საქართველოში კორონავირუსის 9 ახალი შემთხვევაა - Stopcov.ge-მ მონაცემები განაახლა

საქართველოში კორონავირუსის 9 ახალი შემთხვევა გამოვლინდა და ჯამში, ინფიცირებულთა რაოდენობა 1206-მდე გაიზარდა. ამის შესახებ ინფორმაცია მთავრობის სპეციალურ ვებ-გვერდ stopcov.ge-ზე გამოქვეყნდა. რაც შეეხება გამოჯანმრთელებულებს, მათი რიცხვი 13-ით გაიზარდა და 987-ს შეადგენს.

კარანტინის რეჟიმში 7071 მოქალაქე იმყოფება. სტაციონარში მეთვალყურეობის ქვეშ - 294.

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, საქართველოში გამოვლენილი კორონავირუსით ინფიცირების 9 ახალი შემთხვევიდან 7 იმპორტირებული შემთხვევაა, მათგან 3 სატვირთო ავტომობილის მძღოლია. როგორც მან ჟურნალისტებთან განმარტა, 2 შემთხვევასთან დაკავშირებით კონტაქტების კვლევა მიმდინარეობს.

„დაგვემატა 9 დადასტურებული შემთხვევა და ახლა 1206 დადასტურებული შემთხვევა გახლავთ. გამოჯანმრთელებულების რიცხვი 13-ით გაიზარდა და 987-ს შეადგენს. ამ მონაცემებით, გამოჯანმრთელებულების პროცენტი 81.8 % გახლავთ, ხოლო კოვიდ ცენტრებში დღევანდელი მონაცემებით, დადასტურებული შემთხვევებით 240 პაციენტი მკურნალობს.

9 ახალი შემთხვევის განაწილება ასეთია-7 არის იმპორტირებული შემთხვევა, მათგან 3 სატვირთო ავტომობილის მძღოლია. 2 შემთხვევასთან დაკავშირებით მიმდინარეობს კონტაქტებისა და წყაროს დადგენის კვლევა“, - განაცხადა ეზუგბაიამ.

კორონავირუსის შედეგად ქვეყანაში 17 პაციენტი გარდაიცვალა. ამასთან, უცხოეთიდან სამკურნალოდ გადმოყვანილია საქართველოს 41 მოქალაქე.