"მე ბევრ ადამიანს ვხვდები და ცოტა საშიში ვარ" - ამირან გამყრელიძე

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, სოციალური დისტანცირება კვლავ საუკეთესო საშუალებაა იმისთვის რომ პანდემიის მასშტაბები თავიდან ავიცილოთ. ამის შესახებ გამყრელიძემ "პალიტრანიუსის" გადაცემა "საღამოს ნიუსრუმში" ისაუბრა:

"მარტო სახელმწიფო ვერაფერს ვერ გააკეთებს თუ მოსახლეობა არ ამოუდგა გვერდში. თუ რამე შეიძლება მიხაროდეს დღეს, მიხარია რომ საზოგადოებაში ეს სოლიდარობა და გვერდზე დგომაა. ყოველდღე მოდიან ჩვენთან ადამიანები, გვეკითხებიან - რით დაგეხმაროთ? ირეკება ტელეფონებზე... ეს კარგია, ჩვენ ერთად გავითავისეთ, რომ სერიოზულ საკითხთან გვაქვს საქმე. ეს იქნება "ისპანკას" შემდეგ ყველაზე დიდი პანდემია მსოფლიოში, როცა ისტორიულად შეფასდება.

საუკეთესო მეთოდი, რომ ჩვენ არ შევიდეთ ფართომასშტაბიან ეპიდემიაში, არის სოციალური დისტანცირება. ნუ გადაიხდიან ქორწილებს, ნუ წავლენ თავშეყრის ადგილებში, იარონ ორ-ორმა, სამ-სამმა ჰაერზე, თავი აარიდონ დიდ შეხვედრებს და თათბირებს. დაავადებათა კონტროლის ცენტრშიც, უკვე ყველა თათბირი ონლაინ მიმდინარეობს.

მე არ ვიწვევ არავის ჩემს კაბინეტში, სადაც დილის თათბირზე 30-40 კაცი იჯდა, დღეს ზის 3-4 ადამიანი და ყველაფერი ონლაინზე გადავიდა, ან მე თვითონ ჩავდივარ ყველა სართულზე და ვინც სამსახურშია ვეკითხები რა სჭირდებათ. რვა სართული გვაქვს და ჩამოვივლი ყველა სართულს პირადად, ვეკითხები რა გვჭირდება, რომ ეს ხალხი ერთად არ შევკრიბო.

აგერ ჩემთან დგას "სანიტაიზერი", ვიმუშავებთ ხელებს, თქვენი თანამშრომლები შემოვიდნენ, დაიმუშავეს ხელები, გაწმინდავენ მერე ჩემს ყურსასმენს. მე ბევრ ადამიანს ვხვდები და ცოტა საშიში ვარ... არა, არ ვარ მაინცდამაინც საშიში, ნუ გეშინიათ" - დასძინა გამყრელიძემ.