შავ ზღვაში ნატომ "პოსეიდონი" "შემოუშვა"... კრემლში კი თვლიან, რომ შავი ზღვა უკვე მხოლოდ რუსეთს "ეკუთვნის"

27 თებერვალს ნატომ შავი ზღვის აკვატორიაში მრავალეროვნული საზღვაო სწავლება დაიწყო "პოსეიდონი-21"-ის სახელწოდებით, რომელიც 6 მარტამდე გასტანს.

ოფიციალური მონაცემებით მასში რუმინეთის, ბულგარეთის, საბერძნეთის, ესპანეთის, საფრანგეთის, თურქეთისა და აშშ-ების 700-მდე სამხედრო მოსამსახურემ უნდა მიიღოს მონაწილეობა ხმელეთზე, ჰაერში და ზღვაზე. სწავლებაში ჩართულია სხვადასხვა რანგის 13 სამხედრო ხომალდი, 9 თვითმფრინავი, წყალქვეშა რობოტი და პიროტექნიკით დატვირთული ერთი ავტომობილი.

როგორც ხედავთ, ეს საზღვაო სწავლება არც მასშტაბებით და არც ამოცანებით (საზღვაო ნაღმების გაუვნებელყოფა და მწყობრიდან გამოსული მცურავი საშუალებების ბუქსირება) დიდად არ გამოირჩევა და შეიძლება, არც ღირდა მასზე ყურადღების გამახვილება, მაგრამ შავიზღვისპირა კიდევ ერთ ქვეყანაში - რუსეთში თითქმის ისტერიკა გამოიწვია ნატოს ხომალდების მორიგმა შემოსვლამ შავ ზღვაში.

რუსეთის შავი ზღვის ფლოტის სერიოზული გადაიარაღების დაწყების შემდეგ, (რაშიც გარკვეული "ბრალი" 2008 წლის რუსეთ-საქართველოს ომსაც მიუძღვის, რომლის დროსაც გამოჩნდა რუსეთის შავი ზღვის ფლოტის ძალიან ბევრი ნაკლი, რომელსაც საქართველოზე უფრო ძლიერი ქვეყანა თავის სასარგებლოდ გამოიყენებდა) კრემლში ფაქტობრივად თვლიან, რომ შავი ზღვა თითქოს უკვე მხოლოდ რუსეთს "ეკუთვნის" და არაშავიზღვისპირა ქვეყნების ხომალდებს აქ არაფერი ესაქმებათ.

არადა, შავი ზღვისპირა ექვსი ქვეყნიდან სამი - თურქეთი, რუმინეთი და ბულგარეთი, ჩრდილოატლანტიკური ალიანსის წევრია, ორი - საქართველო და უკრაინა კი ნატოს აქტიური პარტნიორი. მიუხედავად ასეთი დისბალანსისა, ყველაზე რეალურ ძალას დღეისათვის მაინც რუსეთის შავი ზღვის ფლოტი ფლობს, რომელსაც ზურგს უმაგრებს შავ ზღვაში "შეჭრილი" "ჩაუძირავი ავიამზიდი" - რუსეთის მიერ ოკუპირებული ყირიმის ნახევარკუნძულიც. გააგრძელეთ კითხვა