რას ამბობენ "ოცნების" ლიდერები კრისტიან დანიელსონთან შეხვედრის შემდეგ - "წითელი ხაზია სამართლიანობა, მეტი არაფერი"

იმედის გვაქვს, მოლაპარაკებების პროცესი წარმატებით დასრულდება, რაც მხარეებზეა დამოკიდებული - ჩვენ ყველაფერს გავაკეთებთ დიალოგის წარმატებით დასრულებისთვის, - აღნიშნული განცხადება პარტია “ქართული ოცნება - დემოკრატიული საქართველოს“ თავმჯდომარემ, საპარლამენტო უმრავლესობის ლიდერმა ირაკლი კობახიძემ ევროპული საბჭოს პრეზიდენტ შარლ მიშელის პირად წარმომადგენელთან, კრისტიან დანიელსონთან შეხვედრის შემდეგ გააკეთა.

ამ კონტექსტში კობახიძემ ხაზგასმით აღნიშნა, რომ შეთანხმება, რომელიც შედგება, უნდა იყოს სამართლიანი.

“ჩვენ ვიხელმძღვანელებთ სამართლიანობის პრინციპით და რასაც სამართლიანად ჩავთვლით, იმას, ბუნებრივია, ხელს მოვაწერთ. წითელი ხაზია სამართლიანობა, მეტი არაფერი“, - განაცხადა ირაკლი კობახიძემ.

მან შეხვედრის შემდეგ დეტალებზე საუბრისგან თავი შეიკავა და განმარტა, რომ მოლაპარაკებების პროცესის დასრულებამდე, უფრო კონკრეტულ კომენტარს ვერ გააკეთებს.

“პარტნიორებთან ვართ შეთანხმებული, რომ ჯერჯერობით დიალოგის დეტალებზე არ ვისაუბრებთ, გამომდინარე იქედან, რომ დისკუსიები გრძელდება. გაიმართება შეხვედრა ოპოზიციის წარმომადგენლებთან, ამის შემდეგ განახლდება დიალოგის პროცესი ჩვენი მონაწილეობით. შესაბამისად, ეს არის მიმდინარე პროცესი, რაც დღეს უნდა დასრულდეს. ვიდრე პროცესი არ დასრულდება, კონკრეტულ კომენტარს ვერ გავაკეთებთ ვერც პირდაპირი და ვერც ირიბი ფორმით“, - აღნიშნა ირაკლი კობახიძემ.

„ქართული ოცნება“ მზად არის სამართლიან პირობებში შეთანხმებისთვის და ჩვენს პასუხისმგებლობას სრულად ვაჩვენებთ ამ დიალოგში, - ამის შესახებ კრისტიან დანიელსონთან გამართული შეხვედრის შემდეგ პარლამენტის თავმჯდომარე არჩილ თალაკვაძემ განაცხადა.

მისივე თქმით, თუ ოპოზიცია სამართლიანობის და რეალობის გადმოსახედიდან შეხედავს შეთანხმების შესაძლო პირობებს, პარლამენტში შესვლაზე შეთანხმება მიღწევადია.

"დღეს ძალიან მშვიდი და საქმიანი საუბარი შედგა. ეს არის პრივილეგია საქართველოსთვის, რომ ევროკავშირის მხრიდან ასეთი მაღალი და კომპეტენტური წარმომადგენლობა არის ამ დიალოგში.

ვფიქრობ, რომ სამართლიანი პრინციპების გარშემო შეთანხმება მიღწევადია და თუ ოპოზიციაც ამ რეალური გადმოსახედიდან შეაფასებს შეთანხმების შესაძლებლობებს იმედი მაქვს, რომ შევძლებთ შეთანხმებას. დღეს კიდევ გაიმართება შეხვედრები და დღის ბოლომდე გამოიკვეთება შესაძლებლობა, რომ ჩვენ შევთანხმდეთ. „ქართული ოცნება“ მზად არის სამართლიან პირობებში შეთანხმებისთვის და ჩვენს პასუხისმგებლობას სრულად ვაჩვენებთ ამ დიალოგში. ორმა მილიონმა მოქალაქემ მისცა ხმა სხვადასხვა პარტიას, ჩვენ ვაფასებთ ჩვენი მხარდამჭერების არჩევანს და რა თქმა უნდა, გვსურს ისეთი შეთანხმების მიღწევას, რომელიც იქნება გრძელვადიანი და უზრუნველყოფს პოლიტიკურ თანამშრომლობას. პირველ რიგში, ჩვენ გვსურს, რომ დემოკრატიულმა რეფორმებმა მოიტანოს პოლიტიკური სტაბილურობა და პოლიტიკური კულტურამ სადაც არა ურთიერთდაპირისპირება, არამედ საქმის მშვიდობიანი განაწილება იქნება შესაძლებელი.

ამ დიალოგში მოგვეცა საშუალება როგორც ხელისუფლებას ჩვენი ევროპელი პარტნიორებისთვის უფრო დეტალურად აგვეხსნა რა არის ქვეყანაში პოლიტიკური კონტექსტი და რა გამოწვევები დგას ჩვენი ქვეყნის წინაშე. ევროკავშირის მხრიდან საქართველოს აქვს ურყევი მხარდაჭერა და ამ დიალოგში ჩვენი პარტნიორების მონაწილეობაც გამოხატავს ამ მხარდაჭერას. თუ ოპოზიცია სამართლიანობის და რეალობის გადმოსახედიდან შეხედავს შეთანხმების შესაძლო პირობებს ვფიქრობ, პარლამენტში შემოსვლაზე შეთანხმება მიღწევადია. ჩვენ სწორედ ამ კუთხით ვხედავთ ამ შეთანხმებას და პირობებს რომელიც განიხილება, იმედი მაქვს ოპოზიციის მხრიდანაც იქნება ანალოგიური მიდგომა. სავარაუდოდ დღეს იქნება კიდევ რამდენიმე ინდივიდუალური შეხვედრა, მათ შორის ჩვენთან და დღის ბოლომდე მაქსიმალურად გამოვიყენებთ დროს, რომ დავაახლოვოთ პოზიციები“, - აღნიშნა არჩილ თალაკვაძემ.

ევროპული საბჭოს პრეზიდენტის, შარლ მიშელის პირადი წარმომადგენელი კრისტიან დანიელსონი „ნაციონალური მოძრაობისა“ და მასთან ერთად ბლოკში მყოფი პარტიების წარმომადგენლებს ხვდება.

შეხვედრას სალომე სამადაშვილსა და აკაკი მინაშვილი ესწრებიან. შეხვედრაზე იმყოფება "რესპუბლიკური პარტიის" თავმჯდომარე ხათუნა სამნიძე.

ოპოზიციაში იმედოვნებენ, რომ ხელისუფლება კომპრომისის მისაღწევად კონკრეტულ ნაბიჯებს გადადგამს და მხარეებს შორის შეთანხმება შედგება.

ცნობისთვის, ევროპული საბჭოს პრეზიდენტის შარლ მიშელის სპეციალური წარმომადგენელი კრისტიან დანიელსონი საქართველოში პოლიტიკური პარტიების წარმომადგენლებთან შეხვედრებს აგრძელებს. დღის განმავლობაში შეხვედრები დაგეგმილია ოპოზიციის წარმომადგენლებთან. შეხვედრებს საქართველოში ევროკავშირის ელჩი, კარლ ჰარცელი და აშშ-ის ელჩი, კელი დეგნანი ესწრებიან. ​

"ერთადერთი შეთანხმების საგანი, რომელზეც შეგვიძლია დღეს ჩვენ ვისაუბროთ, ეს არის გზა თუ როგორ მივალთ ამ ვადამდელ არჩევნებამდე და ცხადია, პოლიტპატიმრების ნიკა მელიას და გიორგი რურუას გათავისუფლება რჩება ოპოზიციის უკლებლივ ყველა სუბიექტის მოთხოვნად", - ამის შესახებ „ნაციონალური მოძრაობის“ ერთ-ერთმა ლიდერმა სალომე სამადაშვილმა ევროპული საბჭოს პრეზიდენტის პირად წარმომადგენელთან კრისტიან დანიელსონთან შეხვედრამდე განაცხადა.

მისივე თქმით, ქვეყანას კრიზისიდან გამოსასვლელად ვადამდელი არჩევნები სჭირდება.

„შედეგის მიღწევა ეს არის აუცილებელი ჩვენი ქვეყნის მშვიდი განვითარებისთვის და წინსვლისთვის, ამიტომ ჩვენ ჩვენი მხრიდან, ოპოზიციამ არაერთხელ დავაფიქსირეთ მზადყოფნა, რომ წავიდეთ მოლაპარაკებებზე იმ განწყობით, რომ დაიდოს კონკრეტული შედეგი, მაგრამ მოლაპარაკებებს ჰყავს ორი მხარე, ამიტომ შეთანხმების მთავარი გასაღები, ცხადია, არის ხელისუფლების განკარგულებაში.

ჩვენ დღეს ვაგრძელებთ მოლაპარაკებებს, ვნახავთ რა წინადადებებით მოვიდა მმართველი გუნდი და შესაბამისად, განისაზღვრება ჩვენი პასუხიც.

საზოგადოებამ იცის, რომ ჩვენ უკვე წავედით გარკვეულ კომპრომისებზე ამ პროცესში, ჯერ კიდევ რამდენიმე თვის წინ, როდესაც განვაცხადეთ, რომ დაე, ქართველმა ხალხმა გადაწყვიტოს პლებისციტის გზით, ჩატარდეს თუ არა ვადამდელი არჩევნები. ჩვენ მიგვაჩნია, რომ ქვეყანას კრიზისიდან გამოსასვლელად სჭირდება ვადამდელი არჩევნები - ერთადერთი შეთანხმების საგანი, რომელზეც შეგვიძლია დღეს ჩვენ ვისაუბროთ, ეს არის გზა თუ როგორ მივალთ ამ ვადამდელ არჩევნებამდე და ცხადია, პოლიტპატიმრების - ნიკა მელიას და გიორგი რურუას გათავისუფლება, რჩება ოპოზიციის უკლებლივ ყველა სუბიექტის მოთხოვნად, რომელიც მიგვაჩნია, რომ იქნება ნდობის აღდგენის მექანიზმი იმისთვის, რომ საერთოდ ეს შეთანხმება შედგეს და იყოს შესაძლებელი“, - განაცხადა სამადაშვილმა.

შარლ მიშელის პირადი წარმომადგენელი კრისტიან დანიელსონი საქართველოს 12 მარტს ესტუმრა. კრისტიან დანიელსონის ვიზიტის მიზანია, ჩაერთოს პრეზიდენტ შარლ მიშელის მიერ 1-ელ მარტს ინიცირებულ, განახლებულ პოლიტიკურ დიალოგში, მასში მონაწილე ყველა პარტიის ლიდერთან ერთად.