"ოცნებამ" თვითმმართველობის არჩევნებისთვის მზადება დაიწყო, იქნება თუ არა თბილისის მერობის კანდიდატი ისევ კალაძე? - რას ამბობენ უმრავლესობაში

"ქართულმა ოცნებამ" დღეს თვითმმართველობის არჩევნებისთვის მზადება დაიწყო.

როგორც „"ქართული ოცნების“ დეპუტატმა სოზარ სუბარმა უმრავლესობის სხდომის დასრულების შემდეგ განაცხადა, სხდომაზე სწორედ ამ საკითხთან დაკავშირებით და ქვეყნის სხვა მიმდინარე თემებზე მსჯელობდნენ.

მთელი დღის განმავლობაში ჟურნალისტები სვამდნენ კითხვას, იქნება თუ არა თბილისის მერობის კანდიდატი ისევ კახა კალაძე. როგორც მიხეილ ყაველაშვილი ამბობს, თუ კახი კალაძე კანდიდატურას დააყენებს, ის იქნება უალტერნატივო და აუცილებლად გაიმარჯვებს.

მისივე თქმით, “დედაქალაქს დღეს ღირსეული მერი ჰყავს”.

“გვექნება მსჯელობა და ყველა კანდიდატს გავივლით. პროცესია ჩვეულებრივი”, - განაცხადა ყაველაშვილმა.

საპარლამენტო უმრავლესობის წევრის ირაკლი ზარქუას ინფორმაციით, დედაქალაქის მერის კანდიდატურასთან დაკავშირებით უმრავლესობის დღევანდელ შეხვედრაზე საუბარი არ იყო და ამაზე გადაწყვეტილებას მოგვიანებით პარტიის პოლიტსაბჭო მიიღებს.

"რამდენადაც ინფორმაცია მაქვს, თბილისის მერობის კანდიდატზე მსჯელობა ჯერ არ ყოფილა. კახა კალაძის დამოკიდებულებაა, რომ სადაც გუნდს დასჭირდება, იმ პოზიციაზე იქნება", - აღნიშნა ირაკლი ზარქუამ.

როგორც აღნიშნული საკითხის კომენტირებისას სოზარ სუბარმა აღნიშნა, გადაწყვეტილებას, თუ ვინ იქნებიან მერობის კანდიდატები თბილისსა და რეგიონებში, საზოგადოება მოგვიანებით შეიტყობს.

„კახა კალაძე არის ჩვენი გუნდის ერთ- ერთი გამორჩეული ლიდერი, ყველაზე მაღალრეიტინგული ლიდერი, ადამიანი, რომელიც ძალიან ბევრს აკეთებს, ძალიან კონკრეტული გეგმა აქვს თბილისის განვითარების და ყოველთვის იქნება ასეთი წევრი. რაც შეეხება იმას, ვინ იქნებიან კანდიდატები, კახა კალაძე თუ რომელიმე სხვა ადამიანი სხვა რეგიონში, სხვა მუნიციპალიტეტში თუ სხვა მერიაში, ამას გეტყვით მოგვიანებით“, - განაცხადა სუბარმა.