"ვწუხვარ, რაც ივანიშვილისგან ფული ავიღე, ვერ დავაბრუნებ.." -  ვინ ბლოკავს დიმიტრი ტატიშვილს და რას საყვედურობს თეატრის ხელმძღვანელობას

მსახიობი დიმიტრი ტატიშვილი პოპულარობას არ უჩივის, თუმცა, აშკარად შესამჩნევია ის ფაქტი, რომ ცნობილი მსახიობი სხვადასხვა პროექტში ნაკლებადაა დაკავებული.

AMBEBI.GE-ს მსახიობმა ვრცელი და გულახდილი ინტერვიუ მისცა, ბუნებრივია, მასთან საუბარი ახალი წლით დავიწყეთ.

- ბატონო დიმიტრი, როგორ შეხვდით ახალ 2020 წელს? რა ტრადიციები გაქვთ?

- არაფერი განსაკუთრებული ტრადიციები არ გვაქვს, დიდი მსმელი არ ვარ, ახალ წელს სახლში ვხვდები და თუ მივდივართ, მეუღლესთან ერთად მივდივარ სტუმრად. სანამ ჩემი ერთ-ერთი ქალიშვილი გათხოვდებოდა, ორივე ოჯახში ხვდებოდა ახალ წელს და შემდეგ გადიოდნენ სახლიდან. მე მსმელი კაცი არ ვარ და ახალ წელსაც არ მიყვარს დალევა. მხოლოდ ერთხელ დავლიე.

- რას საქმიანობთ?

- თეატრში ორ სპექტაკლში ვარ დაკავებული. კინოში მოსაწონი არაფერი არ ხდება. იანვრის მეორე ნახევარში უნდა ყოფილიყო ირანული ფილმის პრემიერა, მაგრამ აღარ ვიცი, რა მოხდება. "ამირანში" გვქონდა საპრემიერო ჩვენება. არაჩვეულებრივი გუნდი იყო ჩამოსული, მაღალი კლასის პროფესიონალები. სასიამოვნო იყო მათთან მუშაობა. ყველა დეპარტამენტი წესრიგით მუშაობდა.

საქართველოსთვის არატიპიური ფილმი გამოვიდა. ეს არის სიურეალისტური კომედია. გაურკვეველი ქვეყანაა, სადაც არაფერი კონკრეტული არ ხდება. მაგრამ რაღაცით ეს ფილმი ჰგავს ამერიკულ ფილმს „ვირთხების რბოლა“. რამდენიმე ადამიანს ეძლევა ნიშნები, ერთ ადგილზე მივიდნენ და იქ რაღაც ხდება. ფილმში მთავარ როლს ვთამაშობ. გადაღებები თბილისში იყო. მხოლოდ ქართველი მსახიობები ვთამაშობთ, გუნდის დანარჩენი წევრები ირანელები იყვნენ. სხვათა შორის, მათ გვითხრეს, თუ პრემიერაზე ჩამოსვლის სურვილი არ გექნებათ, გაგიგებთ, არ გვეწყინებაო.

- რატომ არ წახვედით ირანში პრემიერაზე?

- არ დავუპატიჟებივართ, რადგან ჯერ ფილმის ჩვენების უფლებას ირანში არ აძლევენ.

- საუბრისას ხაზი გაუსვით ირანელების პროფესიონალიზმს, ქართულ ფილმებზე მუშაობისას გაქვთ პროფესიონალებთან მუშაობის კომფორტი?

- მე მქონდა ურთიერთობა, ჩემი აზრით, ყველაზე მაგარ პროფესიონალთან, ზაზა ურუშაძესთან. მას ჰქონდა უნარი, შეეკრიბა ყველაზე მაგარი ჯგუფი საქართველოში. ბევრი გეგმები გვქონდა, მაგრამ... პროფესიონალიზმი დეტალებში გამოიხატება, ამ ყველაფერს ნიჭი და სწავლა სჭირდება. ჩვენთან ნიჭიერი ადამიანები რატომღაც თვლიან, რომ ადვილად გამოუვათ ყველაფერი, მაგრამ ეს იშვიათია.

ზაზა კი ადამიანებსაც კარგს კრებდა და პროფესიონალებსაც. გასულ წელს იგეგმებოდა გადაღებები ოდესაში, რომლის აღმასრულებელი პროდუსერი იყო ზაზა ურუშაძე, მე ერთ-ერთი ქართველი უნდა მეთამაშა, ისტორიული ფილმი იყო, როლზეც დამტკიცებული ვიყავი, ისიც ვიცოდი, როდის იქნებოდა გადაღებები, თუმცა, ჩაიშალა ეს პროექტი, რადგან კინოცენტრმა მიზერულ დაფინანსებაზეც უარი თქვა. როცა ეს მოხდა, ზაზამ მითხრა, ნუ გეშინია, მე ბევრი გეგმა მაქვს, ეს არაფერია იმასთან შედარებითო.

ზაზა კინოაკადემიის პრეზიდენტი იყო, გეგმავდა მჭიდრო კავშირები ჰქონოდა ამერიკის კინოაკადემიასთან, ერთობლივ პროექტებზე და კასტინგებზე ფიქრობდა, თუმცა...

- "მთავარ არხზე" გადის დოკუმენტური ფილმი "ანაკონდა", სადაც ბიძინა ივანიშვილს მწვავედ აკრიტიკებთ...

- ეს არის შოთა მალაშხიას დოკუმენტური ფილმები, სადაც მე ვარ. მეც იგივე პოზიცია მაქვს, რასაც ფილმში ვამბობ და უბრალოდ ტექსტს არ ვკითხულობ. ოფიციალურად არაა ნათქვამი, მაგრამ ჩვენს ქვეყანაში რუსული წყობაა.

- თქვენს სფეროში ბევრია ბიძინა ივანიშვილის მხარდამჭერი, ამ ფილმებზე მუშაობის გამო, თუნდაც კოლეგები არ გაკრიტიკებენ?

- ღმერთმა ყველას ხელი მოუმართოს, მე ვთვლი, ჩემს ქვეყანას ვინც აზარალებს, უნდა გააკრიტიკო ისე, როგორც შეგიძლია. ყოველ ნაბიჯზე ვხვდებით იმას, რომ ეს მმართველობა ქვეყანას ვნებს. ჩვენ არა მხოლოდ უნდა ვაკრიტიკოთ, არამედ უნდა შევცვალოთ. მტერს უნდა ვებრძოლოთ, მტერი არის ყველა, ვინც შენს ქვეყანას აზიანებს. ვთვლი, ყველაზე ძვირფასი, რასაც უნდა გაუფრთხილდე, ესაა ჩვენი ქვეყანა.

- როდიდან გახდით ბიძინა ივანიშვილის მიმართ კრიტიკული?

- მე სიმართლე გითხრათ, 2011 წელს, როდესაც პირველად გამოჩნდა ბიძინა ივანიშვილი და მისი ინტერვიუ ვნახე, თეატრში მივედი და ვთქვი, მისგან დახმარებას აღარ მივიღებ-მეთქი. ჩემნაირად რამდენიმე ადამიანი მოიქცა. თავიდანვე მივხვდი, ეს არის იმ ძალის წარმომადგენელი, რომელიც ერთ საუკუნეზე მეტია, მართავს რუსეთს, ასეა მიტაცებული ჩვენი სახელმწიფოც. დიდი ბრძენი და მცოდნე არა ვარ, მაგრამ რაც ჩემი ჭკუით გავაანალიზე, მივხვდი, ეს კაცი კარგს არაფერს მოუტანდა საქართველოს და ასეც მოხდა. მე იმის მერე დახმარება არ მიმიღია, ვწუხვარ, რაც მანამდე მქონდა აღებული, იმას ვერ დავაბრუნებ.

- რამდენი წელი იღებდით ივანიშვილის დახმარებას და რამდენს?

- დიდი ხანი არ ვიღებდი. ეს იყო ყოველთვიურად 320 ლარი, რვა წლის წინ ეს კარგი თანხა იყო, უარის თქმა ადვილი არ გახლდათ, მაგრამ ამ ფულს ვეღარ მივიღებდი და ახლა პირნათელი ვარ ჩემს თავთან. ძალიან კარგად ვხვდებოდი, რა ჰქონდა ამ კაცს მიზნად.

- კონკრეტულად რომელმა დეტალებმა მიგახვედრათ?

- მტერს რუსეთს, რომელიც არის ჩვენი დამანგრეველი, მას მტრად არ აღიქვამდა. როდესაც კაცს უნდა ხელისუფლებაში მოსვლა და მტერს მტრად არ აღიქვამს, მინიმუმ დამაზიანებელია. ყველამ იცის, რომ 90-იან წლებში და ვერც დღეს, რუსეთში ფულს ვერ იშოვი.

ბიძინა ივანიშვილმა კი მილიარდები იშოვა, რასაც კგბ-სთან კავშირის გარეშე ვერ მოახერხებდა. ის მჭიდროდ იყო დაკავშირებული იმ სისტემასთან, რომელსაც ტერორისტულ სახელმწიფოდ ვთვლი, რადგან ის ატერორებს საკუთარ მოქალაქეებს და ყველაფერს, მათ შორის საქართველოს, ბიძინა ივანიშვილის ხელით. კაცი, რომელიც ამბობს ფრაზას, ისეთ გასაოცებელ დემოკრატიას შევქმნი, გავაოცებ ევროპასო. ეს არის აფერისტობა. აფერისტული პირამიდა ააგო. სამწუხაროდ, მოქალაქეების უმეტესობა მოტყუვდა.

- ვინც ამ ინტერვიუს წაიკითხავს და თქვენსავით არ ფიქრობს, გაგახსენებთ მიშა სააკაშვილის მმართველობის პერიოდში მომხდარ ფაქტებს...

- არაადეკვატურია ეს შედარება. მურვან ყრუს დროს კარგი იყო? სტალინის დროს კარგი იყო? ახლა რა არის, ამაზე უნდა ვისაუბროთ. კაცი დაგვპირდა ამას, იმას და არაფერი არ შესრულდა.

- იბლოკებით საკუთარი პოზიციის გამო?

- მიგრძვნია, რომ ჩემი პოზიციის გამო დავიბლოკე. პირდაპირ არ უთქვამთ ამის გამო გეუბნებით უარს თანამშრომლობაზეო, მაგრამ რამდენიმე პროექტი არ შედგა. მაგალითად, წლების წინ დამირეკეს თბილისობას თუ წაიყვანთო, იმ მომენტში არ მეცალა და ვუთხარი ცოტა ხანში დამირეკეთ-მეთქი და აღარ დამირეკეს. იმ „სისხლიანი 9 წლის“ მანძილზე ყოველთვე მქონდა 4-5 დაუგეგმავი სამუშაო, 2012 წლის მერე მოიკლო ასეთმა საქმეებმა, რადგან ოცნების საწინააღმდეგო ფილმები გავახმოვანე. ის შემოსავალი მე აღარ მაქვს. შესაძლოა, დამთხვევაა, მაგრამ თეატრშიც მხოლოდ ერთ ახალ სპექტაკლში მივიღე მონაწილეობა. ასეთი დამთხვევები არ ხდება.

- გულნატკენი ხართ რეჟისორებისგან?

- არა. მგონია, დალაგდება ყველაფერი. მე დამნაშავე არავის წინაშე არ ვარ, ნებისმიერ ადამიანს შემიძლია, თვალი თვალში გავუყარო. თუ ვინმე აქეთ ჩაიჭრა, პასუხს არავის მოვთხოვ. მათ შორის არც თეატრის ხელმძღვანელობას. ლევან წულაძე არის ჩვენი სამხატვრო ხელმძღვანელი, თითქმის ყველა სპექტაკლში ვიყავი მასთან, მაგრამ ფაქტია, 2012 წლის შემდეგ არც ერთ სპექტაკლში არ ვარ. შესაძლოა, ეს მისი შემოქმედებითი ხედვაა. ჩემი, როგორც მსახიობის პოპულარობა, ფაქტია, არ დაცემულა.

- სერიალებიდანაც აღარ გაქვთ შემოთავაზებები?

- სერიალებიდანაც არ არის. "იმედიდან" და ეგეთი არხებიდან არც დამიძახებენ, რა თქმა უნდა.

- თუ დაგირეკავენ "იმედიდან", დათანხმდებით?

- გააჩნია, რა იქნება. ერთ-ერთი გადაცემიდან დამირეკეს, სტუმრად მობრძანდით და თან თანაწამყვანი იყავითო, მაგრამ არ შემიძლია, ვიღაცამ ყურში მითხრას, ეგ არ თქვა. მე, ღმერთის წყალობით, არაფერი არ მაკლია, იმდენი მაქვს ფული, რომ მშიერი არ ვარ. მგონია, ყველაფერი კარგად იქნება. არიან ადამიანები, ვინც ფიქრობს, თუ თავად და მისი ახლობლები კარგად იქნებიან, ქვეყანაც კარგად იქნება.

ასევე არის ადამიანების მეორე კატეგორია, ვინც პირიქით ფიქრობს, თუ ქვეყანა კარგად იქნება, თავადაც კარგად იქნება, მე მეორე კატეგორიას მივეკუთვნები. მიშა სააკაშვილს დასდევდნენ სუშის რატომ ჭამსო? ასფალტი ვჭამოთო? რატომ არ ყვირიან ახლა ნაძვის ხე ვჭამოთო? თუ შადრევანი ფუფუნებაა, 996 ათას ლარად ნაყიდი უშნო ნაძვის ხე არაა ფუფუნება? ეს დასაშვებია, რადგან კალამ თქვა?