90-იანი წლების პროდუქტები, რომლებზეც უარი ვთქვით - გრძელდება თუ არა ეს პროცესი?

მას შემდეგ, რაც მაღაზიების თაროებიდან გაურკვეველი შემადგენლობისა და წარმომავლობის პროდუქტები გაქრა, დაახლოებით, 15 წელი გავიდა. ამის მიზეზი კი ის არის, რომ დავფიქრდით იმ პროდუქტების ავ-კარგიანობაზე, რომელსაც ყოველდღიურად მოვიხმართ. ზოგიერთ მათგანზე უარის თქმა კი მხოლოდ ახლა დავიწყეთ.

80-90-იან წლებში დაბადებულ ცოტა ადამიანს თუ ნახავთ, ვინც წყალში გასახსნელი წვენების, ე.წ ჩიტის რძის, რუსული ანოტაციის მქონე სპრედისა თუ სხვა პროდუქტების შესახებ არ იცის. დღეს, ამ პროდუქტებს აღარ მოვიხმართ, რადგან ბაზარზე უკეთესი არჩევანი გაჩნდა. გაურკვეველი სუბსტანციის ფხვნილი-წვენები ნატურალურმა წვენებმა ჩაანაცვლეს, რომლის შემადგენლობაც იმ ქვეყნის კანონმდებლობით რეგულირდება, სადაც იწარმოება და პროდუქტის შესახებ ზუსტ ინფორმაციასაც ვიღებთ.

რუსული ანოტაციის მქონე სპრედები სხვადასხვა წარმოების კარაქმა შეცვალა, რომელიც უფრო უსაფრთხო და ჯანსაღია; სინთეტიკური ნივთიერებებისა და არომატიზატორებით გაჯერებული კანფეტებისა და შოკოლადის ნაცვლად უკვე შეგვიძლია, ორგანული პროდუქტი მივირთვათ.

ეს ჩამონათვალი გაგახსენებთ იმ პერიოდს, როცა მაღაზიების თაროებზე ყოველგვარი კონტროლის გარეშე ხვდებოდა პროდუქცია, ჩვენ კი მას მოვიხმარდით:

„იუპი“, „ზუკო“, „ინვაითი“

ეს ფხვნილების დასახელებაა, რომელიც ცივ წყალში გახსნის შემდეგ წვენად, უფრო სწორად გაურკვეველი შემადგენლობის მქონე სასმელად იქცეოდა-ხოლმე და სხვადასხვა ხილის არომატიზატორი „გვატყუებდა“, თითქოს იქ მართლა რაიმე „ცოცხალი“ იყო გარეული.

ფხვნილი სულ რამდენიმე გრამი იყო, ჩვენ კი შეგვეძლო 2 ლიტრ წყალშიც კი გაგვეხსნა და იმაზე არ ვიდარდებდით, რომ ის „გემოვნურ თვისებებს“ დაკარგავდა. ეს კი მის ქიმიურ და არაჯანსაღ შემადგენლობას კიდევ ერთხელ უსვამდა ხაზს.

რეალურად, ყველამ ვიცოდით, რომ არაჯანსაღ, სინთეტიკურ, საშიში შემადგენლობის მქონე პროდუქტს მოვიხმარდით, თუმცა მას შემდეგ, რაც ბაზარზე უკეთესი პროდუქტი გაჩნდა, გავაცნობიერეთ, რამხელა ზიანს ვაყენებდით საკუთარ ჯანმრთელობას. შესაბამისად, „იუპიზეც“, „ზუკოზეც“ და „ინვაითზეც“ მოთხოვნა შემცირდა, საბოლოოდ კი ისინი ბაზრიდან გაქრა.

ყავა

მსოფლიოში მხოლოდ ერთი მწარმოებლის ყავა რომ იყოს ხელმისაწვდომი, შემადგენლობის მიუხედავად, ალბათ უარს მაინც არ ვიტყოდით, თუმცა საბედნიეროდ, ასე არაა.

დღეს, ყავის ფართო არჩევანია, მთავარია, ნატურალურს მიაგნო. ისევე როგორც 90-იანებში ყველაზე გავრცელებულ პროდუქტებზე ვთქვით უარი მათი მავნე შემადგენლობის გამო, დღეს, ბევრი ჩვენგანი ისე გადადის ხსნადი ყავის მოხმარებიდან ნატურალურ ყავაზე. მიზეზი ამ შემთხვევაშიც შემადგენლობაა.

სხვადასხვა კვლევის თანახმად, ხსნადი ყავა შეიცავს ისეთ მინარევებს, როგორიც არის სოიო, ბარდა, სინთეტიკური კოფეინი, შვრია, ქერის ალაო და სტაბილიზატორები. მასში ძალიან მცირე რაოდენობით გვხვდება ნამდვილი კოფეინი და მაშინ, როცა მაცოცხლებელი და მატონიზირებელი პროდუქტის მიღება გვინდა, სულ სხვა რამეს ვსვამთ.

ხსნად ყავასთან შედარებით კი ნატურალური ყავა სრულად ინარჩუნებს იმ თვისებებს, რის გამოც ადამიანებმა მისი მოხმარება დავიწყეთ. ნატურალური, იგივე აპარატის ყავა ამცირებს მეორე ტიპის დიაბეტის, ალცჰაიმერის დაავადების, პარკინსონის დაავადების რისკებს. ასევე, გონივრული რაოდენობით ნატურალური ყავის მოხმარება გულის დაავადებების რისკის შემცირებასაც უწყობს ხელს.

გარდა ამისა, ამცირებს საყლაპავი მილის სიმსივნისა და სხვადასხვა ტიპის სკლეროზის რისკებსაც.

„იუპის“, „ზუკოსა“ და „ინვაითის“ მსგავსად, ვეძებთ ხსნადი ყავის ალტერნატივას, რომელიც ნატურალური ყავაა. აღნიშნული ყავა არ შეიცავს იმ მინარევებს, რასაც ხსნადი ყავა, ამიტომ უფრო ჯანსაღ პროდუქტად მიიჩნევა.აქვე უნდა აღინიშნოს, რომ ნატურალური ყავის შერჩევის პროცესიც მნიშვნელოვანია - მას მაღალი ტექნოლოგიების დახმარებით, გემო, არომატი და ხარისხი შენარჩუნებული უნდა ჰქონდეს.