"ისეთი ჯარიმები უნდა დაწესდეს, რომ ადამიანი "ხერხემალში გადატეხოს"

საქართველოში 90–იანი წლების შემდეგ გაზმომარაგების სრულად აღდგენიდან დღემდე ბუნერბივი აირის ნამწვით ანუ CO მოწამვლის არაერთი ფაქტი გვახსოვს.

ასეთი სავალალო შედეგების თავიდან აცილების შესაძლებლობას საზოგადოების წარმომადგენლები იმ რეგულაციების სასტიკად გამკაცრებას მოითხოვს, რომლებიც, მათ შორის, გაზისა თუ ელექტროენერგიის მომხმარებელთა ქცევის წესებს არეგულირებს შესაბამისი მოწყობილობების ექსპლუატაციის დროს.

"გარდაცვლილებს კუსტარულად დამონტაჟებული გაზგამათბობელი ცოტა ხნის წინ "ყაზტრანსგაზმა" ჩაუჭრა, მაგრამ მათ გამათბობელი თვითნებურად დააერთეს. მგონი კანონია გასამკაცრებელი, ასეთი ტიპის თვითნებობაზე ძალიან მძიმე სასჯელი უნდა იყოს", – წერს ტელეწამყვანი ნანუკა ჟორჟოლიანი სოციალურ ქსელში.

მანამდე "მენაშენეთა ასოციაციის" თავმჯდომარე ირაკლი როსტომაშვილი ჟურნალისტებთან საუბარში მომხმარებელთა დიდ პასუხისმგებლობაზე საუბრობდა გაზის მოწყობილობების ექსპლუატაციის კონტექტსში. ირაკლი როსტომაშვილი უმკაცრესი საჯარიმო სანქციების შემოღების მომხრეა.

"კომპანიის მიერ ჩაჭრილი დანადგარი მოქალაქეებმა თვითნებურად მიაერთეს გაზის მილს და შედეგად 7 ადამიანის გარდაცვალება მივიღეთ. როდესაც ვინმე თვითნებურად არღვევს თუნდაც გაზის დანადგარის ექსპლუატაციის წესს და სპეციალისტების მითითებებს, უნდა დაჯარიმდნენ თუნდაც 10 000 ლარით. ისეთი ჯარიმები უნდა დაწესდეს, რომ "ხერხემალში გადატეხოს" ადამიანი, ვინც ამას სჩადის!", – ამბობს "მენაშენეთა ასოციაციის" თავმჯდომარე.