"ივანიშვილმა სია შეარჩია კლასიკური საბჭოური კრიტერიუმით... "ნაცმოძრაობის" სიაში ბუბა კიკაბიძის გამოჩენაში კი არის რაღაც პოლიტიკური ლოგიკა" - ექსპერტი

1-ლ ოქტომბერს, "ქართული ოცნება - დემოკრატიული საქართველოს" თავმჯდომარემ, ბიძინა ივანიშვილმა 2020 წლის საარჩევნო პროგრამის პრეზენტაციაზე სიტყვით გამოსვლისას საკმაოდ დიდი დრო დაუთმო "ნაციონალური მოძრაობის” კრიტიკას და ილაპარაკა "ოცნების” ხელისუფლების 8 - წლიან მიღწევებზე.

"დღეს პირველი ოქტომბერია, დღე, რომელიც უკვე ჩაიწერა ჩვენი ქვეყნის ისტორიაში, როგორც ქართველი ხალხის ერთობის, თავისუფლებისა და გამარჯვების სიმბოლო. 2012-ში, ჩვენ გადარჩენისთვის ვიბრძოდით, შიშისგან, ჩაგვრისა და ძალადობისგან უნდა გვეხსნა ხალხი და ქვეყანა”, - განაცხადა მან.

მისი თქმით, "ქართული ოცნება” ხალხს სთავაზობს პროგრამას, რომელმაც შეუქცევადი უნდა გახადოს ქვეყნის დემოკრატიული განვითარება, უზრუნველყოს ეკონომიკური წინსვლა და მნიშვნელოვნად შეცვალოს უკეთესობისკენ თითოეული მოქალაქის ცხოვრება. "ამბები.გე" ექსპერტ გია ხუხაშვილს ესაუბრა, რომელიც საკუთარ მოსაზრებას გვიზიარებს ბიძინა ივანიშვილის გამოსვლას,”ოცნების” პროგრამასა და მის მიერ წარმოდგენილ 150-კაციან სიასთან დაკავშირებით:

- როგორ შეაფასებთ ბიძინა ივანიშვილის სიტყვით გამოსვლას, რამე ახალი მესიჯები და მნიშვნელოვანი პასაჟები თუ აღმოაჩინეთ მასში?

- ამის კომენტირებას აზრი არ აქვს იმიტომ, რომ ეს ტექსტი დაწერილია რამდენიმე წლის წინ და ივანიშვილი დრო და დრო ერთი და იმავეს იმეორებს ხოლმე, სამწუხაროდ, ჩახვეული აქვს. რა სიახლე უნდა დამენახა, მოვისმინეთ და სხვადასხვა ბრუნვაში დავინახეთ "ნაციონალური მოძრაობა”. შოკის მომგვრელია, რომ 8 წლის თავზე, ფაქტობრივად, იმავე ტექსტებს კითხულობს. ამაზე კომენტარის გაკეთება შეუძლებელია.

- გეთანხმებით, ისევ კრიტიკული იყო "ნაციონალების” და მათი ხელისუფლების მიმართ, ისევ პარალელებს ავლებდა და შედარებებს აკეთებდა წინა "დესპოტურ ხელისუფლებასთან”. ამით რისი თქმა უნდოდა, რომ მთავარი მეტოქე მხოლოდ "ნაციონალური მოძრაობაა” და სხვა პარტიები არაფრად მიაჩნია?

- ეს იმას ნიშნავს, რომ თვითონ არაფერი შეგიძლია და საზოგადოებას ეუბნები, რომ კი ბატონო, მე ცუდი ვარ, მაგრამ ის ჩემზე უარესი იყო, მეტი სათქმელი არაფერი გაქვს. ის რას აღიქვამს, არ ვიცი, მაგრამ პოლიტტექნოლოგიურად აწყობს, რომ თავისზე უარესზე ილაპარაკოს. უკეთესზე ლაპარაკი არაკომფორტული იქნება მისთვის და ურჩევნია ვიღაც აარჩიოს და ილაპარაკოს, რომ ის ჩემზე უარესია და ნეგატიური არჩევანისკენ უბიძგოს ხალხს - ცუდსა და უარესს შორის არჩევანისკენ წაიყვანოს სიტუაცია.

- როცა ივანიშვილი "ოცნების” ხელისუფლების ღვაწლზე ლაპარაკობდა, იყო ობიექტური და გულწრფელი, ან თვითკრიტიკა დაინახეთ სადმე?

- ვფიქრობ, თუ ჩვენ ისტორიის პრიზმაში გავხედავთ ყველაფერს, "ქართულ ოცნებას”, პრაქტიკულად, არც ერთი ისტორიული ნაბიჯი არ გადაუდგამს. ეს 8 წელი თურმე სააკაშვილის მძიმე მემკვიდრეობის, დანგრეული ქვეყნის აშენებას დასჭირდა. რაღაც კუთხით შეიძლება ასე იყოს, მაგრამ ეკონომიკაში, ინსტიტუციურ წესრიგში ვერ დაიკვეხნის, რომ რამე გამოასწორა, პირიქით, დეგრადაციისკენ წავიდა. კი ბატონო, ეს ხელისუფლება უფრო ჰუმანურია, ერთადერთ მიღწევად შეიძლება ეს ჩაითვალოს.

- "დემოკრატიის ხარისხი რომ გაიზარდა” არც ამაში ეთანხმებით?

- რომელ ხარისხზეა ლაპარაკი, როცა მართლმსაჯულების სისტემა იგივე დატოვა? ეს ხელისუფლება შეიძლება ნაკლებად აგრესიულია, მაგრამ მან ყველა მანკიერება ძალაში დატოვა. რომელ მანკიერებაზე თქვა მან სისტემური უარი - მოსმენებზე, მურუსიძე შეცვალა, თუ რა? - არაფერი გაუკეთებია. სისტემა მთლიანად გადმოიბარა და ჩაიხუტა ერთადერთი კრიტერიუმით, რომ ვინც სისტემიდან მიშას შეაგინებდა, ყველა თავისიანად ჩათვალა, მეტი არაფერი. სისტემას მორალი და ზნეობა ხომ არ აქვს. დღეს მიშას შეაგინებს, ხვალ - ბიძინას, რა პრობლემაა?

- პროგრამაზე რას იტყვით?

- არანაირ პროგრამაზე არაა ლაპარაკი. ჯერ ერთი, დღეს ქვეყანას ორი ძირითადი შიში მართავს - შიმშილის და სიკვდილის შიში და მას არც ერთ ამ თემაზე კონკრეტული არაფერი უთქვამს. დღეს ადამიანებს აწუხებთ კოვიდინფექციასთან დაკავშირებით თემები და მეორე - საკმაოდ სწრაფი ინფლაციური პროცესი, ლარის ვარდნის ფონზე. ივანიშვილი არცერთ ამ თემას არ შეხებია და რაზე ვლაპარაკობთ? - სხვა პარტიებმა ასე თუ ისე, რაღაც საჭირბოროტო თემები მაინც წამოსწიეს ამ წინასაარჩევნოდ...

ივანიშვილი თვლის, რომ არ სჭირდება, ის არჩევნების მოგებას ხომ არ აპირებს? აპირებს არჩევნების ყიდვას იმ ფონზე, რომ სხვები ჩემზე უარესები არიან. დაიღალა ეს კაცი, ამოუვიდა ყელში ყველაფერი, არც ეს უნდა, არც ის უნდა, ის მხოლოდ საკუთარ სიმშვიდეზე, მეტი აღარაფერზე ზრუნავს. ქვეყანას რომ რაღაც უკეთესობას მოუტანს, ამაზე აღარც ლაპარაკობს.

- "ოცნების” სიას რაც შეეხება, როგორ გამოიყურება ის, რამდენად პერსპექტიულია, რა კრიტერიუმებით შეირჩა სახეები და ერთმანეთთან რა აკავშირებთ ამ ადამიანებს?

- სია შეირჩა კლასიკური საბჭოური კრიტერიუმით და რა მნიშვნელობა აქვს, სიაში ვინ ეწერება? ამ ადამიანებს არაფერიც არ აკავშირებთ, ისინი უბრალოდ ჩაწერეს სიაში. ამ სიის განხილვას რა მნიშვნელობა აქვს? ეს არის საბჭოური კლასიკური სისტემა, როდესაც ვიღაცის ძალაუფლების უზრუნველსაყოფად ვიღაც ადამიანებს, უბრალოდ, წერდნენ სიაში. ამ სიაში რამე პოლიტიკური გადაწყვეტილებები მიიღება, პოლიტიკოსები იქნებიან, თუ რა? მათი სიის განხილვას არანაირი მნიშვნელობა არ აქვს, გადაწყვეტილება უკვე მიღებულია და ამ სიამ მერე ის გადაწყვეტილება უნდა გააფორმოს, მეტი ფუნქცია ხომ არ აქვს?

- ამ შემადგენლობით "ოცნების” არჩევნებში პერსპექტივაზე რას იტყვით?

- ძალიან ბუნდოვანი სიტუაციაა. ბუნებრივია, დღეს "ოცნების” პოზიციები ძლიერია სხვა ოპოზიციურ პარტიებთან შედარებით, მაგრამ ეს იმას არ ნიშნავს, რომ მათ რამე გარანტირებული აქვთ. ყოველ წუთს რაღაც შეიძლება შეიცვალოს.

- "ნაციონალების” სიაზე და მის პირველ ნომერზე რას იტყვით? ეს სააკაშვილის მორიგი ექსპერიმენტია?

- "ნაციონალების” და "ოცნების” სიაც ერთი ალგორითმია. ბუბა კიკაბიძის სიაში ჩასმაში არის რაღაც პოლიტიკური ლოგიკა იმიტომ, რომ გამომდინარე იქიდან, რომ ამ პარტიის უპირობო ლიდერი არის სააკაშვილი, ის ამ სიაში ვერ მოხვდებოდა და, შესაბამისად, სხვა პოლიტიკოსის ჩასმა გარკვეულ უხერხულობას გამოიწვევდა. ამიტომ ჩასვეს ადამიანი, რომელსაც არ აქვს პოლიტიკური ამბიციები და გამოცდილება და, შესაბამისად, ეს უხერხულობა თავიდან იქნა აცილებული.