ვენაში დაკარგული ქართველი სტუდენტი იპოვეს

ვენაში დაკარგული ქართველი სტუდენტი, ანრი ლომიძე იტალიაში იპოვეს. ლომიძეს, რომელიც ავსტრიაში სასწავლებლად იმყოფება, 5 დღე ეძებდნენ.

როგორც AMBEBI.GE-ს ლომიძის ახლობლებმა განუცხადეს, ის ფლორენციის ერთ-ერთ საავადმყოფოში იმყოფება და მას სავარაუდოდ ფიზიკური დაზიანებები აღენიშნება.

ახლობლების ინფორმაციით, ახალგაზრდა სამედიცინო დაწესებულებაში სხეულის დაზიანების გამო მიიყვანეს. ის საავადმყოფოში უცნობმა მოქალაქემ დატოვა. არსებული ინფორმაციით, ლომიძე კონტაქტურია, თუმცა ჯერ კვლევებს გადის და არ დაკითხულა.

როგორც ცნობილია, ანრი ლომიძის გაუჩინარებას წინ უკრაინელ სტუდენტებთან უთანხმოება უძღოდა, რის გამოც ლომიძემ მათთან ერთად ნაქირავები სახლი დატოვა და ამის შემდეგ მისი კვალი დაიკარგა.

AMBEBI.GE-ს ხელთ არსებული ინფორმაციით, კონფლიქტის შემდეგ, ლომიძე ავსტრიიდან დედასთან წავიდა, რომელიც იტალიაში ემიგრაციაშია. თუმცა, რადგან მეგობრებმა დედამისს შეატყობინეს, რომ ახალგაზრდა ბიჭი დაიკარგა, ქალი იტალიიდან ავსტრიაში ჩავიდა შვილის საძებნელად. სავარაუდოდ, ამის შემდეგ ანრი ლომიძე დედას ვეღარ დაუკავშირდა, თუმცა რა მოხდა შემდეგ, ჯერჯერობით უცნობია.

ახალგაზრდა ქართველი სტუდენტის სამძებრო სამუშაოებს 5 დღე აწარმოებდა ავსტრიის პოლიცია და ახლა საქმეზე ძიება დაიწყო იტალიურმა მხარემაც.