თვითმხილველის თქმით, ხაშურში მამაკაცმა 24 წლის ცოლი დედის თვალწინ დაჭრა
ხაშურში 24 წლის ქალი ქმარმა დაჭრა. შემთხვევა ქალაქის ცენტრში, ათეულობით თვითმხილველის თვალწინ მოხდა. როგორც AMBEBI.GE-ს ინციდენტის თვითმხილველი უყვება, შემთხვევა ტოტალიზატორთან მოხდა, სადაც ბრალდებული იმყოფებოდა.
დაჭრილია 24 წლის სალომე ჩ, ბრალდებული კი მისი მეუღლე მიხეილ ლ-ა. არსებული ინფორმაციით, ცოლ-ქმარს ორი შვილი ჰყავთ.
ადგილობრივის ინფორმაციით, დაჭრილის მდგომარეობა საკმაოდ მძიმეა. დაჭრის მომენტში ახალგაზრდა ქალი დედასთან ერთად მიდიოდა ქუჩაში. რა დროსაც მეუღლეს შეხვდა და შელაპარაკება მოუვიდათ განქორწინების საკითხთან დაკავშირებით. ამის შემდეგ მამაკაცმა ქალი დაჭრა.
"როგორც საავადმყოფოში თქვეს, ძალიან მძიმედაა დაჭრილი. ოპერაციაზე შეუყვანიათ ახლა... საწყალი დედამისიც იქ არის, გულწასულია სულ.
ეს ბიჭი სულ ქუჩაში იდგა, ალბათ უმუშევარია. საავადმყოფოს წინ ტოტალიზატორია და სულ მანდ იყო, შემთხვევაც იქ მოხდა" - უყვება AMBEBI.GE-ს ინციდენტის თვითმხილველი.
დაჭრილი ხაშურის საავადმყოფოშია. ექიმების განცხადებით, მას გულმკერდისა და მუცლის არეში მრავლობითი დაზიანებები აღენიშნება. 24 წლის ქალს დაზიანებული აქვს სხვადასხვა ორგანო. კლინიკაში შეყვანისას დაფიქსირდა გულის გაჩერებაც, თუმცა ექიმებმა გულის ამუშავება შეძლეს.
ბრალდებული პოლიციამ შემთხვევის ადგილზევე დააკავა. შსს-ს ინფორმაციით, 1992 წელს დაბადებულმა მ.ლ-მ ხაშურში, ერთ-ერთ ქუჩაზე, ყოფილ მეუღლეს - 1995 წელს დაბადებულ ს.ჩ.-ს, ურთიერთშელაპარაკების ნიადაგზე, დანით გულმკერდისა და მუცლის არეში რამდენიმე ჭრილობა მიაყენა.
"პოლიციის მისვლამდე, ბრალდებული შეაჩერა და განაიარაღა შინაგან საქმეთა სამინისტროს დაცვის პოლიციის დეპარტამენტის თანამშრომელმა, უმცროსმა ინსპექტორმა ალექსი ტაბატაძემ, რომელიც არასამუშაო დროს ქალაქ ხაშურში იმყოფებოდა და მომხდარ ფაქტს შეესწრო. სამართალდამცველებმა დანაშაულის ჩადენის იარაღი - დანა ნივთმტკიცებად ამოიღეს.
გამოძიება, დამამძიმებელ გარემოებებში ჩადენილ განზრახ მკვლელობის მცდელობის ფაქტზე საქართველოს სისხლის სამართლის კოდექსის 11 პრიმა 19-109-ე მუხლის მე-2-ე ნაწილის „ვ“ ქვეპუნქტით მიმდინარეობს" - ნათქვამია ინფორმაციაში.
საქართველოს მასშტაბით ამ ეტაპზე ტყის ხანძრის 7 კერაა - საგანგებო სიტუაციების მართვის სამსახური
ნიდერლანდების მოქალაქეს, რომელიც ქუთაისში ოთხი დღის წინ გაუჩინარდა, მდინარე რიონში ეძებენ
