"მქონდა ტკივილი ინექციის ადგილას, თავის ტკივილი და დაღლილობის შეგრძნება..." - როგორ გადაიტანა "ასტრაზენეკას" ვაქცინა მარინა ეზუგბაიამ

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით ვაქცინაციის შემდეგ თავს დამაკმაყოფილებლად გრძნობს. ეზუგბაიამ "ასტრაზენეკას" ვაქცინა სხვა კოლეგებთან ერთად 15 მარტს გაიკეთა.

"ყველა ვაქცინას ახლავს გვერდითი მოვლენები და არც "ასტრაზენეკას" ვაქცინაა ამ მხრივ გამონაკლისი, მასაც აქვს გარკვეული გვერდითი მოვლენები. ეს არის მინიმალური და საშუალო სიმძაფრით გამოხატული: ტკივილი ინექციის ადგილას, თავის ტკივილი, საერთო სისუსტე, ცხელება, ართრალგია (სახსრის ტკივილი), დაღლილობის შეგრძნება. მეტნაკლებად, ეს შეიძლება გამოხატული იყოს მასში ვინც აიცრება, ზოგთან კი შეიძლება სულაც არ იყოს გამოხატული და ძალიან კარგად გადაიტანოს.

პირადად ჩემს მაგალითზე გეტყვით: მქონდა ტკივილი ინექციის ადგილას, ზომიერი თავის ტკივილი და დაღლილობის შეგრძნება. გუშინ 24 საათი გავიდა აცრიდან და თითქოს არაფერი არ მქონია, ისე გაიარა ყველაფერმა. დღეს დილიდან სრულიად ჯანმრთელი, ენერგიული, აქტიური ვარ. ასე რომ, აცრის შემდგომ გვერდითი მოვლენები, ძალიან მინიმალურად არის გამოხატული და ადვილად დასრულდება, ყოველგვარი გართულების გარეშე" - ამის შესახებ ეზუგბაიამ გადაცემა "ახალი დღის" ეთერში განაცხადა.

მანვე გააკეთა განმარტება გავრცელებული მოსაზრების შესახებ, რომ ვაქცინის გაკეთებიდან 2 თვის განმავლობაში ალკოჰოლის მიღება არ არის სასურველი:

"საქართველოში ეს თემა ძალიან აქტუალურია ხოლმე... იმისთვის, რომ იმუნიტეტის ჩამოყალიბებას არ შევუშალოთ ხელი, მართლაც არ არის სასურველი ალკოჰოლის მიღება. თუ გავითავისებთ, რომ იმუნიზაციას ვიკეთებთ ანტისხეულების ჩამოსაყალიბებლად, რომელიც შემდგომში დაავადებისგან დაგვიცავს, რა თქმა უნდა, სასურველია ალკოჰოლი არ მივიღოთ, მაქსიმუმ ორი თვის განმავლობაში.

ვაქცინაცია აუცილებელია, რადგან პანდემიის დამარცხების ერთადერთი გზაა. იმისთვის, რომ ეს ჩემი რჩევა რეალობად ქცეულიყო, პაატა იმნაძესთან, შოთა გოგიჩაიშვილთან და მარინა ენდელაძესთან ერთად, ერთ-ერთმა პირველმა ჩავიტარე ვაქცინაცია და ამით მოსახლეობას ვაჩვენეთ, რომ ვაქცინაცია საჭირო და აუცილებელია. ეს არ არის საშიში, რაც არ უნდა გვერდით მოვლენებზე იყოს საუბარი. იმისთვის რომ ქვეყანამ გააგრძელოს ცხოვრება ჩვეულ რიტმში, კალაპოტში ჩადგეს, გადავლახოთ ეს ყველაფერი, აუცილებელია ვაქცინაცია" - აღნიშნა "ახალი დღის" ეთერში ჩართვისას ინფექციური საავადმყოფოს სამედიცინო დირექტორმა.

ეზუგბაიამ ასევე მიმართა კოლეგებს, ექიმებს და თხოვა, რომ გაიკეთონ აცრა და ამით პირადი მაგალითი მისცენ მოსახლეობას, რომ მათაც უშიშრად დაიწყონ ვაქცინაცია.

შეგახსენებთ, სამედიცინო სფეროს რამდენიმე წარმომადგენელი 15 მარტს, საქართველოში "ასტრაზენეკას" ვაქცინის შემოსვლიდან მეორე დღეს მედიის თვალწინ აიცრა.