როგორია კორონავირუსით ინფიცირებულების მდგომარეობა და სად რამდენი პაციენტი მკურნალობს - ინფორმაცია საქართველოს კლინიკებიდან

თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის ლევან რატიანის განცხადებით, მის კლინიკაში მყოფი ახალშობილების ჯანმრთელობის მდგომარეობა მძიმეა.

როგორც რატიანმა ჟურნალისტებს განუცხადა, მათთან მკურნალობს რამდენიმე ორსულიც, რომელთა მდგომარეობა სტაბილურია.

„გვყავს რამდენიმე ახალშობილი, მათი მდგომარეობა მძიმეა, თუმცა მართვადი, ვინაიდან არცერთი არ იმყოფება მართვით სუნთქვაზე. დანარჩენი პაციენტები იმყოფებიან ინტენსიური თერაპიის განყოფილებაში“, - განაცხადა რატიანმა.

რაც შეეხება კორონავირუსით ინფიცირებულ პირებს, მისივე ინფორმაციით, სამი ინფიცირებულის ჯანმრთელობის მდგომარეობა გაუმჯობესდა.

„ამ დღეებში გავაგზავნით განმეორებით ტესტებს, თუ მოვიდა ორჯერადად უარყოფითი პასუხი, რამდენიმე დღეში დატოვებენ კლინიკას“, - განაცხადა რატიანმა.

როგორც ლევან რატიანმა ჟურნალისტებთან საუბარში განაცხადა, თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკაში კორონავირუსით ინფიცირებული 17 პაციენტი გადის მკურნალობას.

„ჩვენს კლინიკაში 67 პაციენტი წევს, აქედან 17 არის ინფიცირებული, დადასტურებული შემთხვევა, დანარჩენი 50 პაციენტი არის საეჭვო შემთხვევა. მოგეხსენებათ, ჯანდაცვის მსოფლიო ორგანიზაციამ ამოაგდო მოგზაურობის ცნება და აქედან გამომდინარე, ყველა მათგანს, ვინც ჩვენთან კლინიკაში შემოვა, აქვს თუ არა ისტორია მოგზაურობის, ანამნეზი, ცხელება, პლუს სუნთქვის უკმარისობა, ექვემდებარება კოვიდინფექციის გამოკვლევას. რაც შეეხება პასუხებს, რამდენიმე უარყოფითი პასუხი მოვიდა, დღეს გადამოწმდება პარაკლინიკური კვლევები, თუ ეს პარაკლინიკური კვლევები ჯანდაცვის მსოფლიო ორგანიზაციის მოთხოვნებს აკმაყოფილებენ, ასეთი პაციენტები დატოვებენ კლინიკას და გადავლენ საკარანტინო ზონაში. რეანიმაციაში გვყავს რამდენიმე კრიტიკული პაციენტი, მათი მდგომარება ამ ეტაპზე მძიმეა“, - განაცხადა რატიანმა.

რაც შეეხებათ ბოჭორიშვილის კლინიკაში მოთავსებულ პაციენტებს, კორონავირუსით ინფიცირებული მცირეწლოვანი პაციენტების მდგომარეობა დამაკმაყოფილებელია. ვ.ბოჭორიშვილის სახელობის კლინიკის სამეთვალყურეო საბჭოს თავმჯდომარის მაკა სოლოღაშვილის ინფორმაციით, კლინიკაში ამჟამად კორონავირუსით ინფიცირებული სულ 5 პაციენტი მკურნალობს და მათი მდგომარეობა საშუალო სიმძიმისაა. მისივე განცხადებით, გუშინ ტესტირება 7 ადამიანს ჩაუტარდა და მათი პასუხები უარყოფითია.

სოლოღაშვილის თქმით, კორონავირუსზე დღეს კიდევ ორი პაციენტი შემოწმდა, რომელთა პასუხები მოგვიანებით გახდება ცნობილი.

„ჩვენს კლინიკაში არც ერთი ახალი შემთხვევა არ დაფიქსირებულა. გუშინ კვლევაში ჩართული 7 პაციენტიდან ყველაზე უარყოფითი პასუხი მოვიდა. დღეს კვლევაში მხოლოდ 2 პაციენტი ერთვება და მოგვიანებით გვექნება მათი პასუხები. ბოქსირებულ სექტორში მკურნალობს 13 პაციენტი. ამ 13 პაციენტიდან 5 არის კოვიდ19-ის დადასტურებული დიაგნოზი. ამ ხუთი პაციენტის დაავადების მიმდინარეობა არის საშუალო სიმძიმის, კლასიკური სიმპტომებით მიმდინარეობს. აქედან 2 მცირეწლოვანია და მათი ჯანმრთელობის მდგომარეობა აბსოლუტურად დამაკმაყოფილებელია,“ - განაცხადა მაკა სოლოღაშვილმა.

ექიმ-ინფექციონისტის, ლალი დარახველიძის ინფორმაციით, ზუგდიდის ინფექციურ საავადმყოფოში სამი პაციენტია მოთავსებული, მათ შორის ერთს კორონავირუსი აქვს დადასტურებული.

მისივე ინფორმაციით, ერთი პაციენტი ოკუპირებული აფხაზეთიდან არის გადაყვანილი. როგორც დარახველიძემ ჟურნალისტებს განუცხადა, ამ პაციენტზე მასალა ლაბორატორიაშია გადაგზავნილი და დღეს გახდება ცნობილი, აქვს თუ არა მას კორონავირუსი.

„განყოფილებაში ამჟამად მოთავსებულია 3 პაციენტი. ერთი დადასტურებული შემთხვევაა, რომლის მდგომარეობა სტაბილური და დამაკმაყოფილებელია, ერთი არის დაკვირვების ქვეშ და მისი მდგომარეობა გაუმჯობესებულია და ერთი ახალი შემთხვევა, რომელსაც აქვს მოგზაურობის ისტორია, შემოყვანილია აფხაზეთიდან, ჩივილებით ცხელება, ხველა. ამჟამად მდგომარეობა სტაბილურია და მასალა გაგზავნილია ლაბორატორიაში კვლევის მიზნით. პაციენტი არ აღნიშნავს ვინმესთან კონტაქტს, ორნი მოდიოდნენ, ერთი გადაყვანილია სოხუმში, მეორე ჩვენთან”, - განაცხადა დარახველიძემ.

ბათუმში კორონავირუსით ინფიცირებული 70 წლის მამაკაცის ჯანმრთელობის მდგომარეობა კვლავ მძიმეა, ასევე საშუალო სიმძიმისაა ინფიცირებული 60 წლის ქალის მდგომარეობაც. 70 წლის მამაკაცი მართვით სუნთქვაზე იმყოფება, ხოლო 60 წლის ქალს ორმხრივი პნევმონია აღენიშნება.

რაც შეეხება კიდევ ხუთ ინფიცირებულ ადამიანს, ექიმების თქმით, მათი ჯანმრთელობის მდგომარეობა დამაკმაყოფილებელია.

კლინიკა "მედალფას" რეგიონული დირექტორის, ლევან ანთაძის ინფორმაციით, კლინიკას თვითდინებით ერთმა პირმა მიმართა, რომელსაც კვლევის შედეგად კორონავირუსი არ დაუდასტურდა, იგი კლინიკიდან უკვე გაწერეს.

აჭარის ჯანდაცვის სამინისტროს ინფორმაციით, ბათუმის ინფექციური საავადმყოფოს ბოქსირებულ განყოფილებაში მოთავსებულ ოთხ ადამიანს კორონავირუსი არ დაუდასტურდა, ისინი საკარანტინო სივრციდან კლინიკაში იყვნენ გადაყვანილი.

უწყების ცნობით, ბათუმის ინფექციურ საავადმყოფოში კორონავირუსის საეჭვო ნიშნებს ხუთ ადამიანზე იკვლევენ. კვლევის შედეგები დღის ბოლოს გახდება ცნობილი.

ცნობისთვის, აჭარაში 12 საკარანტინო სივრცეა გახსნილი, სადაც 2000-მდე პირია მოთავსებული. კორონავირუსით ინფიცირებული 7 პირი კლინიკა "მედალფაშია" მოთავსებული.

ქუთაისის ინფექციურ საავადმყოფოში ვირუსის სიმპტომებით გუშინ შესულ პაციენტებს კორონავირუსი არ დაუდგინდათ.

ექიმის, თემურ ნადირაძის თქმით, რვა პაციენტიდან შვიდის პასუხი გახდა ცნობილი, ერთის პასუხს კი დღეს ელოდებიან. რაც შეეხება ინფიცირებულ პაციენტებს, კლინიკაში კორონავირუსის დიაგნოზით ორი პაციენტი მკურნალობს. მათგან, ახალგაზრდა მამაკაცის მდგომარეობა დამაკმაყოფილებელია, ასაკოვანი მამაკაცის მდგომარეობა კი საშუალო სიმძიმისაა, მას ორმხრივი პნევმონია და ტემპერატურა უფიქსირდება. ამ დროისთვის იმერეთის ოთხ საკარანტინო ზონაში 429 მოქალაქეა მოთავსებული. თვითიზოლაციაში 400 ადამიანია.

ინფორმაციისთვის, საქართველოში კორონავირუსით ინფიცირების შემთხვევათა რაოდენობა 98-მდე გაიზარდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული. კარანტინის რეჟიმშია 4978 ადამიანი, ხოლო სტაციონარში მეთვალყურეობის ქვეშ - 266 პირი. 98 ადამიანიდან 18 გამოჯანმრთელებულია.