Baby Sleep - ქართული სტარტაპი, რომელიც თქვენი შვილის მშვიდ ძილს უზრუნველყოფს

საბავშვო თეთრეული, საბნები, პლედები, გამოსაყვანი კონვერტები, საწოლის კომპლექტები, აბაზანის და საწოლის აქსესუარები, რბილი ასოები, დეკორატიული ბალიშები, რბილი სათამაშოები - ეს სტარტაპი Baby Sleep-ია, რომელიც ახალგაზრდა დედამ დადუ ჭოლაძემ გასულ წელს შექმნა.

"ჩემი პატარა გოგონასთვის მინდოდა შემეძინა საწოლის კომპლექტი და აღმოჩნდა, რომ საქართველოში მსგავსი პროდუქცია არ მზადდებოდა. სწორედ ეს გახდა ჩემი მოტივატორი, რომ თავად შემექმნა მსგავსი ნივთები. კერვა და ქარგვა ყოველთვის მიყვარდა. როცა სტარტაპის დაარსება და ბიზნესად ჩამოყალიბება გადავწყვიტე, საქმეს სერიოზულად მივუდექი და კერვის კურსებზე დავიწყე სიარული. ძალიან გამიმართლა, რადგან მოვხვდი არაჩვეულებრივ ადამიანთან, რომელმაც ძალიან ბევრი რამ მასწავლა. ჩემი საქმე ძალიან მიყვარს და ვთვლი, რომ გამიმართლა, რადგან ვაკეთებ იმას, რაც მსიამოვნებს," - განმარტავს სტარტაპერი დადუ ჭოლაძე.

ამჟამად სტარტაპი მომხმარებელს სთავაზობს მრავალფეროვან ასორტიმენტს, რაც მათი პატარების უსაფრთხო და კომფორტულ ძილს უზრუნველყოფს. პროდუქცია უნიკალურია, რადგან ის ანტიალერგიულია. მეორე მხრივ კი, თითოეული პროდუქტი ინდივიდუალურად იქმნება.

"თითქმის ყველაფერი, რასაც ვქმნით მოთხოვნადია. ძალიან აქტუალური და მოთხოვნადია ქარგვაც" - ამბობს დადუ.

კომპანიაში ფასები საკმაოდ ხელმისაწვდომია. მომხმარებლებს განსაკუთრებით მოსწონთ სხვადასხვა სახის აქციები. სტარტაპი პერიოდულად თანამშრომლობს სხვადასხვა ვებგვერდთან, რომლებიც ფასდაკლების კუპონებს სთავაზობენ კლიენტებს.

"ამჟამად ჩვენი პროდუქცია საკმაოდ მოთხოვნადია. თუმცა მცირე ბიუჯეტით სტარტაპის დაწყება რთული იყო. ეს სირთულეც გადავლახეთ, რადგან ძალიან მალე გავითქვით სახელი და ჩვენი შემოსავლებიც გაიზრდა. თიბისი ბანკის პროგრამა "სტარტაპერშიც" ვმონაწილეობთ. შარშან ჩავერთეთ პროგრამაში, რასაც საკმაოდ დიდი გამოხმაურება მოჰყვა. უფრო მეტმა ადამიანმა გაიგო ჩვენ შესახებ, გვწერდნენ, გვირეკავდნენ. ძალიან მომწონს ეს პროექტი და მინდა, მთელი გუნდის სახელით მადლობა გადავუხადო თითოეულ იმ ადამიანს, ვინც ამ პროექტზე მუშაობს. კარგ საქმეს აკეთებენ და ჩვენ, დამწყებ სტარტაპერებს ძალიან გვეხმარებიან ამით," -ამბობს სტარტაპერი.

#სტარტაპერი #გვეამაყები

ფოტოები: Advan/ედვენი

ნანა მღებრიშვილი

AMBEBI.GE