ლეგენდების ტურნირში "დინამო თბილისის" გუნდმა ლევერკუზენის "ბაიერი" დაამარცხა - ოთხი გოლიდან ერთ-ერთი გუნდის კაპიტანმა კახა კალაძემ გაიტანა

"დინამო თბილისის" სასარგებლოდ, 4:2 დასრულდა ანგარიში ლევერკუზენის "ბაიერთან" შეხვედრისას. ოთხი გოლიდან ერთ-ერთი გუნდის კაპიტანმა კახა კალაძემ გაიტანა.

გერმანიის დედაქალაქ ბერლინში ლეგენდათა ტრადიციული ტურნირი (AOK TRADITIONSMASTERS) იმართება, რომელშიც "დინამო თბილისი" მონაწილეობს. გუნდის კაპიტანი კახა კალაძეა.

"მივესალმები ასეთი ტურნირის ჩატარებას. ძალიან დიდია ინტერესი საზოგადოების მხრიდან, როდესაც ვეტერანი ფეხბურთელები იკრიბებიან. წელს "დინამო თბილისის" სახელით გამოვდივართ და მიხარია, რომ გვაქვს შესაძლებლობა მონაწილეობა მივიღოთ ასეთ მაღალი დონის ტურნირში, სადაც წამყვანი გერმანული საფეხბურთო კლუბები არიან წარმოდგენილები. 19 იანვარს უკვე ბათუმში გაიმართება ტურნირი ნაკრებების დონეზე, რაც ვფიქრობ, ძალიან მნიშვნელოვანია ჩვენი ქვეყნის პოპულარიზაციისთვის", - განაცხადა კახა კალაძემ ტურნირის დაწყების წინ.

დღესვე მაქს შმელინგის სახელობის დარბაზში კიდევ ერთი მატჩი გაიმართა. ერთმანეთს დორტმუნდის "ბორუსია" და "დინამო თბილისი" დაუპირისპირდნენ. მატჩი 3:2 დორტმუნდის "ბორუსიას" სასარგებლოდ დასრულდა.