2
მაისიდღის ზოგადი ასტროლოგიური პროგნოზი
ვინც არ იცის, მის გასაგონად ვიტყვი: "ქინ-ძა-ძა" არის ქართული წარმოშობის რუსი რეჟისორის, გიორგი დანელიას ერთ-ერთი კომედიური ფილმის სათაური და, აგრეთვე, ფრაზა ამავე ფილმიდან - გამოგონილ, უცხოპლანეტელთა ენაზე.
მართალი რომ გითხრათ, არ მახსოვს, რას ნიშნავს ფილმში ეს "ქინ-ძა-ძა", მაგრამ თვით ფილმი რომ დიდი ვერაფერი შვილია (დანელიას სხვა კომედიებისგან განსხვავებით), ამას თვით რეჟისორიც აღიარებს.
სამაგიეროდ, დანელიას ეს არცთუ შედევრული ნაწარმოები კინოინდუსტრიის უპირველესი სახელმწიფოს პრეზიდენტის უსაყვარლესი ფილმი ყოფილა ბავშვობიდან!
დიახ, ბატონებო - მისტერ პრეზიდენტ ბარაქ ჰუსეინ ობამა თურმე ბავშვობიდან "ქინ-ძა-ძა"-ზე აფანატებს!!!
ასე თქვა მისმა დამ (მერე რა, რომ ნახევარდაა, "მთელი" არ ჰყავს და რა ქნას?!) და დაეჯერება...
ისე, ჩვენში დარჩეს და, მაგ ბიჭზე (დანელიაზე კი არა, ობამაზე) თავიდანვე ვიეჭვე, რომ არის მასში რაღაც "ქინ(ძა)ძური"-მეთქი, მაგრამ ასე პირდაპირი მნიშვნელობითაც თუ გამართლდებოდა, ნამდვილად არ მეგონა! არა, არა - დღითი დღე ვრწმუნდები ჩემში წინასწარმეტყველური ნიჭის არსებობაში და უსამართლობა არ არის, ამ ქვეყანაში ირაკლი ლომაიას ერქვას რაღაცის მამა თუ მამამთავარი?! კარგი, აღარ გვინდა, შევეშვათ ლომაიას, დღეს სხვა "ქინ(ძა)ძებზე" უნდა ვისაუბრო.
არ ვიცი, რითი, უფრო ზუსტად - "ვისით" დავიწყო... არა, კი ვიცი, ოღონდ მიმძიმს... მაგრამ რას ვიზამ - სიმართლე უპირველეს ყოვლისა! ეეჰჰ... მოკლედ, ჩემმა მკითხველმა (მეგობრებმა - მით უმეტეს) იციან, რომ უაზროდ, უმიზეზოდ და ფანატიკურად არც შემყვარებია ვინმე და არც შემძულებია (შვილებისადმი ბუნებრივ სიყვარულს თუ არ ჩავთვლით); ცხადია, გამონაკლისების გარდა და ერთ-ერთი (კი არა, მგონი - ერთადერთი) ასეთი გამონაკლისი დიეგო მარადონაა (იყო?!)... პრინციპში, რატომ - უმიზეზოდ?..
ფეხბურთზე ვგიჟდები და ვისაც ფეხბურთი უყვარს და მარადონა არ მოსწონს, "იმ შავი ბიჭის" არ იყოს, მაგარი "ქინძაძაა", მაგრამ თვითონ ეს ჩემი დიეგო "ქინ(ძა)ძურ" "სასტავს" ჩაეხუტა - აუ, მტრისას! არა, ჩავესთან და ფიდელ კასტროსთან გასაგებია, ჩე გევარა და ამბავი (თუმცა ეგეც რატომაა გასაგები?), მაგრამ კვირას ეგ კოკოითს ეჟღურტულა! ძლივს "ააღლიტეს" სხვა "ქინ(ძა)ძებმა" ერთმანეთს! კოკოითმა, - ჩამოდი, ჩაგახრჩობ ხაბიძგინებშიო! დიეგომ, - ხაბიძგინები ბებიაშენს აჭამე, შენზე ამბობენ, უფრო "საინტერესო" რამეებიც მოეპოვება და ამ დარდიან გულზე უკეთესს ვერაფერს შემომთავაზებო? კოკოითმა, - შენ ოღონდ ჩამოდი და რისი კოკ(ოითი) ვარ, შენ თუ ჩვენებურ კოკ(აინზე) გული დაგწყვიტოო... მოკლედ,
ი-ქინ-ძა-ძეს...
ახლა მოსკოვში "წავიდეთ" (წარმოსახვით, თორემ ისე ჯვარი გვწერია): მაგათმა მთავარმა "ქინ-ძა-ძამ", მედვედევმა ორი ქართველი (უფრო ზუსტად, "ქართველი") დააჯილდოვა: "სამშობლოს წინაშე დამსახურებისთვის" ზურაბ წერეთელი და "ღირსების ორდენით" - თამარ გვერდწითელი... ერთი თხოვნა მაქვს ცხონებული რევაზ ლაღიძის ოჯახის მიმართ (ალბათ ისინი ფლობენ კომპოზიტორის შემოქმედებით მემკვიდრეობაზე საავტორო უფლებას), ოღონდ ამჯერად, არა "პროვოკაციული", არამედ სრულიად სერიოზული: არ შეიძლება, რუსული "ღირსების" ორდენოსნებსა და "სამშობლოს" წინაშე დამსახურებულებს, ერთი სიტყვით, ყველა "ქინ-ძა-ძას", თუნდაც "თბილისო"-ს სიმღერა რომ აუკრძალოთ?!
ზოგიერთ აქაურ "ქინ(ძა)ძ(ა)"-ს ვთხოვ, იდიოტური არგუმენტებით სავსე მეილები არ მომწერონ (როგორებიცაა: "საქართველოს სახელს უთქვამენ...", "ორი ერის შერიგებას ემსახურებიან...", "რაც უნდა იყოს, მართლმადიდებელი ქვეყანაა..."): პარასკევს პარიზში მივდივარ და ნუ გამიშვებთ ნერვებაშლილს...
ძალიან კი დამაინტერესა - რას ნიშნავს იმ ფილმში "ქინ-ძა-ძა"? მაგრამ რომ არ მახსოვს?! უნდა მოვქექო ახლა ინტერნეტში... თუკი ვინმე ამაცილებს ამას და მომწერს, მადლობელი ვიქნები.
P.S. ისე, მაგარი კი იქნება, სულაც რაიმეს კარგს რომ ნიშნავდეს და მე კი ამ დროს კოკოითს სულ "ქინ-ძა-ძა" ვეძახე!.. მოკლედ, სანახავია, მაგრამ ჟღერადობა აქვს ისეთი, კარგიც რომ იყოს, პირადად მე, "ქინ-ძა-ძობას" არ ვისურვებდი...
სულ ამაზე ვეწუწუნები რედაქტორს, - ორი გვერდი მაინც მომცეს: რამდენი ვიქადე დასაწყისში, ბევრ "ქინ-ძა-ძაზე" გვექნება საუბარი-მეთქი, მაგრამ არ მყოფნის ერთი გვერდი და რა ვქნა?!
არადა, ურეკში სტადიონის საჯარიმო მოედანში პოლიციის ოფისს აშენებენ; ქუთაისში გერმანელი პროფესორი "გაძუყნეს" ბარში ფეხბურთის ყურებისას, - გერმანიას როგორ "ბალელშიკობ", ჩვენ აქ ფულს ვაგებთო; გიორგი გუგავას ბავშვობაში კოსმონავტობა "ნანდომა" და ბედნიერია, რომ ოცნება აუხდა(?!) და ნათელაშვილთან აღმოჩნდა...
მოკლედ, "ქინ-ძა-ძა"-ს რა დალევს ამ ქვეყანაში?!.
P.S.S. ნეტავ მართლა, რას ნიშნავს?..
პროვოკატორი
ჟურნალი "გზა"
(გამოდის ხუთშაბათობით)
