"აუცილებლად აუნაზღაურებენ ნამუშევარ საათებს, თუ დამსაქმებელი არ შეასრულებს ვალდებულებებს, მათ სხვა დამსაქმებლებთან გადაანაწილებენ" - დასაქმების სააგენტოს ხელმძღვანელი

სეზონურ სამუშაოებზე დასაქმებისთვის საქართველოდან გერმანიაში წასულ მოქალაქეებს, რომლებმაც დაპირებული ანაზღაურება ვერ მიიღეს, ნამუშევარ საათებს აუნაზღაურებენ. ამის შესახებ დასაქმების სააგენტოს ხელმძღვანელმა, ნინო ველთაურმა ჟურნალისტებს განუცხადა.

თუმცა, ველთაურმა ვერ დააკონკრეტა რა პირობებით მოხდება დასაქმებულების ანაზღაურება, 3,5 ევროს ოდენობით საათში, რასაც დამსაქმებელი მათ სთავაზობს, თუ კონტრაქტით გათვალისწინებულ 9,5 ევროდ.

"აუცილებლად მოხდება ნამუშევარი საათების ანაზღაურება, რომელიც მათ იმუშავეს. ეს მოხდება იმ შემთხვევაში, თუ ისინი სხვა დამსაქმებელთან გადავლენ... ეს არის საკითხი, რასაც გერმანულ მხარესთან დავაზუსტებთ. მაქსიმალურად სამართლიანად მოხდება ანაზღაურება", - განაცხადა ველთაურმა.

როგორც მან აღნიშნა, ქართული მხარე პროცესში პოზიტიურ შედეგებს ელოდება, წინააღმდეგ შემთხვევაში საქართველოს მოქალაქეებს სხვა დამსაქმებლებთან გადაანაწილებენ.

„თუ დამსაქმებელი ბოლომდე ჯეროვნად არ შეასრულებს საკუთარ ვალდებულებებს, ჩვენს მოქალაქეებს აუცილებლად გადავანაწილებთ სხვა დამსაქმებლებთან. ჩვენ იმედი გვაქვს, რომ დამსაქმებელი თავის ვალდებულებას შეასრულებს ანაზღურებასთან დაკავშირებითაც, რაც კონტარაქტში წერია. კონტრაქტში გაწერილია კვირაში სამუშაო სააათების რაოდენობა და ამის შესახებაც არის შრომის ფედერალური სააგენტო საქმის კურსში. ჩვენ ველოდებით იმას, რომ პროცესში დავინახოთ პოზიტიური შედეგები, წინააღმდეგ შემთხვევაში დასაქმებულები გადანაწილდებიან სხვა დამსაქმებლებთან“, - განაცხადა დასაქმების სააგენტოს ხელმძღვანელმა.

ამასთან, ველთაურმა უარყო გავრცელებული ინფორმაცია, რომ გერმანიაში დასაქმებულებს კონტრაქტები წასვლის წინ, აეროპორტში გადასცეს და მათ არ ჰქონდათ ინფორმაცია ხელს რაზე აწერდნენ.

„ამაში ვერ დაგეთანხმებით იმიტომ, რომ ჩვენ მუდმივ კომუნიკაციაში ვართ აპლიკანტებთან გამგზავრებამდე. ვაცნობთ იმ სამუშაო შეთავაზებას, რაც იგივე კონტრაქტშია. ვეუბნებით, რომ კონტრაქტში, რომელიც წასვლამდე გადაეცემათ მათ გაწერილია სამუშაო პირობები, ხარჯები, სამუშაო სააღების ანაზღაურება. იგივე პირობები იწერება კონტრაქტებშიც. წასვლის წინ მათ უტარდებათ წასვლის წინა საორიენტაციო ტრენინგი, სადაც მათ დეტალურად მიეწოდებათ ინფორმაცია მათი სამუშაო პირობების შესახებ“, - განაცხადა ნინო ველთაურმა.

მან ასევე აღნიშნა, რომ დამსაქმებელთან ქართულ მხარეს მიმოწერა და პირდაპირი კომუნიკაცია არ ჰქონია.

"ჩვენი უფლებამოსილებაა ის, რომ თუკი რაიმე კითხვა ან შეუსაბამობა იქნება სამუშაო ადგილზე, საქმის კურსში ჩავაყენოთ გერმანიის შრომის ფედერალური სააგენტო, რომელიც ორშაბათს ჩავაყენეთ საქმის კურსში. 9 მაისს წავიდა ჯგუფი. მოგვწერეს 10 მაისს და 10-შივე შესაბამისი წერილი გავაგზავნეთ. ამ ერთი კვირის განმავლობაში პერიოდულად გავაგზავნეთ რამდენიმე წერილი; იყო სატელეფონო კომუნიკაციაც. ასევე, ბერლინში საქართველოს საელჩო და საკონსულოც კომუნიკაციაშია როგორც ჩვენს მოქალაქეებთან, ასევე გერმანულ მხარესთან, შრომის სააგენტოსთან. გვქონდა შუალედური პასუხები ამ ერთი კვირის განმავლობაში, ხოლო სამშაბათს მოვიდა საბოლოო პასუხი იმ ღონისძიებების შესახებ, რომელიც დამსაქმებელმა უკვე გაატარა ან გეგმავს. მონიტორინგი ჩატარდება იმაზე, რასაც დამსაქმებელი გაატარებს", - განაცხადა ველთაურმა.

რაც შეეხება ორ ადამიანს, რომლებმაც პირობა დაარღვიეს, როგორც ველთაური ამბობს, ისინი სქემიდან გავიდნენ, შესაბამისად, მათთან ქართული მხარე კომუნიკაციაში აღარ არის.

"როდესაც დამსაქმებელი ხელს აწერს შრომის პირობებზე, რომელიც უნდა დაიცვას, თუმცა ამ ვალდებულებებს არღვევს, მათ ფედერაცია აჯარიმებს, თუმცა რამდენით და როგორ არ ვიცი", - ამბობს ველთაური.

ამასთან, დასაქმების სააგენტოს ხელმძღვანელი აღნიშნავს, რომ წინა სამ ჯგუფს, რომელიც გერმანიაში გაემგზავრა, არანაირი პრობლემა არ აქვთ.

"წინა სამ ჯგუფთანაც ვართ ჩვენ კომუნიკაციაში როგორც სამუშაო, ასევე არასამუშაო საათებში. სამივე ჯგუფს ძალიან კარგი გამოცდილება აქვთ. თავიდან მეტი კითხვა იყო, მეტი დეტალი აინტერესებდათ, ყველაფერი უცხო იყო მათთვის. ყველანაირი კითხვა ამოვწურეთ, რაც კი ჩვენი მოქალაქეების მხრიდან იყო“, - განაცხადა ველთაურმა.

ცნობისთვის, საქართველოს პროფკავშირების გაერთიანებამ გაავრცელა ინფორმაცია, რომლის თანახმად, სეზონურ სამუშოებზე დასაქმებისთვის საქართველოდან გერმანიაში წასული 24 მოქალაქე უმძიმეს სამუშაო პირობებშია.

როგორც საქართველოს პროფკავშირების გაერთიანებაში აღნიშნავენ, მათ შორის ისინი დაპირებულ ანაზღაურებას ვერ იღებენ.