ულამაზესი კუნძული სახლის ფასად იყიდება

თუ ყოველთვის ოცნებობდით, კარიბის ზღვაში საკუთარი კუნძული გქონოდათ, რეალობასთან, შესაძლოა, ოდნავ ახლოს აღმოჩნდეთ - CNBC-ს ინფორმაციით, პატარა, ულამაზესი კუნძული ბელიზში „სულ რაღაც“ 350 000 დოლარად იყიდება, რაც უფრო იაფია, ვიდრე ბინების საშუალო ფასი ნიუ-იორკში, სიეტლში, სან დიეგოსა და პორტლენდში.

კუნძულის ფართობი, რომელზეც ბელიზის სამხრეთ სანაპიროდან ნავით 20 წუთში მოხვდებით, 4 ათასი კვადრატული მეტრია. იმის მიუხედავად, რომ ის სრულიად აუთვისებელია, როგორც უძრავი ქონების აგენტები ამბობენ, კუნძულს დიდი პოტენციალი აქვს.

წყალი გარშემო ღრმა არ არის - თუ კუნძულს 30 მეტრით დაშორდებით, წყალი მაინც მუხლამდე მოგწვდებათ.