"მგონი ძალიან კარგ ადგილას ვარ... 69 წლის ვარ და ჩეთვის ეს გზა გავლილია" - ამირან გამყრელიძის პასუხი პოლიტიკაში შესაძლო მოსვლასთან დაკავშირებით

ერთსა და იმავე მდინარეში არ შედიან სამჯერ, - ასე უპასუხა დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ მის პოლიტიკაში მოსვლასთან დაკავშირებით დასმულ კითხვას.

მისი თქმით, ის ცდილობს ქვეყანას იმ პოზიციიდან გამოადგეს, სადაც ახლა მუშაობს და არანაირი სურვილი არ აქვს პოლიტიკაში მოსვლის.

"არ ვიცი რამდენად იცით ჩემი ბიოგრაფია - მე პოლიტიკაში ვიყავი 1994 წლიდან 2004 წლამდე, როცა დავტოვე პოსტი. მეორედ ამის შემოთავაზება იყო 2012 წელს. 69 წლის ვარ და ჩემთვის ეს გზა გავლილია, დამთავრებულია. მე ვცდილობ ჩემი ცოდნით და გამოცდილებით გამოვადგე ჩემს ქვეყანას, იქ სადაც ვარ. მაქვს ძალიან ბევრი გეგმები, კარგი ახალგაზრდები იზრდებიან ჩვენთან, ვაძლევ მათ საშუალებას მეტად გაიზარდონ, განვითარდნენ. ხომ ხედავთ, დაავადებათა კონტროლის ცენტს რამხელა მნიშვნელობა ჰქონია ამ გამოწვევებთან ბრძოლაში?

ასე რომ, მე მგონია, ძალიან კარგ ადგილას ვარ და არავითარი სურვილი არ მაქვს პოლიტიკაში დაბრუნების. ერთი და იმავე მდინარეში არ შედიან სამჯერ" - უპასუხა გამყრელიძემ შეკითხვას.