"საბა ბუაძე მგონია იდიოტი. ეს როდესღაც უნდა მეთქვა... პოლიტიკაში ბუაძეობა, ჩარკვიანობა და ნათელაშვილობა უნდა დასრულდეს - ეს არის კლოუნადის აპოთეოზი" - ვახტანგ მეგრელიშვილი

ქართულ პოლიტიკაში საბა ბუაძეობა, თაკო ჩარკვიანობა და შალვა ნათელაშვილობა უნდა დასრულდეს, ეს არის კლოუნადის აპოთეოზი, - ამის შესახებ „გირჩის“ ლიდერმა, ვახტანგ მეგრელიშვილმა „პალიტრანიუსის“ ეთერში, გადაცემაში „360 გრადუსი“ განაცხადა, რითაც „ლელოს“ წევრის საბა ბუაძის კომენტარი შეაფასა, სადაც ის აღნიშნავს, რომ „გირჩის“ კომენტარებს სერიოზულიად ვერ აღიქვამს. საბა ბუაძე არასერიოზულად მიიჩნევს პარტია „გირჩის“ მიერ ხელისუფლებისთვის წარდგენილ 7-პუნქტიან გეგმას და აცხადებს: „მეეჭვება, „გირჩის“ გეგმას ვინმე სერიოზულად აღიქვამდეს, ჯიმ ქერის ფილმებს სიცილის გარეშე ხომ ვერ შეხედავ, ასევე მათ კომენტარებს სერიოზულად ვერ აღვიქვამ“.

როგორც მეგრელიშვილი აცხადებს, რასაც „ლელო“ აკეთებს საბა ბუაძის ფორმით, ნორმალურ პოლიტიკასთან შეუთავსებელია.

„საბა ბუაძე მგონია იდიოტი. ეს როდესღაც უნდა მეთქვა, ვერ მოვისვენებდი, რომ არ მეთქვა. რასაც საბა ბუაძე და „ლელო“ აკეთებს საბა ბუაძის ფორმით, შეუთავსებელია ნორმალურ პოლიტიკასთან. ჩემი აზრით, კლოუნადაა.

ამ ადამიანის განცხადებებს არასოდეს ჰქონია სერიოზული შინაარსი. მზად ვარ, თუ საჭიროა, თუ მე ვცდები და ეს ასე არ არის, საბა ბუაძესთან დავჯდე და საათობით ვისაუბრო, თუ ეს ასე არ აღმოჩნდა ბოდიში მოვიხადო.

მგონია, რომ საბა ბუაძეობა ქართულ პოლიტიკაში უნდა დასრულდეს, ისევე როგორც თაკო ჩარკვიანობა, შალვა ნათელაშვილობა, ასეთი პოლიტიკოსობა ამ ქვეყანაში უნდა დასრულდეს. ეს არის კლოუნადის აპოთეოზი“, - აცხადებს მეგრელიშვილი.

გარდა ამისა, ვახტანგ მეგრელიშვილის განცხადებით, „ქართულ ოცნებას“ არ სურს „ნაციონალური მოძრაობა“ პარლამენტში შევიდეს. როგორც მან განაცხადა, მმართველ გუნდს არ სურს, რომ პარლამენტი შედგეს.

„ჩვენ „ქართულ ოცნებას“ ბრალს ვდებთ იმაში, რომ მას ნამდვილად არ უნდა, რომ ეს პარლამენტი შედგეს. თვითონ არჩევს მისთვის მისაღებ ოპოზიციას. შეიძლება „გირჩიც“ მისთვის მისაღები ოპოზიცია იყოს, ისევე როგორც ალეკო ელისაშვილი. ჩემი აზრით, „ქართულ ოცნებას“ არ უნდა „ნაციონალური მოძრაობის“ პარლამენტში შეშვება“, - აცხადებს მეგრელიშვილი.