი მდგომარეობა. ქვეყანაზე ზრუნავდეს ადამიანი და ხელისუფლებას ულტიმატუმს უყენებდეს და დესტაბილიზაციით ემუქრებოდეს, ცოტა პარადოქსულად გამოიყურება. თუ არ გადადგება ხელისუფლება, თუ არ შემისრულებთ იმას, რასაც ვამბობ, დავანგრევთ მთელ ქვეყანას და ა.შ. ეჭვს აჩენს, რომ ეს პოლიტიკური მოტივია. პიკეტირების მოხდენა, დესტაბილიზაცია, ეს სახელმწიფოს ანგრევს, მითუმეტეს ისეთ ეკონომიკურ პირობებში, რაც პანდემიამ შექმნა“ , - აღნიშნა საყვარელიძემ "ინტერპრესნიუსთან".

საყვარელიძის თქმით, დესტაბილიზაცია რუსეთის წისქვილზე ასხმას წყალს.

ასევე, საყვარელიძემ აღნიშნა, რომ თუ მათი მხრიდან მსგავსი ტიპის მოთხოვნები და რადიკალიზმი იქნება, "ნამახვანჰესის“ მშენებლობის მოწინააღმდეგეებს საზოგადოების მხარდაჭერა არ ექნებათ.

"მთელი ევროპული ელიტა საქართველოში ჩამოვიდა იმისთვის, რომ დესტაბილიზაციას იწვევს პოლიტიკური ძალების ქუჩაში ყოფნა და ეს ქუჩაში აქციების პროცესი პარლამენტში უნდა გადასულიყო. ამისთვის შეიქმნა მიშელის დოკუმენტი და ა.შ. დესტაბილიზაცია რუსეთის წისქვილზე ასხამს წყალს. ოპოზიციის ფლანგის დესტაბილიზაცია, რომელიც მიტინგების მოწყობით იმუქრებოდა, თუკი რუსეთის წისქვილზე ასხამდა წყალს, მათი დესტაბილიზაციაც რუსეთის წისქვილზე ასხამს წყალს. თუ საზოგადოება დაინახავს, რომ ეს ქვეყანას ანგრევს, ისინი საზოგადოების მხარდაჭერას ვერ ნახავენ, ისევე როგორც ოპოზიციამ ვერ ნახა, რომელიც იძახდა დესტაბილიზაციას მოვაწყობთო,“ - განაცხადა საყვარელიძემ.

ამასთანავე, პოლიტოლოგმა აღნიშნა, რომ ქუჩიდან გაკეთებული პოლიტიკა არავითარ სიკეთამდე არ მიგვიყვანს.