10 ქვეყანა, სადაც COVID-19-ით ყველაზე მეტი ინფიცირებული ჰყავთ - როგორ შეიცვალა მსოფლიოში ეპიდსიტუაცია

მსოფლიო კორონავირუსის დამარცხებას ჯერ ვერ ახერხებს. 11 მარტის შემდეგ პანდემიაა გამოცხადებული და მილიონობით ადამიანი კარანტინის წესებს ემორჩილება. ბოლო კვირებია ქვეყნებმა ვირუსის გავრცლების პრევენციის მიზნით შემოღებული წესების შემსუბუქება დაიწყეს, თუმცა ეს არ ნიშნავს, რომ ის დამარცხებულია.

ექსპერტები უკვე აქტიურად საუბრობენ COVID-19-ის შესაძლო მეორე ტალღაზე და ამავდროულად, განიხილავენ იმას, რომ ადამიანებმა ამ ვირუსთან ერთად ცხოვრება უნდა ისწავლონ, თუმცა რთული წარმოსადგენია, ეს როგორ უნდა მოხერხდეს იმ ფონზე, რომ ჯერჯერობით ვირუსის საწინააღმდეგოდ არც მედიკამენტები და არც ვაქცინა არ არსებობს.

კორონავირუსი ჩინეთის ქალაქ უხანიდან გავრცელდა, თუმცა ვირუსმა სხვა ქვეყნები უფრო დააზარალა. ჩინეთი ამ ეტაპზე ინფიცირებულთა რაოდენობის მიხედვით, ოფიციალური მონაცემებით მსოფლიოს მე-14 ქვეყანაა.

ინფიცირებულთა რაოდენობის მხრივ ათეული ასეთია - აშშ, ბრაზილია, რუსეთი, ესპანეთი, დიდი ბრიტანეთი, იტალია, საფრანგეთი, გერმანია, თურქეთი და ინდოეთი.

ვნახოთ, როგორია ეპიდსიტუაცია ჩამოთვლილ ქვეყნებში, სად იზრდება ახალი ინფიცირებულების რაოდენობა და სად შეინიშნება კლება.

• აშშ

ამერიკის შეერთებული შტატები კორონავირუსის პანდემიამ ყველაზე მეტად დააზარალა. ბოლო მონაცემებით, იქ 1 686 436 ინფიცირებულია აღწერილი. ვირუსით 99 300 ადამიანია გარდაცვლილი, ხოლო 451 702 გამოჯანმრთელებული. COVID-19-ის ყველაზე მეტი შემთხვევა ნიუ იორკის შტატშია გამოვლენილი. ქვეყანაში ბოლო ოთხი დღეა ახალი ინფიცირებულების კლების დინამიკა შეინიშნება, თუმცა რაოდენობა მაინც დიდია. თუ 21 მაისს ვირუსის 28 175 შემთხვევა გამოვლინდა, 24 მაისს COVID-19-ით 19 608 ინფიცირებული აღწერეს.

შტატების პრეზიდენტი დონალდ ტრამპი ვირუსის ხელოვნურად გავრცელებაში ჩინეთს სდებს ბრალს, ის ასევე ჯანდაცვის მსოფლიო ორგანიზაციასაც ადანაშაულებს და აცხადებს, რომ ჩინეთმა და ჯანმომ მსოფლიოს ვირუსის შესახებ რეალური სურათი დაუმალეს.

• ბრაზილია

ბრაზილიაში ეპიდსიტუაცია ბოლო კვირების განმავლობაში მკვეთრად გაუარესდა და ის უკვე ინფიცირებულთა რაოდენობის მიხედვით, მსოფლიოს მეორე ქვეყანაა. ამ დროისთვის ბრაზილიაში COVID-19-ის 365 213 დადასტურებული შემთხვევაა გამოვლენილი, გარდაცვლილია 22 746 ადამიანი, ხოლო გამოჯანმრთელებულია 149 911 პაციენტი.

ქვეყნის საავადმყოფოები ინფიცირებულებს ვეღარ იტევს. ვრცელდება შემზარავი ფოტოები, რომლებზეც კორონავირუსით გარდაცვლილთა მასობრივი საფლავები ჩანს.

აღსანიშნავია, რომ შექმნილ რთულ მდგომარეობაში საზოგადოების ნაწილი პრეზიდენტ ჟაირ ბოლსონარუს ადანაშაულებს. პრეზიდენტი კორონავირუსს "უბრალო გრიპს" უწოდებს. ის თავიდანვე წინააღმდეგი იყო ვირუსის გამო შეზღუდვების დაწესების, ხოლო მედიას პანიკისა და შიშის დანერგვაში ადანაშაულებდა. პრეზიდენტი აკრიტიკებდა ბრაზილიის იმ რეგიონების გუბერნატორებს, რომლებმაც შეზღუდვების დაწესების გადაწყვეტილება დამოუკიდებლად მიიღეს. როდესაც უკვე მკვეთრად გაიზარდა ინფიცირებულთა რაოდენობა, ბოლსონარუს ჟურნალისტებმა საკითხის კომენტირება სთხოვეს, მან კი უპასუხა - "და მერე? რა გინდათ რომ გავაკეთო?“

მიუხედავად ბრაზილიაში შექმნილი რთული ვითარებისა, როგორც ჩანს, ბოლსონარუ ვირუსის საფრთხესთან დაკავშირებით აზრს არ იცვლის. მან რამდენიმე დღის წინ მხარდამჭერებთან გამართა შეხვედრა და მათ წინაშე პირბადისა და ყველანაირი წესების დაცვის გარეშე წარსდგა, რის გამოც, კრიტიკა დაიმსახურა.

• რუსეთი

კორონავირუსით ინფიცირებულთა რაოდენობის მიხედვით, რუსეთი ამ ეტაპზე მსოფლიოს მესამე ქვეყანააა. ოფიციალური ინფორმაციით, იქ ვირუსის 344 481 შემთხვევაა გამოვლენილი, გარდაცვლილია 3 541 პაციენტი, ხოლო გამოჯანმრთელებულთა რაოდენობა 113 299-ს აღწევს.

კულუარული ინფორმაციით, რუსეთში შემთხვევათა რაოდენობა გაცილებით მეტია, ვიდრე ოფიციალურ მონაცემებშია ასახული, ასევე საუბრობენ იმის შესახებაც, რომ ქვეყანაში ეპიდემიამ გაცილებით ადრე იფეთქა და ამის შესახებ ინფორმაცია არ გაახმაურეს.

რუსეთში COVID-19-ით დაინფიცირდნენ სამთავრობო პირები. მათ შორის, ვირუსი დაუდასტურდა რუსეთის პრემიერ-მინისტრს, მიხეილ მიშუსტინს, ასევე პრეზიდენტ პუტინის პრესსპიკერს, დიმიტრი პესკოვს.

რუსეთის კლინიკებში შექმნილი მძიმე მდგომარეობის შესახებ საუბრობს ზოგიერთი ადგილობრივი ექიმი. ისინი სხვადასხვა დასავლურ გამოცემებთან, მათ შორის, BBC-სთან ანონიმურად საუბრობენ იმაზე, რომ არ აქვთ შესაბამისი დამცავი აღჭურვილობა და რომ მუშაობა ინფიცირებულ ექიმებს უწევთ. იყო სამი შემთხვევა, როცა ექიმები კლინიკის მაღალი სართულებიდან გადმოვარდნენ, ერთ-ერთმა მათგანმა მანამდე ვიდეომიმართვა გაავრცელა, სადაც საუბრობდა იმის შესახებ, რომ კორონავირუსით იყო ინფიცირებული, თუმცა მიუხედავად ამისა, მუშაობას აიძულებდნენ.

• ესპანეთი

ესპანეთში კორონავირუსის 282 852 შემთხვევაა გამოვლენილი, გარდაცვლილია 28 752 ადამიანი, ხოლო გამოჯანმრთელებულია 196 958 პაციენტი. მას შემდეგ, რაც ახალი ინფიცირებულების რაოდენობამ იკლო, ესპანეთმა კარანტინის წესების ეტაპობრივად მოხსნა დაიწყო. 11 მაისიდან დაშვებულია 10-ზე მეტი ადამიანის შეკრება. გაიხსნა გარე კაფეებისა და რესტორნების ის ნაწილი, სადაც დიდი სივრცეა და დისტანციის დაცვაა შესაძლებელი. ვარჯიში განაახლეს საფეხბურთო კლუბებმა.

• დიდი ბრიტანეთი

ბრიტანეთი ამ დროისთვის ინფიცირებულთა რაოდენობის მიხედვით, მეხუთე ქვეყანაა. ბოლო მონაცემებით, იქ ვირუსის 259 559 დადასტურებული შემთხვევაა გამოვლენილი, გარდაცვლილია 36 793 ადამიანი. ბოლო ოთხი დღის განმავლობაში ახალი ინფიცირებულების რაოდენობა ყოველ დღე 2000-დან 3000-მდე მერყეობს.

აღსანიშნავია, რომ ბრიტანეთის პრემიერ-მინისტრი ბორის ჯონსონი კარანტინზე თავდაპირველად უარს ამბობდა და "ჯოგური იმუნიტეტის“ გამომუშავებაზე საუბრობდა. ხელისუფლებამ მკაცრი კარატინი მას შემდეგ დააწესა, რაც ინფიცირებულთა რაოდენობა მკვეთრად გაიზარდა.

კორონავირუსით დაინფიცირდა თავად ბორის ჯონსონიც, რომელიც მკურნალობას ინტენსიური თერაპიის განყოფილებაში გადიოდა. ასევე, კორონავირუსი დაამარაცხა დიდი ბრიტანეთის პრინცმა ჩარლზმა, ამ უკანასკნელმა, ჯონსონისგან განსხვავებით, ვირუსი მარტივად და სწრაფად გადაიტანა.

• იტალია

იტალია, რომელიც ევროპაში კორონავირუსის აფეთქების ეპიცენტრი იყო, ინფიცირებულთა რაოდენობის მიხედვით ახლა მსოფლიოს მეექვსე ქვეყანაა. ამ დროისთვის ქვეყანაში COVID-19-ის 229 858 გამოვლენილი, გარდაცვლილია 32 785 პაციენტი, ხოლო 140 479 გამოჯანმრთელდა. ბოლო დღეების განმავლობაში ყოველ დღე 500-დან 600-მდე ახალი შემთხვევა ვლინდება.

მაისის დასაწყისიდან ქვეყანა შეზღუდვების მოხსნის ეტაპზე გადავიდა, ახლა იტალიელებს უკვე შეუძლიათ გარეთ სეირნობა, ნაწილობრივ ამოქმედდა ბიზნესიც და ქვეყანა თანდათან COVID-19-ის შოკიდან გამოდის.

• საფრანგეთი

საფრანგეთში კორონავირუსის 182 584 შემთხვევაა გამოვლენილი და ამ მაჩვენებლით ის მსოფლიოს მეშვიდე ქვეყანაა. ვირუსით გარდაიცვალა 28 367 ადამიანი, ხოლო გამოჯანმრთელდა 64 617. საფრანგეთიც, იტალიის მსგავსად, შეზღუდვების მოხსნის ეტაპზეა. ქვეყანაში გაიხსნა სალონები, ტანსაცმლის მაღაზიები, ყვავილებისა და წიგნების მაღაზიები. ბარები, რესტორნები, თეატრები და კინოთეატრები კვლავ დახურული რჩება.

• გერმანია

ქვეყანაში COVID-19-ის 180 328 შემთხვევაა გამოვლენილი და მსოფლიოში ამ რაოდეობით მერვე ადგილზეა. მიუხედავად ამ ციფრისა, ვირუსთან ბრძოლის გერმანული მოდელი წარმატებულად მიიჩნევა, რადგანაც იქ ინფიცირებულებთან შედარებით, ცოტა გარდაცვლილი ჰყავთ. საერთო ჯამში ვირუსით 8 371 პაციენტია გარდაცვლილი.

აღნიშნულს სპეციალისტები გერმანიის გამართულ ჯანდაცვის სისტემას და კორონავირუსზე ადამიანების მასობრივ ტესტირებას უკავშირებენ. ტესტირება ვირუსის ადრეულ ეტაპზევე გამოვლენის საშუალებას იძლევა, შედეგად კი, COVID-19-სგან განკურნების შანსი უფრო მაღალია. გერმანიაში ამ დროისთვის 161 200 პაციენტია გამოჯანმრთელებული.

• თურქეთი

თურქეთში ამ დროისთვის კორონავირუსის 156 827 შემთხვევაა გამოვლენილი, გარდაცვლილია 4 340 პაციენტი, ხოლო გამოჯანმრთელებულია 57 721. ეპიდსიტუაცია ჯერჯერობით კვლავ კრიტიკულია და ყოველი დღე ახალი ინფიცირებულების რაოდენობა ათასს აღემატება. ჯერჯერობით ქვეყანა კვლავ კარანტინის რეჟიმში ცხოვრობს.

• ინდოეთი

ინფიცირებულთა რაოდენობა მკვეთრად გაიზარდა ინდოეთში. ამ დროისთვის 138 917 შემთხვევაა აღწერილი და ამ მონაცემებით მსოფლიოს მეათე ქვეყანაა. ვირუსით 4 024 ადამიანია გარდაცვლილი, გამოჯანმრთელდა 57 721 პაციენტი. ინდოეთი მკაცრი კარანტინის რეჟიმში ცხოვრობს, მილიონობით ადამიანი სამსახურის გარეშე დარჩა. ექსპერტები ამბობენ, რომ ადგილობრივებს შიმშილი და მძიმე ეკონომიკური სიდუხჭირე ელოდებათ.

ამ ყველაფერს თან დაერთო ბოლო ათწლეულის ყველაზე დიდი ციკლონი "ამფანი“, რომელმაც ბენგალის შტატის დედაქალაქ კალკუტას მოსახლეობას დიდი ზიანი მიაყენა.

ბოლო ინფორმაციით, გლობალური მასშტაბით, COVID-19-ით 5 517 014 ადამიანი დაინფიცირდა, მათ შორის 346 949 გარდაიცვალა, ხოლო 2 310 249 გამოჯანმრთელდა.