ეკატერინე ტიკარაძე მზად არის, საჯაროდ აიცრას, მათ შორის "ასტრაზენეკას" ვაქცინით

ჯანდაცვის მინისტრი ეკატერინე ტიკარაძე მზად არის, საჯაროდ აიცრას, მათ შორის "ასტრაზენეკას" ვაქცინით. ამის შესახებ მან "ღამის კურიერის" ეთერში განაცხადა.

"დიახ, რა თქმა უნდა, ვაპირებ აცრის გაკეთებას. მნიშვნელოვანია, რომ ჩვენ ყველა საჯაროდ ავიცრათ, ამ შემთხვევაში გვქონდა სტრატეგია, რომ სხვადასხვა ვაქცინით მომხდარიყო აცრა. ჩინური ვაქცინა, რომელზეც არაერთი მითია, გადაწყვეტილი იყო, რომ მე ამ ვაქცინით ავიცრებოდი.

დღეს მიმდინარეობს შეჯერების პროცესი, თუ რა სახეს მიიღებს ეს კამპანია, რადგან ის, რაც იყო დაგეგმილი, შესაძლოა, აღარ იყოს საკმარისი, რომ მოსახლეობა ჩვენ დავარწმუნოთ ვაქცინის სანდოობაში. გარკვეული ფორმატი შეიძლება იყოს შეცვლილი. ამასთან დაკავშირებით, ორშაბათს მოვახსენებთ საზოგადოებას თუ, რა კონკრეტულ გადაწყვეტილებას მივიღებთ.

მნიშვნელოვანია, საზოგადოებამ ეს ნახოს საჯაროდ, მათ შორის, როგორ ვიცრებით ასტრაზენეკას ვაქცინით,"- აღნიშნა ტიკარაძემ.