გადაადგილებაზე დაწესებული შეზღუდვის დარღვევისთვის 2 ათასი ლარით დაჯარიმდებით

გადაადგილებაზე დაწესებული შეზღუდვის დარღვევისთვის 2 ათასი ლარით დაჯარიმდებით. ამის შესახებ მთავრობის ადმისტრაციაში გამართულ ბრიფინგზე ვიცე-პრემიერმა მაია ცქიტიშვილმა განაცხადა.

"ჩვენ კანონმდებლობით უკვე გვაქვს განსაზღვრული სანქციები, იმ კანონით, რომელიც არეგულირებს საკარანტინო ღონისძიებებს.

მინდა აღვნიშნო, პირველ რიგში, რომ ეს არ არის კომენდანტის საათი, ეს არის გადაადგილების შეზღუდვა. ამ შეზღუდვის დარღვევისთვის იმოქმედებს ის სანქცია, რომელიც დაწესებულია, კერძოდ, 2 ათასი ლარი“, - განაცხადა მაია ცქიტიშვილმა.

ცნობისთვის, ორშაბათიდან დიდ ქალაქებში - თბილისში, ქუთაისში, ბათუმში, რუსთავში, ზუგდიდში, ფოთსა და გორში 22:00 საათიდან დილის 5 საათამდე გადაადგილება იქნება შეზღუდული.

ეს გავრცელდება როგორც ქვეითებზე, ასევე ტრანსპორტით და კერძო ავტომობილით მოსარგებლე ადამიანებზე.

"შეზღუდვა არ იმოქმედებს საერთაშორისო საავტომობილო გადაზიდვებზე და იმ პირებზე და მათ საავტომობილო საშუალებებზე, რომლებიც გადაადგილდებიან სტრატეგიული ობიექტების ფუნქციონირებისთვის, ასევე სამედიცინო დაწესებულებების, ფარმაცევტული დაწესებულებების, მედია დაწსებულებების და მიტანის სერვისის უზრუნველსაყოფად“,- განაცხადა ცქიტიშვილმა.