144 ბათუმში, 29 თბილისში - როგორ ნაწილდება კორონავირუსის 196 ახალი შემთხვევა რეგიონების მიხედვით?

ინფექციური საავადმყოფოს სამედიცინო დირექტორის მარინა ეზუგბაიას განცხადებით, კორონავირუსის 196 ახალი შემთხვევიდან 144 ბათუმში დაფიქსირდა.

როგორც მარინა ეზუგბაია ჟურნალისტებთან აცხადებს, ახალი შემთხვევებიდან 29 თბილისში დადასტურდა.

„დაგვემატა 196 შემთხვევა და გვაქვს 2758 დადასტურებული შემთხვევა. 196-დან აჭარა-ბათუმში არის - 144, ქობულეთში - 1 შემთხვევა, თბილისში - 29 დადასტურებული შემთხვევა, იმერეთი-ქუთაისი არის - 7 შემთხვევა, საჩხერე -1, შიდა ქართლი-გორი - 4 შემთხვევა, ქვემო-ქართლი-გარდაბანი - 3, გურია-ოზურგეთი - 4 , ზემო სვანეთი-სამეგრელო-ზუგდიდი - 2, ფოთი - 1, მცხეთა - 1 შემთხვევა“, - განაცხადა ეზუგბაიამ.

მარინა ეზუგბაიას განცხადებით, ბათუმის გარდა, სხვა რეგიონებში კორონავირუსის გავრცელება იკლებს, თბილისი კი ზომიერ, კონტროლირებად მატებას ინარჩუნებს.

„გაძლიერებული ტესტირების გამო რაოდენობის ზრდის მოსაზრება რჩება. ახალი შემთხვევების გამოვლენა, რა თქმა უნდა, გაძლიერებულია. ახალ- ახალი წერტილები გაჩნდა, მაგრამ ვხედავთ, რომ აჭარაში არის ძირითადი ნაწილი. დანარჩენ რეგიონებში თითქმის ლოკალიზაციისკენ მივდივართ. თუ ყოველდღიურ მონაცემებს შევაჯერებთ, მატება არცერთ რეგიონში არ არის, ყველა რეგიონში მცირდება, თუ არ მცირდება იგივე მონაცმები რჩება.

თბილისი ინარჩუნებს ზომიერ კონტროლირებად მატებას. ბათუმის 144 პაციენტის ძირითადი, უმეტესი ნაწილი კონტაქტირებულია და მოგზაურობის ისტორია აქვს“, - განაცხადა ეზუგაბაიმ.

რაც შეეხება თბილისის ინფექციურ საავადმყოფოს, მარინა ეზუგბაიას ინფორმაციით, საავადმყოფოში 1 კრიტიკულად მძიმე და 3 მძიმე პაციენტი რჩება.

„ბოლო 24 საათში ინფიცირებულების დიდი ნაწილი, კვლავ აჭარაზე მოდის, რის გამოც განსაკუთრებით მნიშვნელოვანი ძალებია მიმართული აჭარისკენ. იმედი გვაქვს, ძალიან მალე მოხდება შემცირება, ლოკალიზება და ლიკვიდაციაც აჭარის სივცეში.

რაც შეეხება გამოჯანმრთლებულებს, გამოჯანმრთელებული მხოლოდ 31 გვყავს. ჩვენს ცენტრში 33 პაციენტი მკურნალობს. 1 კრიტიკულად მძიმე და 3 მძიმე პაციენტი რჩება, დანარჩენების მდგომარეობა საშუალო და მსუბუქი მიმდინარეობის არის “, - განაცხადა მარინა ეზუგბაიამ.