"თვალწინ არის ყველაფერი: კვალის წაშლა, ხელის დაფარება - ძალიან დაგვიანდა, უკვე 45 დღე გავიდა" - თამარ ბაჩალიაშვილის ავტომობილს ექსპერტიზა უტარდება

თვალწინ არის ყველაფერი, კვალის წაშლა, ხელის დაფარება. ძალიან დაგვიანდა ექსპერტიზა, უკვე 45 დღე გავიდა, - ამის შესახებ თამარ ბაჩალიაშვილის მამამ, ჯუმბერ ბაჩალიაშვილმა რუსთავის პოლიციაში, მისი შვილის კუთვნილი ავტომობილის ექსპერტიზის დაწყებამდე განაცხადა.

ჯუმბერ ბაჩალიაშვილის განცხადებით, ის იმედგაცრუებულია, რადგან ავტომობილის აღმოჩენიდან 1 კვირის თავზე უკვე ითხოვდნენ ექსპერტიზას.

„ფაქტს ვხედავთ, მანამდე რაც ხდებოდა. ახლაც ნახავთ როგორი ექსპერტიზა ჩატარდება, გავიგებთ ცოტა ხანში. იმედი არ მაქვს, იმედგაცრუებული ვარ ამაზეც, ავტომობილის აღმოჩენიდან 1 კვირაში უკვე ვითხოვდით ექსპერტიზას. ხომ ხედავთ, თვალწინ არის ყველაფერი - კვალის წაშლა, ხელის დაფარება. ძალიან დაგვიანდა ექსპერტიზა, 45 დღე გავიდა უკვე, დროს სპეციალურად წელავენ და ვის აფარებენ ხელს არ ვიცი,” - აღნიშნა ჯუმბერ ბაჩალიაშვილმა.

შეგახსენებთ, რომ ამ წუთებში თამარ ბაჩალიაშვილის კუთვნილ ავტომობილს ექსპერტიზა უტარდება.

დღევანდელ ექსპერტიზას „ჰიუნდაის" წარმომადგენლები, ლევან სამხარაულის სახელობის სასამართლო ექსპერტიზის ეროვნული ბიუროს დამოუკიდებელი ექსპერტები და ექსპერტ-კრიმინალისტები ატარებენ.

როგორც ექსპერტიზის დაწყებამდე ოჯახის ადვოკატმა, მიხეილ რამიშვილმა განაცხადა, დღევანდელი ექსპერტიზით დეტალურად იქნება გამოკვლეული ავტომობილის მდგომარეობა გადაადგილების პროცესში.

„ექსპერტიზა არ დაგვიანებულა, გვინდოდა დიაგნოსტიკური აპარატის შეძენა, რის გამოც დავუკავშირდით „ჰიუნდაის“ სათაო ოფისს და გავარკვიეთ, რა ინფორმაცია შეიძლებოდა ამ ავტომობილიდან მიგვეღო. იქნებიან „ჰიუნდაის“ წარმომადგებელი, ლევან სამხარაულის ექსპერტიზის ბიუროდან ექსპერტი და რა კითხვებიც გვაქვს ყველაფერს დეტალურად განვიხილავთ. ექსპერტიზა ეხება ავტომობილის სავალ ნაწილებს, რამდენად შეეძლო მას დამოუკიდებლად გადაადგილება, შევხედავთ შიგნიდანაც მდგომარეობას, გავარკვევთ რა მანძილი გაიარა, ყველაფერი ეს ტექნიკური საკითხებია," - აღნიშნა მიხეილ რამიშვილმა.

ცნობისთვის, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5 - დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.