"ჩაკეტვა არ ნიშნავს, ვირუსის აღმოფხვრას" - კორონავირუსით ინფიცირების შემთხვევები მატულობს, გამოცხადდება თუ არა ისევ საგანგებო მდგომარეობა?

საქართველოში კორონავირუსის შემთხვევები სულ უფრო იმატებს. უკანასკნელი ერთი კვირის განმავლობაში ქვეყანაში ყოველდღიურად COVID-19 -ის ოცზე მეტი შემთხვევა ფიქსირდება. 8 სექტემბერს კი ქვეყანაში დღე-ღამეში კორონავირუსის რეკორდული რაოდენობა - 45 ახალი შემთხვევა გამოვლინდა და ინფიცირებულთა სრული რაოდენობა 1729 გახდა.

7 სექტემბერს ცნობილი გახდა, რომ ბათუმსა და ქობულეთში სასწავლო პროცესი კვლავ ონლაინ განახლდება და 1-ლ ოქტომბრამდე ასე გაგრძელდება. ასევე მკაცრდება დახურულ სივრცეებში, სოციალური და სარიტუალო ღონისძიებების კონტროლი. 15 სექტემბრიდან კი ყველა უცხოელს, რომელიც საქართველოს საზღვარს გადმოკვეთს, მოუწევს PCR ტესტის პასუხის წარდგენა.

რეგიონების მიხედვით, ვირუსი ბოლო მონაცემებით, აჭარასა და გურიაში გააქტიურდა.

ისევ გამოცხადდება თუ არა საგანგებო მდგომარეობა საქართველოში, რას ამბობს კორონავირუსის გავრცელების სტატისტიკა და როგორია სახელმწიფოს მზაობა ვირუსის მზარდ შემთხვევებთან გამკლავების თავასაზრისით - ამ კითხვებით AMBEBI.GE -მ სპეციალისტებს მიმართა.

ჯანდაცვის მინისტრის მოადგილის, თამარ გაბუნიას განცხადებით, კორონავირუსის დადასტურებული შემთხვევების მატება არ ნიშნავს სახიფათო გავრცელებას, ახალი ტალღის დაწყებას ან საგანგაშო სურათს.

როგორც გაბუნიამ აღნიშნა, დღევანდელი მდგომარეობით, ამ ეპიდემიოლოგიურ სურათზე დაყრდნობით, საგანგებო მდგომარეობის გამოცხადების ან შეზღუდვების დაწესების საფუძველი არ იკვეთება.

"შემთხვევების ოდენობა, ბოლო პერიოდში, გაიზარდა და როგორც იცით, მათი უმრავლესობა უკავშირდება ბათუმში საკონტიდრო "დონას“ კლასტერს და მასთან დაკავშირებულ კონტაქტებს. რაც შეეხება იმას, თუ რამდენად არის ის სახიფათო გავრცელება და რამდენად ნიშნავს ეპიდემიოლოგიურად ახალი ტალღის დაწყებას ან საგანგაშო სურათს, მხოლოდ ერთჯერადი აბსოლუტური რიცხვების შეფასებით ამის თქმის საფუძველი, რა თქმა უნდა, არ გვაქვს. სამინისტრო დაავადებათა კონტროლის ეროვნულ ცენტრთან ერთად დააკვირდება ეპიდემიოლოგიურ სურათს. ამასთან, ჩვენ დავამუშავეთ ე.წ კორონას შუქნიშანი, რომელიც ადგენს სპეციალურ მაჩვენებლებს იმისთვის, რომ ჩვენ შევაფასოთ რისკები. დღეს ქვეყანა კვლავაც რჩება მწვანე ზონაში. ეს გამოითვლება 100 ათას მოსახლეზე ინფექციის გავრცელების მაჩვენებლით. ბოლო ორი კვირის ჯამური მაჩვენებელი, ამ კონკრეტულ შემთხვევაში, არის 7-ი 100 ათას მოსახლეზე. ათის ჩათვლით ეს ითვლება რომ არის მწვანე ზონა, იმ მოდელში, რომელიც ჩვენ დღეს გვინდა საბჭოს გავუზიაროთ, ყვითელი ზონა არის 100 ათას მოსახლეზე 10-30 შემთხვევამდე, 30 შემთხვევის ზემოთ უკვე იგულისხმება წითელი ზონა.

აქ მნიშვნელოვანი იქნება რეგიონული ანალიზიც, ცალკე აჭარის ეპიდემიოლოგიური სურათის გაანალიზება, მაგრამ შემთხვევების ერთეული მატება, თუნდაც რამდენიმე ათეულ შემთხვევასთან გვქონდეს საქმე, ჯერ კიდევ არ არის განგაშის საფუძველი. ამას სჭირდება ჩაღმავებული ეპიდემიოლოგიური ანალიზი, რასაც ვაკეთებდით და შესაბამისი ღონისძიებები დაიგეგმება ამის შესაბამისად“, - განაცხადა თამარ გაბუნიამ.

ჯანდაცვის მინისტრის მოადგილის მოსაზრებას იზიარებს ინფექციური საავადმყოფოს ბოქსირებული განყოფილების ხელმძღვანელი. მარინა ენდლაძე AMBEBI.GE -სთან აცხადებს, რომ ვირუსის შემთხვევები კიდევ მოიმატებს, თუმცა ეს იმას არ ნიშნავს, რომ საგანგებო მდგომარეობის გამოცხადება გახდება საჭირო.

"ველოდით გარკვეულწილად ასეთ სტატისტიკას. რამ გამოიწვია ვირუსის შემთხვევების მატება - რამდენიმე ფაქტორმა: რეგულაციები მოიხსნა, ზაფხული პერიოდი იყო, მოსახლეობა აქტიურად დადიოდა დასასვენებლად, ყურადღებაც მოვადუნეთ თითქოს და ა.შ. მე მაინც მგონია, რომ საგანგებო მდგომარეობის გამოცხადება არ გახდება საჭირო, არც ქალაქები ჩაიკეტება, რადგან ახლა რაც გვაქვს მოცემულობა, ამას გაუმკლავდება ჩვენი ჯანდაცვის სისტემა", - განუცხადა AMBEBI.GE -ს ენდელაძემ.

ინფექციონისტი მაია ბუწაშვილი საგანგებო მდგომარეობის გამოცხადებისა და ქალქების ჩაკეტვის ნეგატიურ მხარეზე ამახვილებს ყურადღებას და ამბობს, რომ ეს მხოლოდ უკიდურეს შემთხვევაში უნდა მოხდეს.

"სტატისტიკა, რაც გვაქვს ბოლო პრიოდში, არ იძლევა იმის თქმის საფუძველს, რომ რაიმე საგანგაშო შემთხვევასთან გვაქვს საქმე. მაგრამ გასაკვირი არ იქნება, თუ მივიღეთ შემთხვევების აღმავლობა. რადგან ანალოგიური სურათი ჩვენ ვნახეთ არაერთ ქვეყანაში. როდესაც გაკვეული პერიოდი ნარჩუნდებოდა სტაბილური სიტუაცია და შემდეგ ისევ იფეთქა ვირუსმა. ასე მოხდა ჩვენს მეზობელ ქვეყნებშიც. თუნდაც რუსეთის მაგალითი ავიღოთ. ამიტომ ასეთ სცენარს შესაძლოა ჩვენთანაც ველოდოთ. ჩვენ არც გვქონია იმის ილუზია, რომ ნადრევად გვეზეიმა კორონავირუსის დამარცხება. იმედია, ეს სტატისტიკა შენარჩუნდება და ამას გავუკლავდებით. ბევრმა ქვეყანამ დაინახა, მიუხედავად იმისა, რომ გავრცელება იმატებს, საგანგებო მდგომარეობის გამოცხადებამ ბევრი ნეგატიური ეფექტი მოიტანა. საერთოდ, საგანგებო მდგომარეობის გამოცხდება, ქალაქების ჩაკეტვა არ არის განსაკუთრებულად ეფექტიანი. ჩვენმა შემთხვევამაც გვაჩვენა, რომ როდესაც გახსნი ჩაკეტილ სივრცეს, იწყებს ვირუსი გავრცელებას. ჩაკეტვა არ ნიშნავს, ვირუსის აღმოფხვრას, ესაა შეჩერება ვირუსის იმისთვის, რომ ჯანდაცვის სისტემამ გარკვეული დრო მოიგოს ვირუსთან საბრძოლველად", - აცხადებს AMBEBI.GE -სთან მაია ბუწაშვილი.

ინფექციონისტები აცხადებენ, რომ კორონავირუსის გამოვლენასა და მიმდინარეობის თავისებურებებთან დაკავშირებით ბოლო პერიოდში რაიმე განსაკუთრებული სიახლე არ შეინიშნება. გარდა იმისა, რომ საკარანტინე ვადა 12 დღიდან 8 დღემდე შემცირდება.

როგორც ჯანდაცვის მინისტრის მოადგილე, თამარ გაბუნიამ განაცხადა, კარანტინის ვადის 8 დღემდე შემცირების შემთხვევაში, კარანტინსა ან თვითიზოლაციაში მყოფ პირს, საკარანტინე სივრცის დატოვებიდან მომდევნო 72-72 საათში PCR ტესტის ჩატარება 2-ჯერ მოუწევს.

მისივე თქმით, საკარანტინო რეჟიმის 12-იდან 8 დღემდე შემცირება, ოპტიმალური მოდელია.

კარანტინის ვადის შემცირებას დადებითად აფასებს ინფექციონისტი მაია ბუწაშვილი. იგი მიიჩნევს, რომ შემთხვევების აბსოლუტური უმეტესობა სწორედ 8 დღეში ვლინდება.

"სტატისტიკამ აჩვენა, რომ კორონავირუსის გამოვლენა ძირითადად მოხდა ერთ კვირაში და მხოლოდ ერთეული შემთხვევები იყო ორი კვირის ვადაში. ამიტომ ალბათ აწონ-დაწონეს ის ხარჯი, რაც ორი კვირა ადამიანის კარანტინში შენახვა უჯდება სახელმწიფოს და მიიჩნიეს, რომ არ არის საჭირო ამხელა ვადა", - აცხადებს ბუწაშვილი.