ჩინეთში მყოფი საქართველოს სამი მოქალაქე თბილისში დღეს დაბრუნდება - უახლესი მონაცემები ჩინეთიდან

ჩინეთში მყოფი საქართველოს სამი მოქალაქე სამშობლოში დღეს დაბრუნდება. ამის შესახებ „ინტერპრესნიუსს“ ჩინეთში საქართველოს საგანგებო და სრულუფლებიანმა ელჩმა, არჩილ კალანდიამ განუცხადა.

დიპლომატის განმარტებით, საქართველოს სხვა მოქალაქეები თავს კარგად გრძნობენ და საელჩო მათთან მუდმივ კავშირზეა.

როგორც ელჩი განმარტავს, ჩინეთში სანიტარული და უსაფრთხოების თვალსაზრისით უპრეცედენტო ზომებია მიღებული.

„ჩემი ინფორმაციით, დღეს ჩვენი სამი თანამოქალაქე საქართველოში დუბაის გავლით ბრუნდება. ისინი საზღვარზე იგივე პროცედურებს გაივლიან, რაც დაწესებულია.

საბედნიეროდ, ჩვენი მოქალაქეები ჯანმრთელად არიან. მუდმივ კავშირზე ვართ მათთან როგორც უხანში, ასევე სხვადასხვა რეგიონებში მყოფ ჩვენს თანამემამულეებთან. ამ ეტაპზე მათ სიცოცხლეს საფრთხე არ ემუქრება. ვაგრძელებთ ვითარების მონიტორინგს. საერთო ჯამში, ჩინეთში ნორმალური ვითარებაა, ანუ მთელი ქვეყნის მასშტაბით შესაბამისი მასშტაბური სანიტარული და უსაფრთხოების ზომების მიღება გრძელდება.

ჩინეთის ხელისუფლების წარმომადგენლები იმედოვნებენ, რომ უახლოეს მომავალში სიტუაცია უკეთესობისკენ შეიცვლება. სამწუხაროდ, ინფიცირებულთა და გარდაცვლილთა რიცხვი მზარდია, მაგრამ დარწმუნებული ვარ, ის პრევენციული ზომები, რაც ჩინეთის მთავრობამ მიიღო, შედეგს აუცილებლად გამოიღებს“, - აცხადებს არჩილ კალანდია.

დიპლომატის განმარტებით, ჩინეთში მყოფ ზოგიერთ ქართველს სამშობლოში დაბრუნება სურს და თუკი ისინი აღნიშნულ საკითხზე საბოლოო გადაწყვეტილებას მიიღებენ, საელჩო დაეხმარება.

„ჩვენი თანამოქალაქეების გარკვეულ ნაწილს საქართველოში დაბრუნება სურთ. თუ გადაწყვეტილებას მიიღებენ, საელჩო მათ თავისი კომპეტენციის ფარგლებში დაეხმარება. კონკრეტულად ციფრს ვერ გეტყვით, მაგრამ ზოგ ქართველს სამშობლოში დაბრუნება სურს. ჩვენც შესაბამის მიმართულებებს ვურჩევთ, მოგეხსენებათ, ჩინეთის მიმართულებით ძალიან ცოტა ავიარეისი დაფრინავს და ცხადია, ეს საკითხს აფერხებს“, - აცხადებს არჩილ კალანდია.

ჩინეთში, ბოლო მონაცემებით, ახალი კორონავირუსით 811 ადამიანია გარდაცვლილი, - ამის შესახებ ინფორმაციას „როიტერსი“ ჩინეთის ნაციონალურ კომისიაზე დაყრდნობით ავრცელებს.

გავრცელებული ინფორმაციით, ბოლო ერთი დღის განმავლობაში 2019-nCoV ვირუსით კიდევ 89 ადამიანი გარდაიცვალა და მსხვერპლის საერთო რაოდენობა 37-ით მეტია, ჩინეთში, 2002-2004 წლებში, მწვავე რესპირატორული სინდრომის (SARS) ეპიდემიის შედეგად გარდაცვლილ ადამიანთა რაოდენობაზე.

გარდა ამისა, ჩინეთში, კორონავირუსით დაინფიცირების 37,198 დადასტურებული შემთხვევაა გამოვლენილი.

შეგახსენებთ, 2002-2004 წლებში, SARS-ის კორონავირუსის ეპიდემიას 774 ადამიანი ემსხვერპლა.