"2 წლის შვილს შევპირდი, რომ შოუში გამოვიდოდი... სცენაზე ჩემს ვიდეოს დღეში 4 საათი უყურებს" - "დიდი სცენის" მონაწილე, ჟიურის ემოციური შეფასებით

„გიორგი გასვიანი 24 წლის, თბილისიდან, უმაღლესი განათლებით, დამთავრებული მაქვს საერთაშორისო ურთიერთობები, პროფესიით არ ვმუშაობ, ვარ დაოჯახებული და მყავს 2 წლის გოგონა - თაია გასვიანი“ - ასე გაგვეცნო „დიდი სცენის“ კონკურსანტი, რომელსაც 2 წლის შვილი თურმე ძალიან გულშემატკივრობს. შვილთან ერთად, საგულშემატკივროდ ახლა ფანების გუნდიც უნდა შეიკრიბოს, რადგან გიორგი მეგაპროექტის მონაწილეა. ჟიურიმ შეაქო და წარმატებები უსურვა, ამით კი სტიმული მიეცა.

გიორგი გასვიანი:

- ბავშვობიდან მეუბნებოდნენ, რომ სიმღერის ნიჭი მქონდა, მაგრამ ამას არასდროს დიდ ყურადღებას არ ვაქცევდი. ახლა მგონია, რომ ცხოვრებაში ის ეტაპი დამიდგა, რომ რაღაც რადიკალური გადაწყვეტილებები მივიღო მუსიკალური კუთხით, რომ განვვითარდე.

მუსიკა ყველაზე დიდ სიამოვნებას მანიჭებს, რასაც დედამიწაზე შეიძლება, რამე მანიჭებდეს. არასდროს არსად მივლია, თვითნასწავლი მუსიკოსი ვარ, ვუკრავ გიტარაზე და კლავიშზეც - ინსტრუმენტალისტიც ვარ.

- რატომ არ მიხვედით პედაგოგთან?

- მცდელობა მქონდა, კონკრეტული განხრით ვოკალის პედაგოგთან მივსულიყავი, მაგრამ ვხედავდი, რომ ყველა პედაგოგი ცდილობდა, რაღაც კლიშეებსა და ჩარჩოებში მოექციე, ინდივიდუალიზმს გართმევდა. მივხვდი, რომ ჩემით უნდა განვვითარებულიყავი.

რაც შეეხება ინსტრუმენტს, მემარცხენე ვარ და საქართველოში ვერ ვიპოვე მემარცხენე პედაგოგი, რომელიც დაკვრას მემარჯვენე წყობით ასწავლიდა. მინდოდა, რომ ჩემით მესწავლა.

- ვისი რჩევით მოხვდით პროექტში „დიდი სცენა“ და ან რით მიგიზიდათ ამ შოუმ?

- პატარ-პატარა ვიდეოებს ვწერდი და ჩემს გვერდებზე სხვადასხვა სოციალურ ქსელში ვდებდი. ჩემს შვილს მისი ყურება ძალიან მოსწოდა. დიდი ინტერესით და ყურადღებით უყურებდა. მერე ვუთხარი, - ნახე, რა უნდა ვქნა-მეთქი?! შევპირდი, რომ შოუში გამოვიდოდი. ტელევიზიით დამინახა უკვე სცენაზე და იმ ვიდეოს დღეში 4 საათი მაინც უყურებს.

- მასაც ხომ არ აქვს მუსიკალური მონაცემები?

- ლაპარაკზე ადრე სიმღერა დაიწყო. ყველაფერს სწორად მღეროდა.

- როგორ გინდათ, რომ კონკურსზე საკუთარი თავი წარმოაჩინოთ?

- გულწრფელი რომ ვიყო და არ მოგატყუოთ, აქ იმისთვის არ მოსულვარ, რომ ცნობილი სახე გავხდე და რაღაც მსგავსი. ასეთი მიზნები ნაკლებად მაქვს. მინდა, რომ გავიმარჯვო, ეს მიზანი კი ნამდვილად მაქვს და მგონია, წარმატებას მივაღწევ.

- ე.ი. საკუთარი თავის გჯერა.

- მგონია, რომ მინიმუმ ფინალში უნდა ვიყო.

- ნიკოლოზ რაჭველს მოეწონე...

- ჟიურისგან ზოგადად ძალიან დიდი კეთილგანწყობა ვიგრძენი. თითოეული წევრი ერთმანეთზე უკეთეს რაღაცებს მეუბნებოდა, რამაც სტიმული ნამდვილად მომცა. მიხარია, რომ ჩემი ოჯახის წევრების შეფასებებს გასცდა ეს. ჟიურიმაც ზუსტად იგივე მითხრა, რასაც სახლში სულ მეუბნებოდნენ. ცხადია, დიდმა მაესტრომაც იგივე აღნიშნა. ამან კი თვითშეფასება ამიმაღლა.

- ოჯახის წევრები მღერიან?

- მღერიან და უკრავენ. მეუღლე დიჯეინგითაა დაკავებული, მუსიკას თავისთვის ქმნის, მე ვმღერი, მამა, ბაბუა, დიდი ბაბუა - ყველანი ვოკალისტები და ინსტრუმენტალისტები იყვნენ თავიანთ მიმართულებაში. მუსიკალური მიმდინარეობიდან სოული და არენბი ძალიან მომწონს.

- მაგრამ პროექტში სხვადასხვა ჟანრის მორგება მოგიწევს. მზად ხარ?

- რა თქმა უნდა. ზოგადად ჩემი პლატფორმა ინსტაგრამი იყო, სადაც საკუთარ თავს წარვადგენდი. ძალიან კომფორტულად ვგრძნობდი თავს და იმიტომაც არ მოვდიოდი მეგაპროექტში. ვფიქრობდი, არ ვიყავი საკონკურსო ვოკალისტრი, რომელიც ყველაფერს შეასრულებდა. ახლა რადგან უკვე გავედი, ვთვლი, რომ ყველა ჟანრს თავს გავართმევ და მზად ვარ პროექტში მონაწილეობისთვის.