ინფიცირებულია საუნივერსიტეტო კლინიკის გინეკოლოგი, რომელსაც ვირუსი სავარაუდოდ, ორსულისგან გადაედო - "მთავარი არხი"

ტელეკომპანია "მთავარის" ინფორმაციით, კორონავირუსით ინფიცირებულია საუნივერსიტეტო კლინიკის ექიმი, რომელსაც ვირუსი სავარაუდოდ, ორსული პაციენტისგან გადაედო.

კლინიკის გინეკოლოგი, რომელსაც კოვიდინფექცია დაუდგინდა, ტელეკომპანიის ჟურნალისტთან თავად საუბრობს იმ სიმპტომებზე რაც გამოუვლინდა, თუმცა ლუგარის ლაბორატორიაში ჩატარებულმა კვლევამ ინფექციაზე უარყოფითი შედეგი აჩვენა. ამჟამად, აღნიშნული გინეკოლოგი საუნივერსიტეტო კლინიკის ბოქსირებულ განყოფილებაში მკურნალობს. ქალის თქმით, ინფიცირებულია მისი შვილიც".

"ლუგარის ლაბორატორიაში, ჩემი პირველი ტესტირების პასუხი იყო უარყოფითი. შემდეგ, მე თავად გადავიღე "კატე" (კომპიუტერული ტომოგრაფია), რადგან მქონდა ტემპერატურული რეაქცია, საღამოს მაძლევდა სიცხეს. დასნებოვდა ჩემი შვილიც, რომელიც მეხმარებოდა სახლში სამსახურის საქმის კეთებაში. პარასკევს სამსახურში გავიკეთე გულ-მკერდის "კატე" კვლევა. ვიფიქრე, ფილტვების ანთება არ გამომეპაროს-მეთქი და ამ კვლევაზე გამოჩნდა "დაბურული მინის" სინდრომი, რაც არის კოვიდინფექციის ერთ-ერთი ნიშანი.

ვიცი რომ ჩემი მდგომარეობის შემდეგ, მთელს ჩემს განყოფილებას, მეანო-გინეკოლოგიას ჩაუტარდა ტესტირება. ჩემი განყოფილების ერთი თანამშრომელი დღეს დააწვინეს საავადმყოფოში თავის მეუღლესთან ერთად" - ამბობს გინეკოლოგი "მთავართან" საუბარში.

ტელეკომპანიის ინფორმაციით, ინფიცირებულია 7 ექიმი და ექთანი, ასევე რამდენიმეს ოჯახის წევრი.

თუმცა, ექიმის ინფიცირების შესახებ ინფორმაციას უარყოფენ საუნვერსიტეტო კლინიკაში. როგორც „ინტერპრესნიუსს“ კლინიკის სამედიცინო დირექტორმა, ლალი ტურძელაძემ განუცხადა, თსსუ-ს პირველ საუნივერსიტეტო კლინიკაში კორონავირუსის დიაგნოზით რამდენიმე მედიკოსი მკურნალობს, თუმცა მათგან მათივე კლინიკის ექიმი არც ერთი არ არის.

საუნივერსიტეტო კლინიკაში კორონავირუსით ინფიცირებულ ორ ორსულ ქალს მკურნალობდნენ, რომლებმაც საავადმყოფო აპრილის შუა რიცხვებში დატოვეს.